15 shlokas
- 1
अग्निर्वा अकामयत
अन्नादो देवानां स्याम् इति
स एतम् अग्नये कृत्तिकाभ्यः पुरोडाशम् अष्टाकपालं निरवपत्
ततो वै सो ऽन्नादो देवानाम् अभवत्
अग्निर्वै देवानाम् अन्नादः
यथा ह वा अग्निर्देवानाम् अन्नादः
एवं ह वा एष मनुष्याणां भवति
य एतेन हविषा यजते
य उ चैनद् एवं वेद
सो ऽत्र जुहोति
अग्नये स्वाहा कृत्तिकाभ्यः स्वाहा
अम्बायै स्वाहा दुलायै स्वाहा
नितत्न्यै स्वाहाभ्रयन्त्यै स्वाहा
मेघयन्त्यै स्वाहा वर्षयन्त्यै स्वाहा
चुपुणीकायै स्वाहेति
agnirvā akāmayata
annādo devānāṃ syām iti
sa etam agnaye kṛttikābhyaḥ puroḍāśam aṣṭākapālaṃ niravapat
tato vai so 'nnādo devānām abhavat
agnirvai devānām annādaḥ
yathā ha vā agnirdevānām annādaḥ
evaṃ ha vā eṣa manuṣyāṇāṃ bhavati
ya etena haviṣā yajate
ya u cainad evaṃ veda
so 'tra juhoti
agnaye svāhā kṛttikābhyaḥ svāhā
ambāyai svāhā dulāyai svāhā
nitatnyai svāhābhrayantyai svāhā
meghayantyai svāhā varṣayantyai svāhā
cupuṇīkāyai svāheti
- 2
प्रजापतिः प्रजा असृजत
ता अस्मात्सृष्टाः पराचीर् आयन्
तासां रोहिणीम् अभ्यध्यायत्
सो ऽकामयत
उप मावर्तेत
सम् एनया गच्छेयेति
स एतं प्रजापतये रोहिण्यै चरुं निरवपत्
ततो वै सा तम् उपावर्तत
सम् एनयागच्छत
उप ह वा एनं प्रियम् आवर्तते
सं प्रियेण गच्छते
य एतेन हविषा यजते
य उ चैनद् एवं वेद
सो ऽत्र जुहोति
प्रजापतये स्वाहा रोहिण्यै स्वाहा रोचमानायै स्वाहा प्रजाभ्यः स्वाहेति
prajāpatiḥ prajā asṛjata
tā asmātsṛṣṭāḥ parācīr āyan
tāsāṃ rohiṇīm abhyadhyāyat
so 'kāmayata
upa māvarteta
sam enayā gaccheyeti
sa etaṃ prajāpataye rohiṇyai caruṃ niravapat
tato vai sā tam upāvartata
sam enayāgacchata
upa ha vā enaṃ priyam āvartate
saṃ priyeṇa gacchate
ya etena haviṣā yajate
ya u cainad evaṃ veda
so 'tra juhoti
prajāpataye svāhā rohiṇyai svāhā rocamānāyai svāhā prajābhyaḥ svāheti
- 3
सोमो वा अकामयत
ओषधीनां राज्यम् अभिजयेयम् इति
स एतं सोमाय मृगशीर्षाय श्यामाकं चरुं पयसि निरवपत्
ततो वै स ओषधीनां राज्यम् अभ्यजयत्
समानानां ह वै राज्यम् अभिजयति
य एतेन हविषा यजते
य उ चैनद् एवं वेद
सो ऽत्र जुहोति
सोमाय स्वाहा मृगशीर्षाय स्वाहा
इन्वकाभ्यः स्वाहौषधीभ्यः स्वाहा
राज्याय स्वाहाभिजित्यै स्वाहेति
somo vā akāmayata
oṣadhīnāṃ rājyam abhijayeyam iti
sa etaṃ somāya mṛgaśīrṣāya śyāmākaṃ caruṃ payasi niravapat
tato vai sa oṣadhīnāṃ rājyam abhyajayat
samānānāṃ ha vai rājyam abhijayati
ya etena haviṣā yajate
ya u cainad evaṃ veda
so 'tra juhoti
somāya svāhā mṛgaśīrṣāya svāhā
invakābhyaḥ svāhauṣadhībhyaḥ svāhā
rājyāya svāhābhijityai svāheti
- 4
रुद्रो वा अकामयत
पशुमान्त्स्याम् इति
स एतं रुद्रायार्द्रायै प्रैयंगवं चरुं पयसि निरवपत्
ततो वै स पशुमान् अभवत्
पशुमान्ह वै भवति
य एतेन हविषा यजते
य उ चैनद् एवं वेद
सो ऽत्र जुहोति
रुद्राय स्वाहार्द्रायै स्वाहा
पिन्वमानायै स्वाहा पशुभ्यः स्वाहेति
rudro vā akāmayata
paśumāntsyām iti
sa etaṃ rudrāyārdrāyai praiyaṃgavaṃ caruṃ payasi niravapat
tato vai sa paśumān abhavat
paśumānha vai bhavati
ya etena haviṣā yajate
ya u cainad evaṃ veda
so 'tra juhoti
rudrāya svāhārdrāyai svāhā
pinvamānāyai svāhā paśubhyaḥ svāheti
- 5
ऋक्षा वा इयम् अलोमकासीत्
साकामयत
ओषधीभिर्वनस्पतिभिः प्रजायेयेति
सैतम् अदित्यै पुनर्वसुभ्यां चरुं निरवपत्
ततो वा इयम् ओषधीभिर्वनस्पतिभिः प्राजायत
प्रजायते ह वै प्रजया पशुभिः
य एतेन हविषा यजते
य उ चैनद् एवं वेद
सो ऽत्र जुहोति अदित्यै स्वाहा पुनर्वसुभ्याम्स्वाहा भूत्यै स्वाहा प्रजात्यै स्वाहेति
ṛkṣā vā iyam alomakāsīt
sākāmayata
oṣadhībhirvanaspatibhiḥ prajāyeyeti
saitam adityai punarvasubhyāṃ caruṃ niravapat
tato vā iyam oṣadhībhirvanaspatibhiḥ prājāyata
prajāyate ha vai prajayā paśubhiḥ
ya etena haviṣā yajate
ya u cainad evaṃ veda
so 'tra juhoti adityai svāhā punarvasubhyāmsvāhā bhūtyai svāhā prajātyai svāheti
- 6
बृहस्पतिर्वा अकामयत
ब्रह्मवर्चसी स्याम् इति
स एतं बृहस्पतये तिष्याय नैवारं चरुं पयसि निरवपत्
ततो वै स ब्रह्मवर्चस्य् अभवत्
ब्रह्मवर्चसी ह वै भवति
य एतेन हविषा यजते
य उ चैनद् एवं वेद
सो ऽत्र जुहोति
बृहस्पतये स्वाहा तिष्याय स्वाहा
ब्रह्मवर्चसाय स्वाहेति
bṛhaspatirvā akāmayata
brahmavarcasī syām iti
sa etaṃ bṛhaspataye tiṣyāya naivāraṃ caruṃ payasi niravapat
tato vai sa brahmavarcasy abhavat
brahmavarcasī ha vai bhavati
ya etena haviṣā yajate
ya u cainad evaṃ veda
so 'tra juhoti
bṛhaspataye svāhā tiṣyāya svāhā
brahmavarcasāya svāheti
- 7
देवासुराः संयत्ता आसन्
ते देवाः सर्पेभ्य आश्रेषाभ्य आज्ये करम्भं निरवपन्
तान् एताभिर् एव देवताभिर् उपानयन्
एताभिर्ह वै देवताभिर्द्विषन्तं भ्रातृव्यम् उपनयति
य एतेन हविषा यजते
य उ चैनद् एवं वेद
सो ऽत्र जुहोति
सर्पेभ्यः स्वाहाश्रेषाभ्यः स्वाहा
दन्दशूकेभ्यः स्वाहेति
devāsurāḥ saṃyattā āsan
te devāḥ sarpebhya āśreṣābhya ājye karambhaṃ niravapan
tān etābhir eva devatābhir upānayan
etābhirha vai devatābhirdviṣantaṃ bhrātṛvyam upanayati
ya etena haviṣā yajate
ya u cainad evaṃ veda
so 'tra juhoti
sarpebhyaḥ svāhāśreṣābhyaḥ svāhā
dandaśūkebhyaḥ svāheti
- 8
पितरो वा अकामयन्त
पितृलोक ऋध्नुयामेति
त एतं पितृभ्यो मघाभ्यः पुरोडाशं षट्कपालं निरवपन्
ततो वै ते पितृलोक आर्ध्नुवन्
पितृलोके ह वा ऋध्नोति
य एतेन हविषा यजते
य उ चैनद् एवं वेद
सो ऽत्र जुहोति
पितृभ्यः स्वाहा मघाभ्यः स्वाहानघाभ्यः स्वाहागदाभ्यः स्वाहारुन्धतीभ्यः स्वाहेति
pitaro vā akāmayanta
pitṛloka ṛdhnuyāmeti
ta etaṃ pitṛbhyo maghābhyaḥ puroḍāśaṃ ṣaṭkapālaṃ niravapan
tato vai te pitṛloka ārdhnuvan
pitṛloke ha vā ṛdhnoti
ya etena haviṣā yajate
ya u cainad evaṃ veda
so 'tra juhoti
pitṛbhyaḥ svāhā maghābhyaḥ svāhānaghābhyaḥ svāhāgadābhyaḥ svāhārundhatībhyaḥ svāheti
- 9
अर्यमा वा अकामयत
पशुमान्त्स्याम् इति
स एतम् अर्यम्णे फल्गुनीभ्यां चरुं निरवपत्
ततो वै स पशुमान् अभवत्
पशुमान्ह वै भवति
य एतेन हविषा यजते
य उ चैनद् एवं वेद
सो ऽत्र जुहोति
अर्यम्णे स्वाहा फल्गुनीभ्यां स्वाहा
पशुभ्यः स्वाहेति
aryamā vā akāmayata
paśumāntsyām iti
sa etam aryamṇe phalgunībhyāṃ caruṃ niravapat
tato vai sa paśumān abhavat
paśumānha vai bhavati
ya etena haviṣā yajate
ya u cainad evaṃ veda
so 'tra juhoti
aryamṇe svāhā phalgunībhyāṃ svāhā
paśubhyaḥ svāheti
- 10
भगो वा अकामयत
भगी श्रेष्ठी देवानां स्याम् इति
स एतं भगाय फल्गुनीभ्यां चरुं निरवपत्
ततो वै स भगी श्रेष्ठी देवानाम् अभवत्
भगी ह वै श्रेष्ठी समानानां भवति
य एतेन हविषा यजते
य उ चैनद् एवं वेद
सो ऽत्र जुहोति
भगाय स्वाहा फल्गुनीभ्यां स्वाहा
श्रैष्ठ्याय स्वाहेति
bhago vā akāmayata
bhagī śreṣṭhī devānāṃ syām iti
sa etaṃ bhagāya phalgunībhyāṃ caruṃ niravapat
tato vai sa bhagī śreṣṭhī devānām abhavat
bhagī ha vai śreṣṭhī samānānāṃ bhavati
ya etena haviṣā yajate
ya u cainad evaṃ veda
so 'tra juhoti
bhagāya svāhā phalgunībhyāṃ svāhā
śraiṣṭhyāya svāheti
- 11
सविता वा अकामयत श्रन्मे देवा दधीरन्
सविता स्याम् इति
स एतं सवित्रे हस्ताय पुरोडाशं द्वादशकपालं निरवपद् आशूनां व्रीहीणाम्
ततो वै तस्मै श्रद्देवा अदधत
सविताभवत्
श्रद्ध वा अस्मै मनुष्या दधते
सविता समानानां भवति
य एतेन हविषा यजते
य उ चैनद् एवं वेद
सो ऽत्र जुहोति
सवित्रे स्वाहा हस्ताय स्वाहा ददते स्वाहा पृणते स्वाहा प्रयच्छते स्वाहा प्रतिगृभ्णते स्वाहेति
savitā vā akāmayata śranme devā dadhīran
savitā syām iti
sa etaṃ savitre hastāya puroḍāśaṃ dvādaśakapālaṃ niravapad āśūnāṃ vrīhīṇām
tato vai tasmai śraddevā adadhata
savitābhavat
śraddha vā asmai manuṣyā dadhate
savitā samānānāṃ bhavati
ya etena haviṣā yajate
ya u cainad evaṃ veda
so 'tra juhoti
savitre svāhā hastāya svāhā dadate svāhā pṛṇate svāhā prayacchate svāhā pratigṛbhṇate svāheti
- 12
त्वष्टा वा अकामयत
चित्रं प्रजां विन्देयेति
स एतं त्वष्ट्रे चित्रायै पुरोडाशम् अष्टाकपालं निरवपत्
ततो वै स चित्रं प्रजाम् अविन्दत
चित्रं ह वै प्रजां विन्दते
य एतेन हविषा यजते
य उ चैनद् एवं वेद
सो ऽत्र जुहोति
त्वष्ट्रे स्वाहा चित्रायै स्वाहा
चैत्राय स्वाहा प्रजायै स्वाहेति
tvaṣṭā vā akāmayata
citraṃ prajāṃ vindeyeti
sa etaṃ tvaṣṭre citrāyai puroḍāśam aṣṭākapālaṃ niravapat
tato vai sa citraṃ prajām avindata
citraṃ ha vai prajāṃ vindate
ya etena haviṣā yajate
ya u cainad evaṃ veda
so 'tra juhoti
tvaṣṭre svāhā citrāyai svāhā
caitrāya svāhā prajāyai svāheti
- 13
वायुर्वा अकामयत
कामचारम् एषु लोकेष्व् अभिजयेयम् इति
स एतद्वायवे निष्ट्यायै गृष्ट्यै दुग्धं पयो निरवपत्
ततो वै स कामचारम् एषु लोकेष्व् अभ्यजयत्
कामचारं ह वा एषु लोकेष्व् अभिजयति
य एतेन हविषा यजते
य उ चैनद् एवं वेद
सो ऽत्र जुहोति
वायवे स्वाहा निष्ट्यायै स्वाहा
कामचाराय स्वाहाभिजित्यै स्वाहेति
vāyurvā akāmayata
kāmacāram eṣu lokeṣv abhijayeyam iti
sa etadvāyave niṣṭyāyai gṛṣṭyai dugdhaṃ payo niravapat
tato vai sa kāmacāram eṣu lokeṣv abhyajayat
kāmacāraṃ ha vā eṣu lokeṣv abhijayati
ya etena haviṣā yajate
ya u cainad evaṃ veda
so 'tra juhoti
vāyave svāhā niṣṭyāyai svāhā
kāmacārāya svāhābhijityai svāheti
- 14
इन्द्राग्नी वा अकामयेताम्
श्रैष्ठ्यं देवानाम् अभिजयेवेति
ताव् एतम् इन्द्राग्निभ्यां विशाखाभ्यां पुरोडाशम् एकादशकपालं निरवपताम्ततो वै तौ श्रैष्ठ्यं देवानाम् अभ्यजयताम्
श्रैष्ठ्यं ह वै समानानाम् अभिजयति
य एतेन हविषा यजते
य उ चैनद् एवं वेद
सो ऽत्र जुहोति
इन्द्राग्निभ्यां स्वाहा विशाखाभ्यां स्वाहा
श्रैष्ठ्याय स्वाहाभिजित्यै स्वाहेति
indrāgnī vā akāmayetām
śraiṣṭhyaṃ devānām abhijayeveti
tāv etam indrāgnibhyāṃ viśākhābhyāṃ puroḍāśam ekādaśakapālaṃ niravapatāmtato vai tau śraiṣṭhyaṃ devānām abhyajayatām
śraiṣṭhyaṃ ha vai samānānām abhijayati
ya etena haviṣā yajate
ya u cainad evaṃ veda
so 'tra juhoti
indrāgnibhyāṃ svāhā viśākhābhyāṃ svāhā
śraiṣṭhyāya svāhābhijityai svāheti
- 15
अथैतत्पौर्णमास्या आज्यं निर्वपति
कामो वै पौर्णमासी
काम आज्यम्
कामेनैव कामं समर्धयति
क्षिप्रम् एनं स काम उपनमति
येन कामेन यजते
सो ऽत्र जुहोति
पौर्णमास्यै स्वाहा कामाय स्वाहा गत्यै स्वाहेति
athaitatpaurṇamāsyā ājyaṃ nirvapati
kāmo vai paurṇamāsī
kāma ājyam
kāmenaiva kāmaṃ samardhayati
kṣipram enaṃ sa kāma upanamati
yena kāmena yajate
so 'tra juhoti
paurṇamāsyai svāhā kāmāya svāhā gatyai svāheti

