17 shlokas
- 1
वास्तुकप्रशस्ते वास्तुनि नायकवर्धकिमौहूर्तिकाः स्कन्धावारम्वृत्तं दीर्घं चतुरश्रं वा भूमिवशेन वा चतुर्द्वारं षट्पथं नवसंस्थानं मापयेयुः खातवप्रसालद्वाराट्टालकसम्पन्नं भये स्थाने च
vāstukapraśaste vāstuni nāyakavardhakimauhūrtikāḥ skandhāvāramvṛttaṃ dīrghaṃ caturaśraṃ vā bhūmivaśena vā caturdvāraṃ ṣaṭpathaṃ navasaṃsthānaṃ māpayeyuḥ khātavaprasāladvārāṭṭālakasampannaṃ bhaye sthāne ca
- 2
मध्यमस्योत्तरे नवभागे राजवास्तुकं धनुःशतायामम् अर्धविस्तारम्पश्चिमार्धे तस्यान्तःपुरम्
madhyamasyottare navabhāge rājavāstukaṃ dhanuḥśatāyāmam ardhavistārampaścimārdhe tasyāntaḥpuram
- 3
अन्तर्वंशिकसैन्यं चान्ते निविशेत
antarvaṃśikasainyaṃ cānte niviśeta
- 4
पुरस्ताद् उपस्थानम्दक्षिणतः कोशशासनकार्यकरणानि वामतो राजोपवाह्यानां हस्त्यश्वरथानां स्थानम्
purastād upasthānamdakṣiṇataḥ kośaśāsanakāryakaraṇāni vāmato rājopavāhyānāṃ hastyaśvarathānāṃ sthānam
- 5
अतो धनुःशतान्तराश्चत्वारः शकटमेथीप्रततिस्तम्भसालपरिक्षेपाः
ato dhanuḥśatāntarāścatvāraḥ śakaṭamethīpratatistambhasālaparikṣepāḥ
- 6
प्रथमे पुरस्तान्मन्त्रिपुरोहितौ दक्षिणतः कोष्ठागारं महानसं च वामतः कुप्यायुधागारम्
prathame purastānmantripurohitau dakṣiṇataḥ koṣṭhāgāraṃ mahānasaṃ ca vāmataḥ kupyāyudhāgāram
- 7
द्वितीये मौलभृतानां स्थानम् अश्वरथानां सेनापतेश्च
dvitīye maulabhṛtānāṃ sthānam aśvarathānāṃ senāpateśca
- 8
तृतीये हस्तिनः श्रेण्यः प्रशास्ता च
tṛtīye hastinaḥ śreṇyaḥ praśāstā ca
- 9
चतुर्थे विष्टिर्नायको मित्रामित्राटवीबलं स्वपुरुषाधिष्ठितम्
caturthe viṣṭirnāyako mitrāmitrāṭavībalaṃ svapuruṣādhiṣṭhitam
- 10
वणिजो रूपाजीवाश्चानुमहापथम्
vaṇijo rūpājīvāścānumahāpatham
- 11
बाह्यतो लुब्धकश्वगणिनः सतूर्याग्नयः गूढाश्चारक्षाः
bāhyato lubdhakaśvagaṇinaḥ satūryāgnayaḥ gūḍhāścārakṣāḥ
- 12
शत्रूणाम् आपाते कूपकूटावपातकण्टकिनीश्च स्थापयेत्
śatrūṇām āpāte kūpakūṭāvapātakaṇṭakinīśca sthāpayet
- 13
अष्टादशवर्गाणाम् आरक्षविपर्यासं कारयेत्
aṣṭādaśavargāṇām ārakṣaviparyāsaṃ kārayet
- 14
दिवायामं च कारयेद् अपसर्पज्ञानार्थम्
divāyāmaṃ ca kārayed apasarpajñānārtham
- 15
विवादसौरिकसमाजद्यूतवारणं च कारयेन्मुद्रारक्षणं च
vivādasaurikasamājadyūtavāraṇaṃ ca kārayenmudrārakṣaṇaṃ ca
- 16
सेनानिवृत्तम् आयुधीयम् अशासनं शून्यपालो बध्नीयात्
senānivṛttam āyudhīyam aśāsanaṃ śūnyapālo badhnīyāt
- 17
पुरस्ताद् अध्वनः सम्यक्प्रशास्ता रक्षणानि च
यायाद्वर्धकिविष्टिभ्याम् उदकानि च कारयेत्
purastād adhvanaḥ samyakpraśāstā rakṣaṇāni ca
yāyādvardhakiviṣṭibhyām udakāni ca kārayet

