Harshacharita · Ucchvasa 3 3.94
3.94यत्र च प्रमदानां चक्षुर् एव सहजं मुण्डमालामण्डनं भारः कुवलयदलदामानि
अलकप्रतिबिम्बान्य् एव कपोलतलगतान्य् अक्लिष्टाः श्रवणावतंसाः पुनरुक्तानि तमालकिसलयानि
प्रियकथा एव सुभगाः कर्णालंकारा आडम्बरः कुण्डलादिः
कपोला एव सततम् आलोककारका विभवो निशासु मणिप्रदीपाः
निःश्वासाकृष्टमधुकरकुलान्य् एव रमणीयं मुखावरणं कुलस्त्रीजनाचारो जालिका
वाण्य् एव मधुरा वीणा बाह्यविज्ञानं तन्त्रीताडनम्
हासा एवातिशयसुरभयः पटवासा निरर्थकाः कर्पूरपांसवः
अधरकान्तिविसर एवोज्ज्वलतरो ऽङ्गरागो निर्गुणो लावण्यकलङ्कः कुङ्कुमपङ्कः
बाहव एव कोमलतमाः परिहासप्रहारवेत्रलता निष्प्रयोजनानि मृणालानि
यौवनोष्मस्वेदबिन्दव एव विदग्धाः कुचालंकृतयो हारास्तु भाराः
श्रोण्य एव विशालस्फटिकशिलातलचतुरस्रा रागिणां विश्रमकारणम् अनिमित्तं भवनमणिवेदिकाः
Transliteration
yatra ca pramadānāṃ cakṣur eva sahajaṃ muṇḍamālāmaṇḍanaṃ bhāraḥ kuvalayadaladāmāni
alakapratibimbāny eva kapolatalagatāny akliṣṭāḥ śravaṇāvataṃsāḥ punaruktāni tamālakisalayāni
priyakathā eva subhagāḥ karṇālaṃkārā āḍambaraḥ kuṇḍalādiḥ
kapolā eva satatam ālokakārakā vibhavo niśāsu maṇipradīpāḥ
niḥśvāsākṛṣṭamadhukarakulāny eva ramaṇīyaṃ mukhāvaraṇaṃ kulastrījanācāro jālikā
vāṇy eva madhurā vīṇā bāhyavijñānaṃ tantrītāḍanam
hāsā evātiśayasurabhayaḥ paṭavāsā nirarthakāḥ karpūrapāṃsavaḥ
adharakāntivisara evojjvalataro 'ṅgarāgo nirguṇo lāvaṇyakalaṅkaḥ kuṅkumapaṅkaḥ
bāhava eva komalatamāḥ parihāsaprahāravetralatā niṣprayojanāni mṛṇālāni
yauvanoṣmasvedabindava eva vidagdhāḥ kucālaṃkṛtayo hārāstu bhārāḥ
śroṇya eva viśālasphaṭikaśilātalacaturasrā rāgiṇāṃ viśramakāraṇam animittaṃ bhavanamaṇivedikāḥ
By System Admin
Translation
Draft in progress