20 shlokas
- 1
अत्र यदा प्राप्तज्ञानः क्षीणकलुषश्च कृताभ्यनुज्ञः तदा आचार्यसकाशान्निष्क्रम्यागत्य प्रत्यगारं नगरं वा प्रविश्य यत्र लौकिकानां समूहस्तत्र तेषां नातिदूरे नातिसंनिकर्षे यत्र च तेषां नोपरोधो दृष्टिनिपातश्च भवति तत्र हस्त्यश्वरथपदातीनां पन्थानं वर्जयित्वोपविश्य निद्रालिङ्गशिरश्चलितजृम्भिकादीनि प्रयोक्तव्यानि
atra yadā prāptajñānaḥ kṣīṇakaluṣaśca kṛtābhyanujñaḥ tadā ācāryasakāśānniṣkramyāgatya pratyagāraṃ nagaraṃ vā praviśya yatra laukikānāṃ samūhastatra teṣāṃ nātidūre nātisaṃnikarṣe yatra ca teṣāṃ noparodho dṛṣṭinipātaśca bhavati tatra hastyaśvarathapadātīnāṃ panthānaṃ varjayitvopaviśya nidrāliṅgaśiraścalitajṛmbhikādīni prayoktavyāni
- 2
तत्रैवानेनासुप्तेन सुप्त इव भवितव्यम्
tatraivānenāsuptena supta iva bhavitavyam
- 3
ततः प्राणरेचनस्य वायोः कण्ठदेशे पुरुपुरुशब्दः कर्तव्यः
tataḥ prāṇarecanasya vāyoḥ kaṇṭhadeśe purupuruśabdaḥ kartavyaḥ
- 4
ततस्ते मनसा वा वाचा वा निद्राविष्टोऽयमिति लौकिकाः प्रपद्यन्ते परिभवन्ति च
tataste manasā vā vācā vā nidrāviṣṭo'yamiti laukikāḥ prapadyante paribhavanti ca
- 5
अनेनानृताभियोगेनास्य यत्तेषां सुकृतं तदागच्छति
anenānṛtābhiyogenāsya yatteṣāṃ sukṛtaṃ tadāgacchati
- 6
अस्यापि च यत्पापं तत्तान्प्रति
asyāpi ca yatpāpaṃ tattānprati
- 7
एवं क्राथनम् इति क्रिया
evaṃ krāthanam iti kriyā
- 8
इत इत्य् अभियजन आज्ञायां नियोगे च
ita ity abhiyajana ājñāyāṃ niyoge ca
- 9
वाशब्दः क्राथनस्पन्दनादिविभागे द्रष्टव्यः
vāśabdaḥ krāthanaspandanādivibhāge draṣṭavyaḥ
- 10
आह अविभक्ताभिधानादेव क्राथनस्पन्दनादीनां विभागसिद्धिः हसितादिवत्
āha avibhaktābhidhānādeva krāthanaspandanādīnāṃ vibhāgasiddhiḥ hasitādivat
- 11
कस्माद्भाविवचनं भवति
kasmādbhāvivacanaṃ bhavati
- 12
उच्यते पृथगभिधाने सत्यपि हसितगीतनृत्यवत्संदेहः
ucyate pṛthagabhidhāne satyapi hasitagītanṛtyavatsaṃdehaḥ
- 13
पृथगभिधाने सत्यपि हसितगीतयोः पृथक्पृथक्प्रयोगः
pṛthagabhidhāne satyapi hasitagītayoḥ pṛthakpṛthakprayogaḥ
- 14
अत्र विभक्तयोस्तु गीतनृत्ययोः
atra vibhaktayostu gītanṛtyayoḥ
- 15
अध्ययनयन्त्रणयोश्च
adhyayanayantraṇayośca
- 16
तस्मात्पृथगभिधानमनुरतो वा विभागे भवतान्यदोषः
tasmātpṛthagabhidhānamanurato vā vibhāge bhavatānyadoṣaḥ
- 17
ततः क्राथनक्रिययावमानादिषु निष्पन्नेषु क्राथनादि संसृष्टं समुत्सृज्य शीघ्रमुत्थातव्यम्
tataḥ krāthanakriyayāvamānādiṣu niṣpanneṣu krāthanādi saṃsṛṣṭaṃ samutsṛjya śīghramutthātavyam
- 18
यथा लौकिकानां सम्प्रत्ययो भवति किमप्यनेन स्वप्नान्तरे भयं दृष्टमिति
yathā laukikānāṃ sampratyayo bhavati kimapyanena svapnāntare bhayaṃ dṛṣṭamiti
- 19
अत उत्थाय शिरःपाण्यादीनामन्यतमं स्पन्दितव्यम्
ata utthāya śiraḥpāṇyādīnāmanyatamaṃ spanditavyam
- 20
यस्मादाह
yasmādāha

