29 shlokas
- 1
अथ यद् ऐन्द्राबार्हस्पत्यं ब्राह्मणाच्छंसिन उक्थं भवतीन्द्रश्च सोमं पिबतं बृहस्पते ऽस्मिन्यज्ञे मन्दसाना वृषण्वसू इत्य् ऋचाभ्यनूक्तम्
atha yad aindrābārhaspatyaṃ brāhmaṇācchaṃsina ukthaṃ bhavatīndraśca somaṃ pibataṃ bṛhaspate 'sminyajñe mandasānā vṛṣaṇvasū ity ṛcābhyanūktam
- 2
मद्वद्धि तृतीयसवनम्
madvaddhi tṛtīyasavanam
- 3
वयम् उ त्वाम् अपूर्व्य यो न इदमिदं पुरेति ब्राह्मणाच्छंसिन स्तोत्रियानुरूपौ
vayam u tvām apūrvya yo na idamidaṃ pureti brāhmaṇācchaṃsina stotriyānurūpau
- 4
प्र मंहिष्ठाय बृहते बृहद्रय इत्य् उक्थमुखम्
pra maṃhiṣṭhāya bṛhate bṛhadraya ity ukthamukham
- 5
ऐन्द्राजागतम्
aindrājāgatam
- 6
जागताः पशवः
jāgatāḥ paśavaḥ
- 7
पशूनाम् आप्त्यै
paśūnām āptyai
- 8
जागतम् उ वै तृतीयसवनम्
jāgatam u vai tṛtīyasavanam
- 9
तृतीयसवनस्य रूपम्
tṛtīyasavanasya rūpam
- 10
उदप्रुतो न वयो रक्षमाणा इति बार्हस्पत्यं सांशंसिकम्
udapruto na vayo rakṣamāṇā iti bārhaspatyaṃ sāṃśaṃsikam
- 11
अहं चेति बृहस्पतिर् अब्रवीत्
ahaṃ ceti bṛhaspatir abravīt
- 12
देवतयोः संशंसायानतिशंसाय
devatayoḥ saṃśaṃsāyānatiśaṃsāya
- 13
अच्छा म इन्द्रं मतयः स्वर्विद इति पर्यास ऐन्द्राबार्हस्पत्यः
acchā ma indraṃ matayaḥ svarvida iti paryāsa aindrābārhaspatyaḥ
- 14
ऐन्द्राबार्हस्पत्यम् अस्यैतन्नित्यम् उक्थम्
aindrābārhaspatyam asyaitannityam uktham
- 15
तद् एतत्स्वस्मिन्न् आयतने स्वस्यां प्रतिष्ठायां प्रतिष्ठापयति
tad etatsvasminn āyatane svasyāṃ pratiṣṭhāyāṃ pratiṣṭhāpayati
- 16
द्वन्द्वं वा एता देवता भूत्वा व्यजयन्त
dvandvaṃ vā etā devatā bhūtvā vyajayanta
- 17
विजित्या एव
vijityā eva
- 18
अथो द्वन्द्वस्यैव मिथुनस्य प्रजात्यै
atho dvandvasyaiva mithunasya prajātyai
- 19
बृहस्पतिर्नः परि पातु पश्चाद् इत्य् ऐन्द्राबार्हस्पत्या परिदधाति
bṛhaspatirnaḥ pari pātu paścād ity aindrābārhaspatyā paridadhāti
- 20
इन्द्राबृहस्पत्योर् एव यज्ञं प्रतिष्ठापयति
indrābṛhaspatyor eva yajñaṃ pratiṣṭhāpayati
- 21
उतोत्तरस्माद् अधराद् अघायोर् इन्द्रः पुरस्ताद् उत मध्यतो नः सखा सखिभ्यो वरिवः कृणोत्व् इति
utottarasmād adharād aghāyor indraḥ purastād uta madhyato naḥ sakhā sakhibhyo varivaḥ kṛṇotv iti
- 22
सर्वाभ्य एव दिग्भ्य आशिषम् आशास्ते नार्त्वी
sarvābhya eva digbhya āśiṣam āśāste nārtvī
- 23
यं कामं कामयते सो ऽस्मै कामः समृध्यते य एवं वेद यश्चैवं विद्वान्ब्राह्मणाच्छंस्य् एतया परिदधाति
yaṃ kāmaṃ kāmayate so 'smai kāmaḥ samṛdhyate ya evaṃ veda yaścaivaṃ vidvānbrāhmaṇācchaṃsy etayā paridadhāti
- 24
बृहस्पते युवम् इन्द्रश्च वस्व इति यजति
bṛhaspate yuvam indraśca vasva iti yajati
- 25
एते एव तद्देवते यथाभागं प्रीणाति
ete eva taddevate yathābhāgaṃ prīṇāti
- 26
वषट्कृत्यानुवषट्करोति
vaṣaṭkṛtyānuvaṣaṭkaroti
- 27
प्रत्य् एवाभिमृशन्ते
praty evābhimṛśante
- 28
नाप्याययन्ति
nāpyāyayanti
- 29
न ह्य् अनाराशंसाः सीदन्ति
na hy anārāśaṃsāḥ sīdanti

