17 shlokas
- 1
युञ्जन्ति ब्रध्नमरुषं चरन्तमिति असौ वा आदित्यो ब्रध्नोऽरुषो ऽमुमेवास्मा आदित्यं युनक्ति स्वर्गस्य लोकस्य समष्ट्यै
yuñjanti bradhnamaruṣaṃ carantamiti asau vā ādityo bradhno'ruṣo 'mumevāsmā ādityaṃ yunakti svargasya lokasya samaṣṭyai
- 2
तदाहुः पराङ्वा एतस्माद्यज्ञ एति यस्य पशुरुपाकृतोऽन्यत्र वेदेरेतीत्य् एतं स्तोतरनेन पथा पुनरश्वमावर्तयासि न इति वायुर्वै स्तोता तमेवास्मा एतत्परस्ताद्दधाति तथा नात्येति
tadāhuḥ parāṅvā etasmādyajña eti yasya paśurupākṛto'nyatra vederetīty etaṃ stotaranena pathā punaraśvamāvartayāsi na iti vāyurvai stotā tamevāsmā etatparastāddadhāti tathā nātyeti
- 3
अप वा एतस्मात्तेज इन्द्रियम्पशवः श्रीः क्रामन्ति योऽश्वमेधेन यजते
apa vā etasmātteja indriyampaśavaḥ śrīḥ krāmanti yo'śvamedhena yajate
- 4
वसवस्त्वाञ्जन्तु गायत्रेण छन्दसेति महिष्यभ्यनक्ति तेजो वा आज्यं तेजो गायत्री तेजसी एवास्मिन्त्समीची दधाति
vasavastvāñjantu gāyatreṇa chandaseti mahiṣyabhyanakti tejo vā ājyaṃ tejo gāyatrī tejasī evāsmintsamīcī dadhāti
- 5
रुद्रास्त्वाञ्जन्तु त्रैष्टुभेन छन्दसेति वावाता तेजो वा आज्यम् इन्द्रियं त्रिष्टुप्तेजश्चैवास्मिन्निन्द्रियं च समीची दधाति
rudrāstvāñjantu traiṣṭubhena chandaseti vāvātā tejo vā ājyam indriyaṃ triṣṭuptejaścaivāsminnindriyaṃ ca samīcī dadhāti
- 6
आदित्यास्त्वाञ्जन्तु जागतेन छन्दसेति परिवृक्ता तेजो वा आज्यम्पशवो जगती तेजश्चैवास्मिन्पशूंश्च समीची दधाति
ādityāstvāñjantu jāgatena chandaseti parivṛktā tejo vā ājyampaśavo jagatī tejaścaivāsminpaśūṃśca samīcī dadhāti
- 7
पत्न्योऽभ्यञ्जन्ति श्रियै वा एतद्रूपं यत्पत्न्यः श्रियमेवास्मिंस्तद्दधति नास्मात्तेज इन्द्रियम्पशवः श्रीरपक्रामन्ति
patnyo'bhyañjanti śriyai vā etadrūpaṃ yatpatnyaḥ śriyamevāsmiṃstaddadhati nāsmātteja indriyampaśavaḥ śrīrapakrāmanti
- 8
यथा वै हविषोऽहुतस्य स्कन्देत् एवमेतत्पशो स्कन्दति यस्य निक्तस्य लोमानि शीयन्ते यत्काचानावयन्ति लोमान्येवास्य संभरन्ति हिरण्मया भवन्ति तस्योक्तं ब्राह्मणम् एकशतम् एकशतं काचानावयन्ति शतायुर्वै पुरुष आत्मैकशत आयुष्येवात्मन्प्रतितिष्ठति भूर्भुवः स्वरिति प्राजापत्याभिरावयन्ति प्राजापत्योऽश्वः स्वयैवैनं देवतया समर्धयन्ति लाजीञ्छाचीन्यव्ये गव्य इत्य् अतिरिक्तम् अन्नम् अश्वायोपावहरन्ति प्रजाम् इवान्नादीं कुरुत एतद् अन्नम् अत्त देवा एतद् अन्नम् अद्धि प्रजापत इति प्रजाम् एवान्नाद्येन समर्धयति
yathā vai haviṣo'hutasya skandet evametatpaśo skandati yasya niktasya lomāni śīyante yatkācānāvayanti lomānyevāsya saṃbharanti hiraṇmayā bhavanti tasyoktaṃ brāhmaṇam ekaśatam ekaśataṃ kācānāvayanti śatāyurvai puruṣa ātmaikaśata āyuṣyevātmanpratitiṣṭhati bhūrbhuvaḥ svariti prājāpatyābhirāvayanti prājāpatyo'śvaḥ svayaivainaṃ devatayā samardhayanti lājīñchācīnyavye gavya ity atiriktam annam aśvāyopāvaharanti prajām ivānnādīṃ kuruta etad annam atta devā etad annam addhi prajāpata iti prajām evānnādyena samardhayati
- 9
अप वा एतस्मात्तेजो ब्रह्मवर्चसं क्रामति योऽश्वमेधेन यजते होता च ब्रह्मा च ब्रह्मोद्यं वदत आग्नेयो वै होता बार्हस्पत्यो ब्रह्मा ब्रह्म बृहस्पतिस्तेजश्चैवास्मिन्ब्रह्मवर्चसं च समीची धत्तो यूपमभितो वदतो यजमानो वै यूपो यजमानमेवैतत्तेजसा च ब्रह्मवर्चसेन चोभयतः परिधत्तः
apa vā etasmāttejo brahmavarcasaṃ krāmati yo'śvamedhena yajate hotā ca brahmā ca brahmodyaṃ vadata āgneyo vai hotā bārhaspatyo brahmā brahma bṛhaspatistejaścaivāsminbrahmavarcasaṃ ca samīcī dhatto yūpamabhito vadato yajamāno vai yūpo yajamānamevaitattejasā ca brahmavarcasena cobhayataḥ paridhattaḥ
- 10
कः स्विदेकाकी चरतीति असौ वा आदित्य एकाकी चरत्य् एष ब्रह्मवर्चसम्ब्रह्मवर्चसमेवास्मिंस्तद्धत्तः
kaḥ svidekākī caratīti asau vā āditya ekākī caraty eṣa brahmavarcasambrahmavarcasamevāsmiṃstaddhattaḥ
- 11
क उ स्विज्जायते पुनरिति चन्द्रमा वै जायते पुनरायुरेवास्मिंस्तद्धत्तः
ka u svijjāyate punariti candramā vai jāyate punarāyurevāsmiṃstaddhattaḥ
- 12
किं स्विद्धिमस्य भेषजमिति अग्निर्वै हिमस्य भेषजं तेज एवास्मिंस्तद्धत्तः
kiṃ sviddhimasya bheṣajamiti agnirvai himasya bheṣajaṃ teja evāsmiṃstaddhattaḥ
- 13
किम्वावपनम्महदिति अयं वै लोक आवपनम्महदस्मिन्नेव लोके प्रतितिष्ठति
kimvāvapanammahaditi ayaṃ vai loka āvapanammahadasminneva loke pratitiṣṭhati
- 14
का स्विदासीत्पूर्वचित्तिरिति द्यौर्वै वृष्टिः पूर्वचित्तिर्दिवमेव वृष्टिमवरुन्द्धे
kā svidāsītpūrvacittiriti dyaurvai vṛṣṭiḥ pūrvacittirdivameva vṛṣṭimavarunddhe
- 15
किं स्विदासीद्बृहद्वय इति अश्वो वै बृहद्वय आयुरेवावरुन्द्धे
kiṃ svidāsīdbṛhadvaya iti aśvo vai bṛhadvaya āyurevāvarunddhe
- 16
का स्विदासीत्पिलिप्पिलेति श्रीर्वै पिलिप्पिला श्रियमेवावरुन्द्धे
kā svidāsītpilippileti śrīrvai pilippilā śriyamevāvarunddhe
- 17
का स्विदासीत्पिशंगिलेति अहोरात्रे वै पिशंगिले अहोरात्रयोरेव प्रतितिष्ठति
kā svidāsītpiśaṃgileti ahorātre vai piśaṃgile ahorātrayoreva pratitiṣṭhati

