Harshacharita · Ucchvasa 6 6.249
6.249अथ युगपत्प्रधावितबहुपुरुषपरम्पराहूयमानः स्वमन्दिराद् अप्रतिपालितकरेणुश्चरणाभ्याम् एव संभ्रान्तः ससंभ्रमैर्दण्डिभिर् उत्सार्यमाणजनपदः पदे पदे प्रणमतः प्रतिदिशम् इभभिषग्वरान्वरवारणानां विभावरीवार्ताः पृच्छन्न् उच्छ्रितशिखिपिच्छलाञ्छितवंशलतावनगहनगृहीतदिगायामैर्विन्ध्यवनैर् इव वारणबन्धविमर्दोद्योगागतैः पुरःप्रधावद्भिर् अनायत्तमण्डलैर् आधोरणगणैश्च मरकतहरितघासमुष्टीश्च दर्शयद्भिर्नवग्रहगजपतींश्च प्रार्थयमानैश्च लब्धाभिमतमत्तमातङ्गमुदितमानसैश्च सुदूरम् उपसृत्य नमस्यद्भिर् आत्मीयमातङ्गमदागमांश्च निवेदयद्भिः डिण्डिमाधिरोहणाय च विज्ञापयद्भिः प्रमादपतितापराधापहृतद्विरददुःखधृतदीर्घश्मश्रुभिर् अग्रतो गच्छद्भिः अभिनवोपसृतैश्च कर्पटिभिर्वारणाप्तिसुखप्रत्याशया धावमानैः गणिकाधिकारिगणैश्चिरलब्धान्तरैर् उच्छ्रितकरैः कर्मण्यकरेणुकासंकथनाकुलैर् उल्लासितपल्लवचिह्नाभिर् अरण्यपालपङ्क्तिभिश्च निष्पादितनवग्रहनागनिवहनिवेदनोद्यताभिर् उत्तम्भिततुङ्गतोत्रवनाभिर्महामात्रपेटकैश्च प्रकटितकरिकर्मचर्मपुटैः अभिनवगजसाधनसंचरणवार्तानिवेदनविसर्जितैश्च नागवनवीथीपालदूतवृन्दैः प्रतिक्षणप्रत्यवेक्षितकरिकवलकूटैश्च कटभङ्गसंग्रहं ग्रामनगरनिगमेषु निवेदयमानैः कटककदम्बकैः क्रियमाणकोलाहलः स्वामिप्रसादसंभृतेन महाधिकाराविष्कारेण स्वाभाविकेन चावष्टम्भाभोगेनोदासीनो ऽप्य् आदिशन्न् इव असंख्यकरिकर्णशङ्खसम्पत्सम्पादनाय समुद्रान् आज्ञापयन्न् इव शृङ्गारगैरिकपङ्काङ्गरागसंग्रहाय गिरीन्मुष्णन्न् इव दिग्गजाधिकारं ककुभाम् ऐरावतम् इवापहरन्हरेर्हरपदभरनमितकैलासगिरिगुरुभिः पादन्यासैर्गुरुभारग्रहणगर्वम् उर्व्याः संहरन्न् इव गतवशविलोलस्य चाजानुलम्बस्य बाहुदण्डद्वयस्य विक्षेपैर् आलानशिलास्तम्भमालाम् इवोभयतो निखनन्न् ईषदुत्तुङ्गलम्बेनाधरबिम्बेनामृतरसस्वादुना नवपल्लवकोमलेन कवलेनेव श्रीकरेणुकां विलोभयन्निजनृपवंशदीर्घं नासावंशं दधानः अतिस्निग्धमधुरधवलविशालतया पीतक्षीरोदेनेव पिबन्न् ईक्षणयुग्मायामेन दिशाम् आयामं मेरुतटाद् अपि विकटविपुलालिकः सततम् अविच्छिन्नच्छत्रच्छायाप्ररूढिवशाद् इव नितान्तायतनीलकोमलच्छविसुभगेन स्वभावभङ्गुरेण कुन्तलबालवल्लरीवेल्लितविलासिना लुनन्न् इव लुप्तालोकान् अर्ककरान्बर्बरकेणारिपक्षपरिक्षयपरित्यक्तकार्मुककर्मापि सकलदिगन्तश्रूयमाणगुरुगुणध्वनिः आत्मस्थसमस्तमत्तमातङ्गसाधनो ऽप्य् अस्पृष्टो मदेन भूतिमान् अपि स्नेहमयः पार्थिवो ऽपि गुणमयः करिणाम् इव दानवताम् उपरि स्थितः स्वामिताम् इव स्पृहणीयां भृत्यताम् अप्य् अपरिभूताम् उद्वहन्न् एकभर्तृभक्तिनिश्चलां कुलाङ्गनाम् इवानन्यगम्यां प्रभुप्रसादभूमिम् आरूढः निष्कारणबान्धवो विदग्धानाम् अभृतभृत्यो भजताम् अक्रीतदासो विदुषाम्स्कन्दगुप्तो विवेश राजकुलम्
Transliteration
atha yugapatpradhāvitabahupuruṣaparamparāhūyamānaḥ svamandirād apratipālitakareṇuścaraṇābhyām eva saṃbhrāntaḥ sasaṃbhramairdaṇḍibhir utsāryamāṇajanapadaḥ pade pade praṇamataḥ pratidiśam ibhabhiṣagvarānvaravāraṇānāṃ vibhāvarīvārtāḥ pṛcchann ucchritaśikhipicchalāñchitavaṃśalatāvanagahanagṛhītadigāyāmairvindhyavanair iva vāraṇabandhavimardodyogāgataiḥ puraḥpradhāvadbhir anāyattamaṇḍalair ādhoraṇagaṇaiśca marakataharitaghāsamuṣṭīśca darśayadbhirnavagrahagajapatīṃśca prārthayamānaiśca labdhābhimatamattamātaṅgamuditamānasaiśca sudūram upasṛtya namasyadbhir ātmīyamātaṅgamadāgamāṃśca nivedayadbhiḥ ḍiṇḍimādhirohaṇāya ca vijñāpayadbhiḥ pramādapatitāparādhāpahṛtadviradaduḥkhadhṛtadīrghaśmaśrubhir agrato gacchadbhiḥ abhinavopasṛtaiśca karpaṭibhirvāraṇāptisukhapratyāśayā dhāvamānaiḥ gaṇikādhikārigaṇaiściralabdhāntarair ucchritakaraiḥ karmaṇyakareṇukāsaṃkathanākulair ullāsitapallavacihnābhir araṇyapālapaṅktibhiśca niṣpāditanavagrahanāganivahanivedanodyatābhir uttambhitatuṅgatotravanābhirmahāmātrapeṭakaiśca prakaṭitakarikarmacarmapuṭaiḥ abhinavagajasādhanasaṃcaraṇavārtānivedanavisarjitaiśca nāgavanavīthīpāladūtavṛndaiḥ pratikṣaṇapratyavekṣitakarikavalakūṭaiśca kaṭabhaṅgasaṃgrahaṃ grāmanagaranigameṣu nivedayamānaiḥ kaṭakakadambakaiḥ kriyamāṇakolāhalaḥ svāmiprasādasaṃbhṛtena mahādhikārāviṣkāreṇa svābhāvikena cāvaṣṭambhābhogenodāsīno 'py ādiśann iva asaṃkhyakarikarṇaśaṅkhasampatsampādanāya samudrān ājñāpayann iva śṛṅgāragairikapaṅkāṅgarāgasaṃgrahāya girīnmuṣṇann iva diggajādhikāraṃ kakubhām airāvatam ivāpaharanharerharapadabharanamitakailāsagirigurubhiḥ pādanyāsairgurubhāragrahaṇagarvam urvyāḥ saṃharann iva gatavaśavilolasya cājānulambasya bāhudaṇḍadvayasya vikṣepair ālānaśilāstambhamālām ivobhayato nikhanann īṣaduttuṅgalambenādharabimbenāmṛtarasasvādunā navapallavakomalena kavaleneva śrīkareṇukāṃ vilobhayannijanṛpavaṃśadīrghaṃ nāsāvaṃśaṃ dadhānaḥ atisnigdhamadhuradhavalaviśālatayā pītakṣīrodeneva pibann īkṣaṇayugmāyāmena diśām āyāmaṃ merutaṭād api vikaṭavipulālikaḥ satatam avicchinnacchatracchāyāprarūḍhivaśād iva nitāntāyatanīlakomalacchavisubhagena svabhāvabhaṅgureṇa kuntalabālavallarīvellitavilāsinā lunann iva luptālokān arkakarānbarbarakeṇāripakṣaparikṣayaparityaktakārmukakarmāpi sakaladigantaśrūyamāṇaguruguṇadhvaniḥ ātmasthasamastamattamātaṅgasādhano 'py aspṛṣṭo madena bhūtimān api snehamayaḥ pārthivo 'pi guṇamayaḥ kariṇām iva dānavatām upari sthitaḥ svāmitām iva spṛhaṇīyāṃ bhṛtyatām apy aparibhūtām udvahann ekabhartṛbhaktiniścalāṃ kulāṅganām ivānanyagamyāṃ prabhuprasādabhūmim ārūḍhaḥ niṣkāraṇabāndhavo vidagdhānām abhṛtabhṛtyo bhajatām akrītadāso viduṣāmskandagupto viveśa rājakulam
By System Admin
Translation
Draft in progress