Harshacharita · Ucchvasa 3 3.79
3.79श्रूयताम् अस्ति पुण्यकृताम् अधिवासो वासवावास इव वसुधाम् अवतीर्णः सततम् असंकीर्णवर्णव्यवहारस्थितिः कृतयुगव्यवस्थः स्थलकमलबहलतया पोत्रोन्मूल्यमानमृणालैर् उद्गीतमेदिनीसारगुणैर् इव कृतमधुकरकोलाहलैर्हलैर् उल्लिख्यमानक्षेत्रः क्षीरोदपयःपायिपयोदसिक्ताभिर् इव पुण्ड्रेक्षुवाटसंततिभिर्निरन्तरः प्रतिदिशम् अपूर्वपर्वतकैर् इव खलधानधामभिर्विभज्यमानैः सस्यकूटैः संकटसकलसीमान्तः समन्ताद् उद्घातघटीसिच्यमानैर्जीरकजूटैर्जटिलितभूमिः उर्वरावरीयोभिः शालेयैर् अलंकृतः पाकविशरारुराजमाषनिकरकिर्मीरितैश्च स्फुटितमुद्गफलकोशीकपिशितैर्गोधूमधामभिः स्थलीपृष्ठैर् अधिष्ठितः महिषपृष्ठप्रतिष्ठितगायद्गोपालपालितैश्च कीटपटललम्पटचटकानुसृतैर् अवटुघटितघण्टाघटीरटितरमणीयैर् अटद्भिर् अटवीं हरवृषभपीतम् आमयाशङ्कया बहुधाविभक्तं क्षीरोदम् इव क्षीरं क्षरद्भिर्बाष्पच्छेद्यतृणतृप्तैर्गोधनैर्धवलितविपिनः विविधमखहोमधूमान्धशतमन्युमुक्तैर्लोचनैर् इव सहस्रसंख्यैः कृष्णशारैः शारीकृतोद्देशः धवलधूलिमुचा केतकीवनानां रजोभिः पाण्डुरीकृतैः प्रथमोद्धूलनभस्मधूसरैः शिवपुरस्येव प्रवेशैः प्रदेशैर् उपशोभितः शाककन्दलश्यामलितग्रामोपकण्ठकाश्यपीपृष्ठः पदे पदे करभपालीभिः पीलुपल्लवप्रस्फोटितैः करपुटपीडितकोमलमातुलुङ्गीदलरसोपलिप्तैः स्वेच्छाविचितकुङ्कुमकेसरकृतपुष्पप्रकरैः प्रत्यग्रफलरसपानसुखसुप्तपथिकैर्वनदेवतादीयमानामृतरसप्रपागृहैर् इव द्राक्षालतामण्डपैः स्फुरत्फलानां च बीजलग्नशुकचञ्चुरागाणाम् इव समारूढकपिकुलकपोलसंदिह्यमानकुसुमानां दाडिमीनां वनैर्विलोभनीयोपनिर्गमः वनपालपीयमाननारिकेलरसासवैश्च पथिकलोकलुप्यमानपिण्डखर्जूरैर्गोलाङ्गूललिह्यमानमधुरामोदपिण्डीरसैश्चकोरचञ्चुजर्जरितारुकैर् उपवनैर् अभिरामः तुङ्गार्जुनपालीपरिवृतैश्च गोकुलावतारकलुषितकूलकीलालैर् अध्वगशतशरण्यैर् अरण्यधराबन्धैर् अवन्ध्यवनरन्ध्रः करभीयकुमारकपाल्यमानैर् औष्ट्रकैर् औरभ्रकैश्च कृतसंबाधः दिशि दिशि रविरथतुरगविलोभनायैव विलोठनमृदितकुङ्कुमस्थलीरससमालब्धानाम् उत्प्रोथपुटैर् उन्मुखैर् उदरशायिकिशोरकजवजननाय प्रभञ्जनम् इव चापिबन्तीनां वातहरिणीनाम् इव स्वच्छन्दचारिणीनां वडवानां वृन्दैर्विचरद्भिर् आचितः अनवरतक्रतुधूमान्धकारप्रवृत्तैर्हंसयूथैर् इव गुणैर्धवलितभुवनः संगीतगतमुरजरवमत्तैर्मयूरैर् इव विभवैर्मुखरितजीवलोकः शशिकरावदातवृत्तैर्मुक्ताफलैर् इव गुणिभिः प्रसाधितः पथिकशतविलुप्यमानस्फीतफलैर्महातरुभिर् इव सर्वातिथिभिर् अभिगमनीयः मृगमदपरिमलवाहिमृगरोमाच्छादितैर्हिमवत्पादैर् इव महत्तरैः स्थिरीकृतः प्रोद्दण्डसहस्रपत्रोपविष्टद्विजोत्तमैर्नारायणनाभिमण्डलैर् इव तोयाशयैर्मण्डितः मथितपयःप्रवाहप्रक्षालितक्षितिभिः क्षीरोदमथनारम्भैर् इव महाघोषैः पूरिताशः श्रीकण्ठो नाम जनपदः
Transliteration
śrūyatām asti puṇyakṛtām adhivāso vāsavāvāsa iva vasudhām avatīrṇaḥ satatam asaṃkīrṇavarṇavyavahārasthitiḥ kṛtayugavyavasthaḥ sthalakamalabahalatayā potronmūlyamānamṛṇālair udgītamedinīsāraguṇair iva kṛtamadhukarakolāhalairhalair ullikhyamānakṣetraḥ kṣīrodapayaḥpāyipayodasiktābhir iva puṇḍrekṣuvāṭasaṃtatibhirnirantaraḥ pratidiśam apūrvaparvatakair iva khaladhānadhāmabhirvibhajyamānaiḥ sasyakūṭaiḥ saṃkaṭasakalasīmāntaḥ samantād udghātaghaṭīsicyamānairjīrakajūṭairjaṭilitabhūmiḥ urvarāvarīyobhiḥ śāleyair alaṃkṛtaḥ pākaviśarārurājamāṣanikarakirmīritaiśca sphuṭitamudgaphalakośīkapiśitairgodhūmadhāmabhiḥ sthalīpṛṣṭhair adhiṣṭhitaḥ mahiṣapṛṣṭhapratiṣṭhitagāyadgopālapālitaiśca kīṭapaṭalalampaṭacaṭakānusṛtair avaṭughaṭitaghaṇṭāghaṭīraṭitaramaṇīyair aṭadbhir aṭavīṃ haravṛṣabhapītam āmayāśaṅkayā bahudhāvibhaktaṃ kṣīrodam iva kṣīraṃ kṣaradbhirbāṣpacchedyatṛṇatṛptairgodhanairdhavalitavipinaḥ vividhamakhahomadhūmāndhaśatamanyumuktairlocanair iva sahasrasaṃkhyaiḥ kṛṣṇaśāraiḥ śārīkṛtoddeśaḥ dhavaladhūlimucā ketakīvanānāṃ rajobhiḥ pāṇḍurīkṛtaiḥ prathamoddhūlanabhasmadhūsaraiḥ śivapurasyeva praveśaiḥ pradeśair upaśobhitaḥ śākakandalaśyāmalitagrāmopakaṇṭhakāśyapīpṛṣṭhaḥ pade pade karabhapālībhiḥ pīlupallavaprasphoṭitaiḥ karapuṭapīḍitakomalamātuluṅgīdalarasopaliptaiḥ svecchāvicitakuṅkumakesarakṛtapuṣpaprakaraiḥ pratyagraphalarasapānasukhasuptapathikairvanadevatādīyamānāmṛtarasaprapāgṛhair iva drākṣālatāmaṇḍapaiḥ sphuratphalānāṃ ca bījalagnaśukacañcurāgāṇām iva samārūḍhakapikulakapolasaṃdihyamānakusumānāṃ dāḍimīnāṃ vanairvilobhanīyopanirgamaḥ vanapālapīyamānanārikelarasāsavaiśca pathikalokalupyamānapiṇḍakharjūrairgolāṅgūlalihyamānamadhurāmodapiṇḍīrasaiścakoracañcujarjaritārukair upavanair abhirāmaḥ tuṅgārjunapālīparivṛtaiśca gokulāvatārakaluṣitakūlakīlālair adhvagaśataśaraṇyair araṇyadharābandhair avandhyavanarandhraḥ karabhīyakumārakapālyamānair auṣṭrakair aurabhrakaiśca kṛtasaṃbādhaḥ diśi diśi ravirathaturagavilobhanāyaiva viloṭhanamṛditakuṅkumasthalīrasasamālabdhānām utprothapuṭair unmukhair udaraśāyikiśorakajavajananāya prabhañjanam iva cāpibantīnāṃ vātahariṇīnām iva svacchandacāriṇīnāṃ vaḍavānāṃ vṛndairvicaradbhir ācitaḥ anavaratakratudhūmāndhakārapravṛttairhaṃsayūthair iva guṇairdhavalitabhuvanaḥ saṃgītagatamurajaravamattairmayūrair iva vibhavairmukharitajīvalokaḥ śaśikarāvadātavṛttairmuktāphalair iva guṇibhiḥ prasādhitaḥ pathikaśatavilupyamānasphītaphalairmahātarubhir iva sarvātithibhir abhigamanīyaḥ mṛgamadaparimalavāhimṛgaromācchāditairhimavatpādair iva mahattaraiḥ sthirīkṛtaḥ proddaṇḍasahasrapatropaviṣṭadvijottamairnārāyaṇanābhimaṇḍalair iva toyāśayairmaṇḍitaḥ mathitapayaḥpravāhaprakṣālitakṣitibhiḥ kṣīrodamathanārambhair iva mahāghoṣaiḥ pūritāśaḥ śrīkaṇṭho nāma janapadaḥ
By System Admin
Translation
Draft in progress