Sanskrit

Harshacharita · Ucchvasa 4 4.139

4.139

एवं च वृत्ते तस्मिन्महोत्सवे शनैः शनैः पुनर् अप्य् अतिक्रामति काले देवे चोत्तमाङ्गनिहितरक्षासर्षपे समुन्मिषत्प्रतापाग्निस्फुलिङ्ग इव गोरोचनापिञ्जरितवपुषि समभिव्यज्यमानसहजक्षात्रतेजसीव हाटकबद्धविकटव्याघ्रनखपङ्क्तिमण्डितग्रीवके हृदयोद्भिद्यमानदर्पाङ्कुर इव प्रथमाव्यक्तजल्पितेन सत्यस्य शनैःशनैरोंकारम् इव कुर्वाणे मुग्धस्मितैः कुसुमैर् इव मधुकरकुलानि बन्धुहृदयान्य् आकर्षति जननीपयोधरकलशपयःसीकरसेकाद् इव जायमानैर्विलासहसिताङ्कुरैर्दशनकैर् अलंक्रियमाणमुखकमलके चारित्र इवान्तःपुरस्त्रीकदम्बकेन पाल्यमाने मन्त्र इव सचिवमण्डलेन रक्ष्यमाणे वृत्त इव कुलपुत्रकलोकेनामुच्यमाने यशसीवात्मवशेन संवर्ध्यमाने मृगपतिपोत इव रक्षिपुरुषशस्त्रपञ्जरमध्यगते धात्रीकराङ्गुलिलग्ने पञ्चषाणि पदानि प्रयच्छति हर्षे षष्ठं वर्षम् अवतरति च राज्यवर्धने देवी यशोमती गर्भेणाधत्त नारायणमूर्तिर् इव वसुधां देवीं राज्यश्रियम्

Transliteration

evaṃ ca vṛtte tasminmahotsave śanaiḥ śanaiḥ punar apy atikrāmati kāle deve cottamāṅganihitarakṣāsarṣape samunmiṣatpratāpāgnisphuliṅga iva gorocanāpiñjaritavapuṣi samabhivyajyamānasahajakṣātratejasīva hāṭakabaddhavikaṭavyāghranakhapaṅktimaṇḍitagrīvake hṛdayodbhidyamānadarpāṅkura iva prathamāvyaktajalpitena satyasya śanaiḥśanairoṃkāram iva kurvāṇe mugdhasmitaiḥ kusumair iva madhukarakulāni bandhuhṛdayāny ākarṣati jananīpayodharakalaśapayaḥsīkarasekād iva jāyamānairvilāsahasitāṅkurairdaśanakair alaṃkriyamāṇamukhakamalake cāritra ivāntaḥpurastrīkadambakena pālyamāne mantra iva sacivamaṇḍalena rakṣyamāṇe vṛtta iva kulaputrakalokenāmucyamāne yaśasīvātmavaśena saṃvardhyamāne mṛgapatipota iva rakṣipuruṣaśastrapañjaramadhyagate dhātrīkarāṅgulilagne pañcaṣāṇi padāni prayacchati harṣe ṣaṣṭhaṃ varṣam avatarati ca rājyavardhane devī yaśomatī garbheṇādhatta nārāyaṇamūrtir iva vasudhāṃ devīṃ rājyaśriyam

By System Admin

Translation

Draft in progress