ॐ देवासुराः संयत्ता आसन् । तेषामिन्द्रो न प्रत्यपद्यत । ते ह वसूनेव प्रातस्सवनेषु पुरोधाय व्यजिगीषन्त । ते ह नुन्नेषु नाराशंसेषु ऋषीणां यज्ञवास्त्वभ्यायन् हनिष्याम वा एतद्वो यद्देवान्न पराभावयिष्यथेति । ते ह बिभ्यत एव स्तोकानुदकल्पयन् विजेष्यध्वे वावैतानन्विति । ते ह तत एवार्तिमार्च्छंस्तानन्वितरान् पराभावयन् । ततो हेन्द्रोऽपश्यत् । स ह गायत्रीमेव प्रतिसंदिदेश । सा होवाच । बिभेमि वा एतदेतेभ्यो यथैतत्परावृतन्निति । स प्रणवमेवास्याः पुरोगमकरोदेष वाव ते गोप्यायेति । सा होवाच । यदेष पुरोगाः उदेष मे भागधेयी स्यादिति । स होवाच । न ह वावैष त्वद्भागधेयी भवति । महान्वा अस्य महिमा न ह वा महीयांसो भागकॢप्तिमप्याभजन्तीति । विश्वमिन्नु समन्वालभध्वमिति । सेनान्यास्तु प्रथमजानाप्याययिष्यसीत्योमिति होवाच । स होवाच यत्प्रथमं नाभ्यकीर्तयो नामग्राहमथ नानुवत्स्य इति । नामग्राहमेतेन सर्वमभिपद्यन्ते । सर्वं वा एष सर्वमश्नोतीति । अक्षरं वा एषः । तस्मादोमित्यनुजानन्ति । ओमिति प्रतिपद्यन्त ओमित्यभ्याददत ओमित्यभिनिधापयन्ति । तदेतदक्षरं जैत्रमभित्वरं सर्वाणि भूतान्यभ्यात्तं यदनेकमेकं नानावर्णं नानारूपं नानाशब्दं नानागन्धं नानारसं नानास्पर्शमिति । अथो खल्वाहुरिन्द्रो वाचैतदक्षरम् । सर्वाणि ह वा इमानि भूतान्येतदक्षरमन्वायत्तानि सर्वे वेदाः सर्वे यज्ञा इत्यथ खल्विन्द्रमन्वायत्तमिति ॥
Transliteration
oṃ devāsurāḥ saṃyattā āsan | teṣāmindro na pratyapadyata | te ha vasūneva prātassavaneṣu purodhāya vyajigīṣanta | te ha nunneṣu nārāśaṃseṣu ṛṣīṇāṃ yajñavāstvabhyāyan haniṣyāma vā etadvo yaddevānna parābhāvayiṣyatheti | te ha bibhyata eva stokānudakalpayan vijeṣyadhve vāvaitānanviti | te ha tata evārtimārcchaṃstānanvitarān parābhāvayan | tato hendro'paśyat | sa ha gāyatrīmeva pratisaṃdideśa | sā hovāca | bibhemi vā etadetebhyo yathaitatparāvṛtanniti | sa praṇavamevāsyāḥ purogamakarodeṣa vāva te gopyāyeti | sā hovāca | yadeṣa purogāḥ udeṣa me bhāgadheyī syāditi | sa hovāca | na ha vāvaiṣa tvadbhāgadheyī bhavati | mahānvā asya mahimā na ha vā mahīyāṃso bhāgakḷptimapyābhajantīti | viśvaminnu samanvālabhadhvamiti | senānyāstu prathamajānāpyāyayiṣyasītyomiti hovāca | sa hovāca yatprathamaṃ nābhyakīrtayo nāmagrāhamatha nānuvatsya iti | nāmagrāhametena sarvamabhipadyante | sarvaṃ vā eṣa sarvamaśnotīti | akṣaraṃ vā eṣaḥ | tasmādomityanujānanti | omiti pratipadyanta omityabhyādadata omityabhinidhāpayanti | tadetadakṣaraṃ jaitramabhitvaraṃ sarvāṇi bhūtānyabhyāttaṃ yadanekamekaṃ nānāvarṇaṃ nānārūpaṃ nānāśabdaṃ nānāgandhaṃ nānārasaṃ nānāsparśamiti | atho khalvāhurindro vācaitadakṣaram | sarvāṇi ha vā imāni bhūtānyetadakṣaramanvāyattāni sarve vedāḥ sarve yajñā ityatha khalvindramanvāyattamiti ||
By System Admin
Translation
Draft in progress