Sanskrit

Harshacharita · Ucchvasa 4 4.204

4.204

अथ सकलकमलवनलक्ष्मीं वधूमुख इव संचार्य समवसिते वासरे विवाहदिवसश्रियः पादपल्लव इव रज्यमाने सवितरि वधूवरानुरागलघूकृतप्रेमलज्जितेष्व् इव विघटमानेषु चक्रवाकमिथुनेषु सौभाग्यध्वज इव रक्तांशुकसुकुमारवपुषि नभसि स्फुरति संध्यारागे कपोतकण्ठकर्बुरे वरयात्रागमनरजसीव कलुषयति दिङ्मुखानि तिमिरे लग्नसंपादनसज्ज इवोज्जिहाने ज्योतिर्गणे विवाहमङ्गलकलश इवोदयशिखरिणा समुत्क्षिप्यमाणे वर्धमानधवलच्छाये ताराधिपमण्डले वधूवदनलावण्यज्योत्स्नापरिपीततमसि प्रदोषे वृथोदितम् उपहसत्स्व् इव रजनिकरम् उत्तानितमुखेषु कुमुदवनेष्व् आजगाम मुहुर्मुहुर् उल्लासितस्फारस्फुरितारुणचामरैर्मनोरथैर् इवोत्थितरागाग्रपल्लवैः पुरोधावमानैः पादातैर् उत्कर्णकटकहयप्रतिहेषितदीयमानस्वागतैर् इव वाजिनां वृन्दैर् आपूरितदिग्विभागः चलकर्णचामराणां चामीकरमयसर्वोपकरणानां वर्णकलम्बिनां बलिनां घण्टाटाङ्कारिणां करिणां घटाभिः घटयन्न् इव पुनर् इन्दूदयविलीनम् अन्धकारम्नक्षत्रमालामण्डितमुखीं करिणीं निशाकर इव पौरंदरीं दिशम् आरूढः प्रकटितविविधविहगविरुतैस्तालावचरचारणैः पुरःसरैर्बालो वसन्त इवोपवनैः क्रियमाणकोलाहलो गन्धतैलावसेकसुगन्धिना दीपिकाचक्रवालालोकेन कुङ्कुमपटवासधूलिपटलेनेव पिञ्जरीकुर्वन्सकलं लोकम् उत्फुल्लमल्लिकामुण्डमालामध्याध्यासितकुसुमशेखरेण शिरसा हसन्न् इव सपरिवेषक्षपाकरं कौमुदीप्रदोषम् आत्मरूपनिर्जितमकरकेतुकरापहृतेन कार्मुकेणेव कौसुमेन दाम्ना विरचितवैकक्षकविलासः कुसुमसौरभगर्वभ्रान्तभ्रमरकुलकलकलप्रलापसुभगः पारिजात इव जातः श्रिया सह पुनर् अवतारितो मेदिनीम्नववधूवदनावलोकनकुतूहलेनेव कृष्यमाणहृदयः पतन्न् इव मुखेन प्रत्यासन्नलग्नो ग्रहवर्मा त्वरितम् आजगाम

Transliteration

atha sakalakamalavanalakṣmīṃ vadhūmukha iva saṃcārya samavasite vāsare vivāhadivasaśriyaḥ pādapallava iva rajyamāne savitari vadhūvarānurāgalaghūkṛtapremalajjiteṣv iva vighaṭamāneṣu cakravākamithuneṣu saubhāgyadhvaja iva raktāṃśukasukumāravapuṣi nabhasi sphurati saṃdhyārāge kapotakaṇṭhakarbure varayātrāgamanarajasīva kaluṣayati diṅmukhāni timire lagnasaṃpādanasajja ivojjihāne jyotirgaṇe vivāhamaṅgalakalaśa ivodayaśikhariṇā samutkṣipyamāṇe vardhamānadhavalacchāye tārādhipamaṇḍale vadhūvadanalāvaṇyajyotsnāparipītatamasi pradoṣe vṛthoditam upahasatsv iva rajanikaram uttānitamukheṣu kumudavaneṣv ājagāma muhurmuhur ullāsitasphārasphuritāruṇacāmarairmanorathair ivotthitarāgāgrapallavaiḥ purodhāvamānaiḥ pādātair utkarṇakaṭakahayapratiheṣitadīyamānasvāgatair iva vājināṃ vṛndair āpūritadigvibhāgaḥ calakarṇacāmarāṇāṃ cāmīkaramayasarvopakaraṇānāṃ varṇakalambināṃ balināṃ ghaṇṭāṭāṅkāriṇāṃ kariṇāṃ ghaṭābhiḥ ghaṭayann iva punar indūdayavilīnam andhakāramnakṣatramālāmaṇḍitamukhīṃ kariṇīṃ niśākara iva pauraṃdarīṃ diśam ārūḍhaḥ prakaṭitavividhavihagavirutaistālāvacaracāraṇaiḥ puraḥsarairbālo vasanta ivopavanaiḥ kriyamāṇakolāhalo gandhatailāvasekasugandhinā dīpikācakravālālokena kuṅkumapaṭavāsadhūlipaṭaleneva piñjarīkurvansakalaṃ lokam utphullamallikāmuṇḍamālāmadhyādhyāsitakusumaśekhareṇa śirasā hasann iva sapariveṣakṣapākaraṃ kaumudīpradoṣam ātmarūpanirjitamakaraketukarāpahṛtena kārmukeṇeva kausumena dāmnā viracitavaikakṣakavilāsaḥ kusumasaurabhagarvabhrāntabhramarakulakalakalapralāpasubhagaḥ pārijāta iva jātaḥ śriyā saha punar avatārito medinīmnavavadhūvadanāvalokanakutūhaleneva kṛṣyamāṇahṛdayaḥ patann iva mukhena pratyāsannalagno grahavarmā tvaritam ājagāma

By System Admin

Translation

Draft in progress