Harshacharita · Ucchvasa 4 4.147
4.147अथ चन्द्रसूर्याव् इव स्फुरज्ज्योत्स्नायशःप्रतापाक्रान्तभुवनाव् अभिरामदुर्निरीक्ष्यौ अग्निमारुताव् इव समभिव्यक्ततेजोबलाव् एकीभूतौ शिलाकठिनकायबन्धौ हिमवद्विन्ध्याव् इवाचलौ महावृषाव् इव कृतयुगयोग्यौ अरुणगरुडाव् इव हरिवाहनविभक्तशरीरौ इन्द्रोपेन्द्राव् इव नागेन्द्रगतौ कर्णार्जुनाव् इव कुण्डलकिरीटधरौ पूर्वापरदिग्भागाव् इव सर्वतेजस्विनाम् उदयास्तमयसंपादनसमर्थौ अमान्ताव् इवातिमानेनासन्नवेलार्गलनिरोधसंकटे कुकुटीरके तेजः पराङ्मुखीं छायाम् अपि जुगुप्समानौ स्वात्मप्रतिबिम्बेनापि पादनखलग्नेन लज्जमानौ शिरोरुहाणाम् अपि भङ्गेन दुःखम् अवतिष्ठमानौ चूडामणिसंक्रान्तेनापि द्वितीयेनातपत्रेणापत्रपमाणौ भगवति षण्मुखे ऽपि स्वामिशब्देनासुखायमानश्रवणौ दर्पणदृष्टेनापि प्रतिपुरुषेण दूयमाननयनौ संध्याञ्जलिघटनेष्व् अपि शूलायमानोत्तमाङ्गौ जलधरधृतेनापि धनुषा दोधूयमानहृदयौ आलेख्यक्षितिपतिभिर् अप्य् अप्रणमद्भिः संतप्यमानचरणौ परिमितमण्डलसंतुष्टं तेजः सवितुर् अप्य् अबहुमन्यमानौ भूभृदपहृतलक्ष्मीकं सागरम् अप्य् उपहसन्तौ बलवन्तम् अकृतविग्रहं मारुतम् अपि निन्दन्तौ हिमवतो ऽपि चमरीवालव्यजनवीजितेन दह्यमानौ जलधीनाम् अपि शङ्खैः खिद्यमानौ चतुःसमुद्राधिपतिम् अपरं प्रचेतसम् अप्य् असहमानौ अनपहृतच्छत्रान् अपि विच्छायान् अवनिपालान्कुर्वाणौ साधुष्व् अप्य् असेवितप्रसन्नौ मुखेन मधु क्षरन्तौ दुष्टराजवंशान् ऊष्मणा दूरस्थितान् अपि म्लानिम् आनयन्तौ अनुदिवसं शस्त्राभ्यासश्यामिकाकलङ्कितम् अशेषराजकप्रतापाग्निनिर्वपणमलिनम् इव करतलम् उद्वहन्तौ योग्याकालेषु धीरैर्धनुर्ध्वनिभिर् अभ्यर्णोपभोगाद्दिग्वधूभिर् इवालपन्तौ राज्यवर्धन इति हर्ष इति सर्वस्याम् एव पृथिव्याम् आविर्भूतशब्दप्रादुर्भावौ स्वल्पीयसैव कालेन द्वीपान्तरेष्व् अपि प्रकाशतां जग्मतुः
Transliteration
atha candrasūryāv iva sphurajjyotsnāyaśaḥpratāpākrāntabhuvanāv abhirāmadurnirīkṣyau agnimārutāv iva samabhivyaktatejobalāv ekībhūtau śilākaṭhinakāyabandhau himavadvindhyāv ivācalau mahāvṛṣāv iva kṛtayugayogyau aruṇagaruḍāv iva harivāhanavibhaktaśarīrau indropendrāv iva nāgendragatau karṇārjunāv iva kuṇḍalakirīṭadharau pūrvāparadigbhāgāv iva sarvatejasvinām udayāstamayasaṃpādanasamarthau amāntāv ivātimānenāsannavelārgalanirodhasaṃkaṭe kukuṭīrake tejaḥ parāṅmukhīṃ chāyām api jugupsamānau svātmapratibimbenāpi pādanakhalagnena lajjamānau śiroruhāṇām api bhaṅgena duḥkham avatiṣṭhamānau cūḍāmaṇisaṃkrāntenāpi dvitīyenātapatreṇāpatrapamāṇau bhagavati ṣaṇmukhe 'pi svāmiśabdenāsukhāyamānaśravaṇau darpaṇadṛṣṭenāpi pratipuruṣeṇa dūyamānanayanau saṃdhyāñjalighaṭaneṣv api śūlāyamānottamāṅgau jaladharadhṛtenāpi dhanuṣā dodhūyamānahṛdayau ālekhyakṣitipatibhir apy apraṇamadbhiḥ saṃtapyamānacaraṇau parimitamaṇḍalasaṃtuṣṭaṃ tejaḥ savitur apy abahumanyamānau bhūbhṛdapahṛtalakṣmīkaṃ sāgaram apy upahasantau balavantam akṛtavigrahaṃ mārutam api nindantau himavato 'pi camarīvālavyajanavījitena dahyamānau jaladhīnām api śaṅkhaiḥ khidyamānau catuḥsamudrādhipatim aparaṃ pracetasam apy asahamānau anapahṛtacchatrān api vicchāyān avanipālānkurvāṇau sādhuṣv apy asevitaprasannau mukhena madhu kṣarantau duṣṭarājavaṃśān ūṣmaṇā dūrasthitān api mlānim ānayantau anudivasaṃ śastrābhyāsaśyāmikākalaṅkitam aśeṣarājakapratāpāgninirvapaṇamalinam iva karatalam udvahantau yogyākāleṣu dhīrairdhanurdhvanibhir abhyarṇopabhogāddigvadhūbhir ivālapantau rājyavardhana iti harṣa iti sarvasyām eva pṛthivyām āvirbhūtaśabdaprādurbhāvau svalpīyasaiva kālena dvīpāntareṣv api prakāśatāṃ jagmatuḥ
By System Admin
Translation
Draft in progress