Harshacharita · Ucchvasa 3 3.197
3.197ततः परिणते दिवसे केनापि कर्मसाधनाय कृतरुधिरबलिविधानास्व् इव लोहितायमानासु दिक्षु रुधिरबलिलम्पटासु च वेतालजिह्वास्व् इव लम्बमानासु च रविदीधितिषु नरेन्द्रानुरागेण गृहीतापरदिशि स्वयम् इव दिक्पालतां चिकीर्षति सवितरि यातुधानीष्व् इव वर्धमानासु तरुच्छायासु पातालतलवासिषु विघ्नाय दानवेष्व् इवोत्तिष्ठत्सु तमोमण्डलेषु नभसि पुञ्जीभवति रौद्रं कर्म दिदृक्षमाण इव नक्षत्रगणे विगाढायां शर्वर्याम्सुप्तजननिःशब्दस्तिमिते निशीथे राजा सान्तःपुरं परिजनं वञ्चयित्वा वामकरस्फुरत्सरुर्दक्षिणकरेणोत्खातं खड्गम् अट्टहासम् आदाय विसर्पता च खड्गप्रभापटलेन नीलांशुकपटेनेव दर्शनभयाद् अवगुण्ठितनिखिलगात्रयष्टिर् अनादिष्टयाप्य् अनुगम्यमानो राजलक्ष्म्या पृष्ठतः परिमललग्नमधुकरवेणिव्याजेन केशेष्व् इव कर्मसिद्धिम् आकर्षन्न् एकाकी नगरान्निरगात्
Transliteration
tataḥ pariṇate divase kenāpi karmasādhanāya kṛtarudhirabalividhānāsv iva lohitāyamānāsu dikṣu rudhirabalilampaṭāsu ca vetālajihvāsv iva lambamānāsu ca ravidīdhitiṣu narendrānurāgeṇa gṛhītāparadiśi svayam iva dikpālatāṃ cikīrṣati savitari yātudhānīṣv iva vardhamānāsu tarucchāyāsu pātālatalavāsiṣu vighnāya dānaveṣv ivottiṣṭhatsu tamomaṇḍaleṣu nabhasi puñjībhavati raudraṃ karma didṛkṣamāṇa iva nakṣatragaṇe vigāḍhāyāṃ śarvaryāmsuptajananiḥśabdastimite niśīthe rājā sāntaḥpuraṃ parijanaṃ vañcayitvā vāmakarasphuratsarurdakṣiṇakareṇotkhātaṃ khaḍgam aṭṭahāsam ādāya visarpatā ca khaḍgaprabhāpaṭalena nīlāṃśukapaṭeneva darśanabhayād avaguṇṭhitanikhilagātrayaṣṭir anādiṣṭayāpy anugamyamāno rājalakṣmyā pṛṣṭhataḥ parimalalagnamadhukaraveṇivyājena keśeṣv iva karmasiddhim ākarṣann ekākī nagarānniragāt
By System Admin
Translation
Draft in progress