11 shlokas
- 1
ॐ देवपात्रं वै वषट्कारः
oṃ devapātraṃ vai vaṣaṭkāraḥ
- 2
यद्वषट्करोति देवपात्रेणैव तद्देवतास्तर्पयति
yadvaṣaṭkaroti devapātreṇaiva taddevatāstarpayati
- 3
अथो यदाभितृष्यन्तीर् अभिसंस्थं तर्पयत्य् एवम् एव तद्देवतास्तर्पयति यद् अनुवषट्करोति
atho yadābhitṛṣyantīr abhisaṃsthaṃ tarpayaty evam eva taddevatāstarpayati yad anuvaṣaṭkaroti
- 4
तद्यथैवादो ऽश्वान्वा गा वा पुनर् अभ्याकारं तर्पयत्य् एवम् एव तद्देवतास्तर्पयति यद् अनुवषट्करोति
tadyathaivādo 'śvānvā gā vā punar abhyākāraṃ tarpayaty evam eva taddevatāstarpayati yad anuvaṣaṭkaroti
- 5
इमान् एवाग्नीन् उपासत इत्य् आहुर्धिष्ण्यान्
imān evāgnīn upāsata ity āhurdhiṣṇyān
- 6
अथ कस्मात्पूर्वस्मिन्न् एवाग्नौ जुह्वति पूर्वस्मिन्वषट्करोति
atha kasmātpūrvasminn evāgnau juhvati pūrvasminvaṣaṭkaroti
- 7
यद् एव सोमस्याग्ने वीहीत्य् अनुवषट्करोति तेनैव वषट्करोति धिष्ण्यान्प्रीणाति
yad eva somasyāgne vīhīty anuvaṣaṭkaroti tenaiva vaṣaṭkaroti dhiṣṇyānprīṇāti
- 8
अथ संस्थितान्सोमान्भक्षयन्तीत्य् आहुर्येषां नानुवषट्करोति
atha saṃsthitānsomānbhakṣayantīty āhuryeṣāṃ nānuvaṣaṭkaroti
- 9
तद् आहुः को नु सोमस्य स्विष्टकृद्भाग इति
tad āhuḥ ko nu somasya sviṣṭakṛdbhāga iti
- 10
यद् एव सोमस्याग्ने वीहीत्य् अनुवषट्करोति तेनैव संस्थितान्सोमान्भक्षयन्तीत्य् आहुः
yad eva somasyāgne vīhīty anuvaṣaṭkaroti tenaiva saṃsthitānsomānbhakṣayantīty āhuḥ
- 11
स उ एष सोमस्य स्विष्टकृद्भागो यद् अनुवषट्करोति
sa u eṣa somasya sviṣṭakṛdbhāgo yad anuvaṣaṭkaroti

