10 shlokas
- 1
आत्मकृतस्यैनसो ऽवयजनम् असि मनुष्यकृतस्यैनसो ऽवयजनम् असि पितृकृतस्यैनसो ऽवयजनम् असि देवकृतस्यैनसो ऽवयजनम् असि यच्चाहम् एनो विद्वांश्चकार यच्चाविद्वांस्तस्य सर्वस्यावयजनम् असीति
ātmakṛtasyainaso 'vayajanam asi manuṣyakṛtasyainaso 'vayajanam asi pitṛkṛtasyainaso 'vayajanam asi devakṛtasyainaso 'vayajanam asi yaccāham eno vidvāṃścakāra yaccāvidvāṃstasya sarvasyāvayajanam asīti
- 2
सव्यावृत उत्तरेणाहवनीयम् अप्सु सोमान्यथाचमसं पश्चाद् उपोपविश्य पवित्राण्य् अवधाय चेष्टयन्ते
सम् आपो अद्भिर् अग्मत सम् ओषधयो रसेन
सं रेवतीर्जगतीभिः पृच्यन्तां स्म मधुमतीर्मधुमतीभिः पृच्यन्ताम् इति
savyāvṛta uttareṇāhavanīyam apsu somānyathācamasaṃ paścād upopaviśya pavitrāṇy avadhāya ceṣṭayante
sam āpo adbhir agmata sam oṣadhayo rasena
saṃ revatīrjagatībhiḥ pṛcyantāṃ sma madhumatīrmadhumatībhiḥ pṛcyantām iti
- 3
समुपहूताः स्म इति
samupahūtāḥ sma iti
- 4
अप्सु धूतस्य देव सोम ते मतिविदो यो ऽश्वसनिर्गोसनिर्भक्षस्तस्य त उपहूतस्योपहूतो भक्षयामीति प्राणभक्षान्भक्षयित्वा
apsu dhūtasya deva soma te mativido yo 'śvasanirgosanirbhakṣastasya ta upahūtasyopahūto bhakṣayāmīti prāṇabhakṣānbhakṣayitvā
- 5
अच्छायं वो ययोर् ओजसेति प्राचीर्निनीयोदीचीर्वा
acchāyaṃ vo yayor ojaseti prācīrninīyodīcīrvā
- 6
समुद्रं व इत्य् अभिमन्त्र्य
samudraṃ va ity abhimantrya
- 7
शंनोदेवीयाभिश्चतसृभिर् उरो ऽभिमृश्य
śaṃnodevīyābhiścatasṛbhir uro 'bhimṛśya
- 8
समानं प्राणसंमर्शनं मुखविमार्जनं च
samānaṃ prāṇasaṃmarśanaṃ mukhavimārjanaṃ ca
- 9
दक्षिणावृत आग्नीध्रीये दधि प्राश्य यथा दधिभक्षम्
dakṣiṇāvṛta āgnīdhrīye dadhi prāśya yathā dadhibhakṣam
- 10
पत्नीसंयाजान्संस्थाप्य हुतेषु समिष्टयजुःषु अवभृथम् अवैति
patnīsaṃyājānsaṃsthāpya huteṣu samiṣṭayajuḥṣu avabhṛtham avaiti

