Harshacharita · Ucchvasa 5 5.256
5.256राजवल्लभास्तु भृत्याः सुहृदः सचिवाश्च तस्मिन्न् एवाहनि निर्गत्य प्रियं पुत्रदारम् उत्सृज्योद्बाष्पैर्बन्धुभिर्वार्यमाणा अपि बहुनृपगुणगणहृतहृदयाः केचिद् आत्मानं भृगुषु बबन्धुः केचित्तत्रैव तीर्थेषु तस्थुः केचिद् अनशनैर् आस्तीर्णतृणकुशा व्यथमानमानसाः शुचम् असमाम् अशमयन्केचिच्छलभा इव वैश्वानरं शोकावेगविवशा विविशुः केचिद्दारुणदुःखदहनदह्यमानहृदया गृहीतवाचस्तुषारशिखरिणं शरणम् उपाययुः केचिद्विन्ध्योपत्यकासु वनकरिकुलकरशीकरासारसिच्यमानतनवः पल्लवशयनशायिनः संतापम् अशमयन्केचित्संनिहितान् अपि विषयान् उत्सृज्य सेवाविमुखाः परिच्छिन्नैः पिण्डकैर् अटवीभुवः शून्या जगृहुः केचित्पवनाशना धर्मधना धमद्धमनयो मुनयो बभूवुः केचिद्गृहीतकाषायाः कापिलं मतम् अधिजगिरे गिरिषु केचिद् आचोटितचूडामणिषु शिरःसु शरणीकृतधूर्जटयो जटा जघटिरे
Transliteration
rājavallabhāstu bhṛtyāḥ suhṛdaḥ sacivāśca tasminn evāhani nirgatya priyaṃ putradāram utsṛjyodbāṣpairbandhubhirvāryamāṇā api bahunṛpaguṇagaṇahṛtahṛdayāḥ kecid ātmānaṃ bhṛguṣu babandhuḥ kecittatraiva tīrtheṣu tasthuḥ kecid anaśanair āstīrṇatṛṇakuśā vyathamānamānasāḥ śucam asamām aśamayankecicchalabhā iva vaiśvānaraṃ śokāvegavivaśā viviśuḥ keciddāruṇaduḥkhadahanadahyamānahṛdayā gṛhītavācastuṣāraśikhariṇaṃ śaraṇam upāyayuḥ kecidvindhyopatyakāsu vanakarikulakaraśīkarāsārasicyamānatanavaḥ pallavaśayanaśāyinaḥ saṃtāpam aśamayankecitsaṃnihitān api viṣayān utsṛjya sevāvimukhāḥ paricchinnaiḥ piṇḍakair aṭavībhuvaḥ śūnyā jagṛhuḥ kecitpavanāśanā dharmadhanā dhamaddhamanayo munayo babhūvuḥ kecidgṛhītakāṣāyāḥ kāpilaṃ matam adhijagire giriṣu kecid ācoṭitacūḍāmaṇiṣu śiraḥsu śaraṇīkṛtadhūrjaṭayo jaṭā jaghaṭire
By System Admin
Translation
Draft in progress