Sanskrit

Vaitana Sutra · 3.14 3.14.1

3.14.1

यत्ते ग्रावा बाहुच्युतो अचुच्योन्नरो यद्वा ते हस्तयोर् अधुक्षन्

तत्त आप्यायतां तत्ते निष्ट्यायतां सोम राजन्

यत्ते ग्राव्णा चिछिदुः सोम राजन्प्रियाण्य् अङ्गा सुकृता पुरूणि

तत्संधत्स्वाज्येनोत वर्धयस्वानागसो यथा सदम् इत्संक्षियेम

यां ते त्वचं बिभिदुर्यां च योनिं यद्वा स्थानात्प्रच्युतो यदि वासुतो ऽसि

त्वया सोम कॢप्तम् अस्माकम् एतद् उप नो राजन्सुकृते ह्वयस्व

सं प्राणापानाभ्यां सम् उ चक्षुषा सं श्रोत्रेण गच्छस्व सोम राजन्

यत्ते विरिष्टं सम् उ तत्त एतज्जानीतान्नः संगमने पथीनाम्

अहाः शरीरं पयसा समेत्य् अन्यो अन्यो भवति वर्णो अस्य

तस्मै त इन्दो हविषा विधेम वयं स्याम पतयो रयीणाम्

अभिक्षरन्ति जुह्वो घृतेनाङ्गा परूंषि तव वर्धयन्ति

तस्मै ते सोम नम इद्वषट्चोप नो राजन्सुकृते ह्वयस्व

Transliteration

yatte grāvā bāhucyuto acucyonnaro yadvā te hastayor adhukṣan

tatta āpyāyatāṃ tatte niṣṭyāyatāṃ soma rājan

yatte grāvṇā cichiduḥ soma rājanpriyāṇy aṅgā sukṛtā purūṇi

tatsaṃdhatsvājyenota vardhayasvānāgaso yathā sadam itsaṃkṣiyema

yāṃ te tvacaṃ bibhiduryāṃ ca yoniṃ yadvā sthānātpracyuto yadi vāsuto 'si

tvayā soma kḷptam asmākam etad upa no rājansukṛte hvayasva

saṃ prāṇāpānābhyāṃ sam u cakṣuṣā saṃ śrotreṇa gacchasva soma rājan

yatte viriṣṭaṃ sam u tatta etajjānītānnaḥ saṃgamane pathīnām

ahāḥ śarīraṃ payasā samety anyo anyo bhavati varṇo asya

tasmai ta indo haviṣā vidhema vayaṃ syāma patayo rayīṇām

abhikṣaranti juhvo ghṛtenāṅgā parūṃṣi tava vardhayanti

tasmai te soma nama idvaṣaṭcopa no rājansukṛte hvayasva

By System Admin

Translation

Draft in progress