Sanskrit

भेदानां विशेषाणां महदादीनां भूतान्तानां कारणं मूलकारणम् अस्त्यव्यक्तम्

कुतः

कारणकार्यविभागाद् अविभागाद्वैश्वरूप्यस्य

कारणे सत्कार्यम् इति स्थितम्

तथा च यथा कूर्मशरीरे सन्त्येवाङ्गानि निश्चरन्ति विभज्यन्त इदं कूर्मस्य शरीरम् एतान्येतस्याङ्गानीत्येवं निविशमानानि तस्मिन्न् अव्यक्तीभवन्त्येवं मृत्पिण्डाद्धेमपिण्डाद्वा कार्याणि कुटकटकादीनि सन्त्येवाविर्भवन्ति विभज्यन्ते सन्त्येव पृथिव्यादीनि कारणात्तन्मात्राद् आविर्भवन्ति विभज्यन्ते सन्त्येव तन्मात्राण्यहंकारात्कारणात्सन्न् एवाहंकारः कारणान्महतः सन्न् एव च महान्परमाव्यक्ताद् इति

सो ऽयं कारणात्परमाव्यक्तात्साक्षात्पारंपर्येणान्वितस्य विश्वस्य कार्यस्य विभागः

प्रतिसर्गे मृत्पिण्डं हेमपिण्डं वा कुटकटकादयो निर्विशन्तो ऽव्यक्तीभवन्ति तत्कारणरूपम् एवानभिव्यक्तं कार्यम् अपेक्ष्याव्यक्तं भवति

एवं पृथिव्यादयस्तन्मात्राणि विशन्तः स्वापेक्षया तन्मात्राण्य् अव्यक्तयन्त्य् एवं तन्मात्राण्यहंकारं विशन्त्यहंकारम् अव्यक्तयन्त्येवम् अहंकारो महान्तम् आविशन्महान्तम् अव्यक्तयति महान्स्वं कारणं विशन्प्रकृतिम् अव्यक्तयति

प्रकृतेस्तु न क्वचिन्निवेश इति सा सर्वकार्याणाम् अव्यक्तम् एव

सो ऽयम् अविभागः प्रकृतौ वैश्वरूप्यस्य नानारूपस्य कार्यस्य

स्वार्थिकः ष्यञ्

तस्मात्कारणे कार्यस्य सत एव विभागाविभागाभ्याम् अव्यक्तं कारणम् अस्तीति

इतश्चाव्यक्तम् अस्तीत्याह शक्तितः प्रवृत्तेश्च

कारणशक्तितः कार्यं प्रवर्तत इति सिद्धम्

अशक्तात्कारणात्कार्यस्यानुत्पत्तेः

न हि सत्कार्यपक्षे कार्यस्याव्यक्तताया अन्यस्यां शक्तावस्ति प्रमाणम्

अयम् एव हि सिकताभ्यस्तिलानां तैलोत्पादकानां भेदो यद् एतेष्वेव तैलम् अस्त्यनागतावस्थं न सिकतास्विति

स्याद् एतत्

शक्तितः प्रवृत्तिः कारणकार्यविभागाविभागौ च महत एव परमाव्यक्तत्वं साधयिष्यत इति कृतं ततः परेणाव्यक्तेनेति

अत आह परिमाणात्

परिमितत्वाद् अव्यापित्वाद् इति यावत्

विवादाध्यासिता भेदा अव्यक्तकारणवन्तः

परिमितत्वात्

घटादिवत्

घटादयो हि परिमिता अव्यक्तहेतुका दृष्टाः

उक्तम् एतद्यथा कार्यस्याव्यक्तावस्था कारणम् एवेति

यन्महतः कारणं तत्परमाव्यक्तम्

ततः परतराव्यक्तकल्पनायां प्रमाणाभावात्

इतश्च विवादाध्यासिता भेदा अव्यक्तकारणवन्तः

समन्वयात्

भिन्नानां सरूपता समन्वयः

सुखदुःखमोहसमन्विता हि बुद्ध्यादयो ऽध्यवसायादिलक्षणाः प्रतीयन्ते

यानि च यद्रूपसमनुगतानि तानि तत्स्वभावाव्यक्तकारणानि यथा मृद्धेमपिण्डसमनुगताः कुटमुकुटादयो मृद्धेमपिण्डाव्यक्तकारणा इति कारणम् अस्त्यव्यक्तं भेदानाम् इति सिद्धम्

अव्यक्तं साधयित्वास्य प्रवृत्तिप्रकारम् आह

Transliteration

bhedānāṃ viśeṣāṇāṃ mahadādīnāṃ bhūtāntānāṃ kāraṇaṃ mūlakāraṇam astyavyaktam

kutaḥ

kāraṇakāryavibhāgād avibhāgādvaiśvarūpyasya

kāraṇe satkāryam iti sthitam

tathā ca yathā kūrmaśarīre santyevāṅgāni niścaranti vibhajyanta idaṃ kūrmasya śarīram etānyetasyāṅgānītyevaṃ niviśamānāni tasminn avyaktībhavantyevaṃ mṛtpiṇḍāddhemapiṇḍādvā kāryāṇi kuṭakaṭakādīni santyevāvirbhavanti vibhajyante santyeva pṛthivyādīni kāraṇāttanmātrād āvirbhavanti vibhajyante santyeva tanmātrāṇyahaṃkārātkāraṇātsann evāhaṃkāraḥ kāraṇānmahataḥ sann eva ca mahānparamāvyaktād iti

so 'yaṃ kāraṇātparamāvyaktātsākṣātpāraṃparyeṇānvitasya viśvasya kāryasya vibhāgaḥ

pratisarge mṛtpiṇḍaṃ hemapiṇḍaṃ vā kuṭakaṭakādayo nirviśanto 'vyaktībhavanti tatkāraṇarūpam evānabhivyaktaṃ kāryam apekṣyāvyaktaṃ bhavati

evaṃ pṛthivyādayastanmātrāṇi viśantaḥ svāpekṣayā tanmātrāṇy avyaktayanty evaṃ tanmātrāṇyahaṃkāraṃ viśantyahaṃkāram avyaktayantyevam ahaṃkāro mahāntam āviśanmahāntam avyaktayati mahānsvaṃ kāraṇaṃ viśanprakṛtim avyaktayati

prakṛtestu na kvacinniveśa iti sā sarvakāryāṇām avyaktam eva

so 'yam avibhāgaḥ prakṛtau vaiśvarūpyasya nānārūpasya kāryasya

svārthikaḥ ṣyañ

tasmātkāraṇe kāryasya sata eva vibhāgāvibhāgābhyām avyaktaṃ kāraṇam astīti

itaścāvyaktam astītyāha śaktitaḥ pravṛtteśca

kāraṇaśaktitaḥ kāryaṃ pravartata iti siddham

aśaktātkāraṇātkāryasyānutpatteḥ

na hi satkāryapakṣe kāryasyāvyaktatāyā anyasyāṃ śaktāvasti pramāṇam

ayam eva hi sikatābhyastilānāṃ tailotpādakānāṃ bhedo yad eteṣveva tailam astyanāgatāvasthaṃ na sikatāsviti

syād etat

śaktitaḥ pravṛttiḥ kāraṇakāryavibhāgāvibhāgau ca mahata eva paramāvyaktatvaṃ sādhayiṣyata iti kṛtaṃ tataḥ pareṇāvyakteneti

ata āha parimāṇāt

parimitatvād avyāpitvād iti yāvat

vivādādhyāsitā bhedā avyaktakāraṇavantaḥ

parimitatvāt

ghaṭādivat

ghaṭādayo hi parimitā avyaktahetukā dṛṣṭāḥ

uktam etadyathā kāryasyāvyaktāvasthā kāraṇam eveti

yanmahataḥ kāraṇaṃ tatparamāvyaktam

tataḥ paratarāvyaktakalpanāyāṃ pramāṇābhāvāt

itaśca vivādādhyāsitā bhedā avyaktakāraṇavantaḥ

samanvayāt

bhinnānāṃ sarūpatā samanvayaḥ

sukhaduḥkhamohasamanvitā hi buddhyādayo 'dhyavasāyādilakṣaṇāḥ pratīyante

yāni ca yadrūpasamanugatāni tāni tatsvabhāvāvyaktakāraṇāni yathā mṛddhemapiṇḍasamanugatāḥ kuṭamukuṭādayo mṛddhemapiṇḍāvyaktakāraṇā iti kāraṇam astyavyaktaṃ bhedānām iti siddham

avyaktaṃ sādhayitvāsya pravṛttiprakāram āha

By System Admin

Translation

Draft in progress