20 shlokas
- 1
तत्र हिंसा तावत्कृता कारितानुमोदितेति त्रिधा
tatra hiṃsā tāvatkṛtā kāritānumoditeti tridhā
- 2
एकैका पुनस्त्रिधा
ekaikā punastridhā
- 3
लोभेन मांसचर्मार्थेन क्रोधेनापकृतम् अनेनेति मोहेन धर्मो मे भविष्यतीति
lobhena māṃsacarmārthena krodhenāpakṛtam aneneti mohena dharmo me bhaviṣyatīti
- 4
लोभक्रोधमोहाः पुनस्त्रिविधा मृदुमध्याधिमात्रा इति
lobhakrodhamohāḥ punastrividhā mṛdumadhyādhimātrā iti
- 5
एवं सप्तविंशतिर्भेदा भवन्ति हिंसायाः
evaṃ saptaviṃśatirbhedā bhavanti hiṃsāyāḥ
- 6
मृदुमध्याधिमात्राः पुनस्त्रिविधाः
mṛdumadhyādhimātrāḥ punastrividhāḥ
- 7
मृदुमृदुर्मध्यमृदुस्तीव्रमृदुर् इति
mṛdumṛdurmadhyamṛdustīvramṛdur iti
- 8
तथा मृदुमध्यो मध्यमध्यस्तीव्रमध्य इति
tathā mṛdumadhyo madhyamadhyastīvramadhya iti
- 9
तथा मृदुतीव्रो मध्यतीव्रो ऽधिमात्रतीव्र इति
tathā mṛdutīvro madhyatīvro 'dhimātratīvra iti
- 10
एवम् एकाशीतिभेदा हिंसा भवति
evam ekāśītibhedā hiṃsā bhavati
- 11
सा पुनर्नियमविकल्पसमुच्चयभेदाद् असंख्येया प्राणभृद्भेदस्यापरिसंख्येयत्वाद् इति
sā punarniyamavikalpasamuccayabhedād asaṃkhyeyā prāṇabhṛdbhedasyāparisaṃkhyeyatvād iti
- 12
एवम् अनृतादिष्व् अपि योज्यम्
evam anṛtādiṣv api yojyam
- 13
ते खल्वमी वितर्का दुःखाज्ञानानन्तफला इति प्रतिपक्षभावनम्
te khalvamī vitarkā duḥkhājñānānantaphalā iti pratipakṣabhāvanam
- 14
दुःखम् अज्ञानं चानन्तं फलं येषाम् इति प्रतिपक्षभावनम्
duḥkham ajñānaṃ cānantaṃ phalaṃ yeṣām iti pratipakṣabhāvanam
- 15
तथा च हिंसकस्तावत्प्रथमं वध्यस्य वीर्यम् आक्षिपति ततश्च शस्त्रादिनिपातेन दुःखयति ततो जीविताद् अपि मोचयति ततो वीर्याक्षेपाद् अस्य चेतनाचेतनम् उपकरणं क्षीणवीर्यं भवति दुःखोत्पादान्नरकतिर्यक्प्रेतादिषु दुःखम् अनुभवति जीवितव्यपरोपणात्प्रतिक्षणं च जीवितात्यये वर्तमानो मरणम् इच्छन्न् अपि दुःखविपाकस्य नियतविपाकवेदनीयत्वात्कथंचिद् एवोच्छ्वसति
tathā ca hiṃsakastāvatprathamaṃ vadhyasya vīryam ākṣipati tataśca śastrādinipātena duḥkhayati tato jīvitād api mocayati tato vīryākṣepād asya cetanācetanam upakaraṇaṃ kṣīṇavīryaṃ bhavati duḥkhotpādānnarakatiryakpretādiṣu duḥkham anubhavati jīvitavyaparopaṇātpratikṣaṇaṃ ca jīvitātyaye vartamāno maraṇam icchann api duḥkhavipākasya niyatavipākavedanīyatvātkathaṃcid evocchvasati
- 16
यदि च कथंचित्पुण्यावापगता हिंसा भवेत्तत्र सुखप्राप्तौ भवेद् अल्पायुर् इति
yadi ca kathaṃcitpuṇyāvāpagatā hiṃsā bhavettatra sukhaprāptau bhaved alpāyur iti
- 17
एवम् अनृतादिष्व् अपि योज्यं यथासंभवम्
evam anṛtādiṣv api yojyaṃ yathāsaṃbhavam
- 18
एवं वितर्काणां चामुम् एवानुगतं विपाकम् अनिष्टं भावयन्न वितर्केषु मनः प्रणिदधीत
evaṃ vitarkāṇāṃ cāmum evānugataṃ vipākam aniṣṭaṃ bhāvayanna vitarkeṣu manaḥ praṇidadhīta
- 19
प्रतिपक्षभावनाहेतोर्हेया वितर्का यदास्य स्युर् अप्रसवधर्माणस्तदा तत्कृतम् ऐश्वर्यं योगिनः सिद्धिसूचकं भवति
pratipakṣabhāvanāhetorheyā vitarkā yadāsya syur aprasavadharmāṇastadā tatkṛtam aiśvaryaṃ yoginaḥ siddhisūcakaṃ bhavati
- 20
तद्यथा
tadyathā

