304 shlokas
- 1
यस्य ज्ञानदयासिन्धोर् अगाधस्यानघा गुणाः
सेव्यताम् अक्षयो धीराः स श्रिये चामृताय च
yasya jñānadayāsindhor agādhasyānaghā guṇāḥ
sevyatām akṣayo dhīrāḥ sa śriye cāmṛtāya ca
- 2
समाहृत्यान्यतन्त्राणि संक्षिप्तैः प्रतिसंस्कृतैः
सम्पूर्णम् उच्यते वर्गैर्नामलिङ्गानुशासनम्
samāhṛtyānyatantrāṇi saṃkṣiptaiḥ pratisaṃskṛtaiḥ
sampūrṇam ucyate vargairnāmaliṅgānuśāsanam
- 3
प्रायशो रूपभेदेन साहचर्याच्च कुत्रचित्
स्त्रीपुंनपुंसकं ज्ञेयं तद्विशेषविधेः क्वचित्
prāyaśo rūpabhedena sāhacaryācca kutracit
strīpuṃnapuṃsakaṃ jñeyaṃ tadviśeṣavidheḥ kvacit
- 4
भेदाख्यानाय न द्वंद्वो नैकशेषो न संकरः
कृतो ऽत्र भिन्नलिङ्गानाम् अनुक्तानां क्रमाद् ऋते
bhedākhyānāya na dvaṃdvo naikaśeṣo na saṃkaraḥ
kṛto 'tra bhinnaliṅgānām anuktānāṃ kramād ṛte
- 5
त्रिलिङ्ग्यां त्रिष्व् इति पदं मिथुने तु द्वयोरिति
निषिद्धलिङ्गं शेषार्थं त्वन्ताथादि न पूर्वभाक्
triliṅgyāṃ triṣv iti padaṃ mithune tu dvayoriti
niṣiddhaliṅgaṃ śeṣārthaṃ tvantāthādi na pūrvabhāk
- 6
स्वरव्ययं स्वर्गनाकत्रिदिवत्रिदशालयाः
सुरलोको द्योदिवौ द्वे स्त्रियां क्लीबे त्रिविष्टपम्
svaravyayaṃ svarganākatridivatridaśālayāḥ
suraloko dyodivau dve striyāṃ klībe triviṣṭapam
- 7
अमरा निर्जरा देवास्त्रिदशा विबुधाः सुराः
सुपर्वाणः सुमनसस्त्रिदिवेशा दिवौकसः
amarā nirjarā devāstridaśā vibudhāḥ surāḥ
suparvāṇaḥ sumanasastridiveśā divaukasaḥ
- 8
आदितेया दिविषदो लेखा अदितिनन्दनाः
आदित्या ऋभवो ऽस्वप्ना अमर्त्या अमृतान्धसः
āditeyā diviṣado lekhā aditinandanāḥ
ādityā ṛbhavo 'svapnā amartyā amṛtāndhasaḥ
- 9
बर्हिर्मुखाः ऋतुभुजो गीर्वाणा दानवारयः
वृन्दारका दैवतानि पुंसि वा देवताः स्त्रियाम्
barhirmukhāḥ ṛtubhujo gīrvāṇā dānavārayaḥ
vṛndārakā daivatāni puṃsi vā devatāḥ striyām
- 10
आदित्यविश्ववसवस्तुषिताभास्वरानिलाः
महाराजिकसाध्याश्च रुद्राश्च गणदेवताः
ādityaviśvavasavastuṣitābhāsvarānilāḥ
mahārājikasādhyāśca rudrāśca gaṇadevatāḥ
- 11
विद्याधराप्सरोयक्षरक्षोगन्धर्वकिंनराः
पिशाचो गुह्यकः सिद्धो भूतो ऽमी देवयोनयः
vidyādharāpsaroyakṣarakṣogandharvakiṃnarāḥ
piśāco guhyakaḥ siddho bhūto 'mī devayonayaḥ
- 12
असुरा दैत्यदैतेयदनुजेन्द्रारिदानवाः
शुक्रशिष्या दितिसुताः पूर्वदेवाः सुरद्विषः
asurā daityadaiteyadanujendrāridānavāḥ
śukraśiṣyā ditisutāḥ pūrvadevāḥ suradviṣaḥ
- 13
सर्वज्ञः सुगतः बुद्धो धर्मराजस्तथागतः
समन्तभद्रो भगवान्मारजिल्लोकजिज्जिनः
sarvajñaḥ sugataḥ buddho dharmarājastathāgataḥ
samantabhadro bhagavānmārajillokajijjinaḥ
- 14
षडभिज्ञो दशबलो ऽद्वयवादी विनायकः
मुनीन्द्रः श्रीघनः शास्ता मुनिः शाक्यमुनिस्तु यः
ṣaḍabhijño daśabalo 'dvayavādī vināyakaḥ
munīndraḥ śrīghanaḥ śāstā muniḥ śākyamunistu yaḥ
- 15
स शाक्यसिंहः सर्वार्थसिद्धः शौद्धोदनिश्च सः
गौतमश्चार्कबन्धुश्च मायादेवीसुतश्च सः
sa śākyasiṃhaḥ sarvārthasiddhaḥ śauddhodaniśca saḥ
gautamaścārkabandhuśca māyādevīsutaśca saḥ
- 16
ब्रह्मात्मभूः सुरज्येष्ठः परमेष्ठी पितामहः
हिरण्यगर्भो लोकेशः स्वयंभूश्चतुराननः
brahmātmabhūḥ surajyeṣṭhaḥ parameṣṭhī pitāmahaḥ
hiraṇyagarbho lokeśaḥ svayaṃbhūścaturānanaḥ
- 17
धाताब्जयोनिर्द्रुहिणो विरिञ्चिः कमलासनः
स्रष्टा प्रजापतिर्वेधा विधाता विश्वसृग्विधिः
dhātābjayonirdruhiṇo viriñciḥ kamalāsanaḥ
sraṣṭā prajāpatirvedhā vidhātā viśvasṛgvidhiḥ
- 18
नाभिजन्माण्डजः पूर्वो निधनः कमलोद्भवः
सदानन्दो रजोमूर्तिः सत्यको हंसवाहनः
nābhijanmāṇḍajaḥ pūrvo nidhanaḥ kamalodbhavaḥ
sadānando rajomūrtiḥ satyako haṃsavāhanaḥ
- 19
विष्णुर्नारायणः कृष्णो वैकुण्ठो विष्टरश्रवाः
दामोदरो हृषीकेशः केशवो माधवः स्वभूः
viṣṇurnārāyaṇaḥ kṛṣṇo vaikuṇṭho viṣṭaraśravāḥ
dāmodaro hṛṣīkeśaḥ keśavo mādhavaḥ svabhūḥ
- 20
दैत्यारिः पुण्डरीकाक्षो गोविन्दो गरुडध्वजः
पीताम्बरो ऽच्युतः शार्ङ्गी विष्वक्सेनो जनार्दनः
daityāriḥ puṇḍarīkākṣo govindo garuḍadhvajaḥ
pītāmbaro 'cyutaḥ śārṅgī viṣvakseno janārdanaḥ
- 21
उपेन्द्र इन्द्रावरजश्चक्रपाणिश्चतुर्भुजः
पद्मनाभो मधुरिपुर्वासुदेवस्त्रिविक्रमः
upendra indrāvarajaścakrapāṇiścaturbhujaḥ
padmanābho madhuripurvāsudevastrivikramaḥ
- 22
देवकीनन्दनः शौरिः श्रीपतिः पुरुषोत्तमः
वनमाली बलिध्वंसी कंसारातिर् अधोक्षजः
devakīnandanaḥ śauriḥ śrīpatiḥ puruṣottamaḥ
vanamālī balidhvaṃsī kaṃsārātir adhokṣajaḥ
- 23
विश्वम्भरः कैटभजिद्विधुः श्रीवत्सलाञ्छनः
पुराणपुरुषो यज्ञपुरुषो नरकान्तकः
viśvambharaḥ kaiṭabhajidvidhuḥ śrīvatsalāñchanaḥ
purāṇapuruṣo yajñapuruṣo narakāntakaḥ
- 24
जलशायी विश्वरूपो मुकुन्दो मुरमर्दनः
वसुदेवो ऽस्य जनकः स एवानकदुन्दुभिः
jalaśāyī viśvarūpo mukundo muramardanaḥ
vasudevo 'sya janakaḥ sa evānakadundubhiḥ
- 25
बलभद्रः प्रलम्बघ्नो बलदेवो ऽच्युताग्रजः
रेवतीरमणो रामः कामपालो हलायुधः
balabhadraḥ pralambaghno baladevo 'cyutāgrajaḥ
revatīramaṇo rāmaḥ kāmapālo halāyudhaḥ
- 26
नीलाम्बरो रौहिणेयस्तालाङ्को मुसली हली
संकर्षणः सीरपाणिः कालिन्दीभेदनो बलः
nīlāmbaro rauhiṇeyastālāṅko musalī halī
saṃkarṣaṇaḥ sīrapāṇiḥ kālindībhedano balaḥ
- 27
मदनो मन्मथो मारः प्रद्युम्नो मीनकेतनः
कन्दर्पो दर्पको ऽनङ्गः कामः पञ्चशरः स्मरः
madano manmatho māraḥ pradyumno mīnaketanaḥ
kandarpo darpako 'naṅgaḥ kāmaḥ pañcaśaraḥ smaraḥ
- 28
शम्बरारिर्मनसिजः कुसुमेषुरनन्यजः
पुष्पधन्वा रतिपतिर्मकरध्वज आत्मभूः
śambarārirmanasijaḥ kusumeṣurananyajaḥ
puṣpadhanvā ratipatirmakaradhvaja ātmabhūḥ
- 29
अरविन्दमशोकं च चूतं च नवमल्लिका
नीलोत्पलं च पञ्चैते पञ्चबाणस्य सायकाः
aravindamaśokaṃ ca cūtaṃ ca navamallikā
nīlotpalaṃ ca pañcaite pañcabāṇasya sāyakāḥ
- 30
उन्मादनस्तापनश्च शोषणः स्तम्भनस्तथा
सम्मोहनश्च कामश्च पञ्च बाणाः प्रकीर्तिताः
unmādanastāpanaśca śoṣaṇaḥ stambhanastathā
sammohanaśca kāmaśca pañca bāṇāḥ prakīrtitāḥ

