26 shlokas
- 1
द्वौ लोके धृतव्रतौ राजा ब्राह्मणश्च बहुश्रुतः
dvau loke dhṛtavratau rājā brāhmaṇaśca bahuśrutaḥ
- 2
तयोश्चतुर्विधस्य मनुष्यजातस्यान्तःसंज्ञानां चलनपतनसर्पणानाम् आयत्तं जीवनम्
tayoścaturvidhasya manuṣyajātasyāntaḥsaṃjñānāṃ calanapatanasarpaṇānām āyattaṃ jīvanam
- 3
प्रसूतिरक्षणम् असंकरो धर्मः
prasūtirakṣaṇam asaṃkaro dharmaḥ
- 4
स एव बहुश्रुतो भवति
sa eva bahuśruto bhavati
- 5
लोकवेदवेदाङ्गवित्
lokavedavedāṅgavit
- 6
वाकोवाक्येतिहासपुराणकुशलः
vākovākyetihāsapurāṇakuśalaḥ
- 7
तदपेक्षस्तद्वृत्तिः
tadapekṣastadvṛttiḥ
- 8
चत्वारिंशत्संस्कारैः संस्कृतः
catvāriṃśatsaṃskāraiḥ saṃskṛtaḥ
- 9
त्रिषु कर्मस्व् अभिरतः
triṣu karmasv abhirataḥ
- 10
षट्सु वा
ṣaṭsu vā
- 11
सामयाचारिकेष्व् अभिविनीतः
sāmayācārikeṣv abhivinītaḥ
- 12
षड्भिः परिहार्यो राज्ञा
ṣaḍbhiḥ parihāryo rājñā
- 13
अवध्यश्चाबन्ध्यश्चादण्ड्यश्चाबहिष्कार्यश्चापरिवाद्यश्चापरिहार्यश्चेति
avadhyaścābandhyaścādaṇḍyaścābahiṣkāryaścāparivādyaścāparihāryaśceti
- 14
गर्भाधानपुंसवनसीमन्तोन्नयनजातकर्मनामकरणान्नप्राशनचौलोपनयनम्
garbhādhānapuṃsavanasīmantonnayanajātakarmanāmakaraṇānnaprāśanacaulopanayanam
- 15
चत्वारि वेदव्रतानि
catvāri vedavratāni
- 16
स्नानं सहधर्मचारिणीसंयोगः
snānaṃ sahadharmacāriṇīsaṃyogaḥ
- 17
पञ्चानां यज्ञानाम् अनुष्ठानं देवपितृमनुष्यभूतब्राह्मणानाम्
pañcānāṃ yajñānām anuṣṭhānaṃ devapitṛmanuṣyabhūtabrāhmaṇānām
- 18
एतेषां च
eteṣāṃ ca
- 19
अष्टका पार्वणः श्राद्धम्श्रावण्याग्रहायणीचैत्र्याश्वयुजीति सप्त पाकयज्ञसंस्थाः
aṣṭakā pārvaṇaḥ śrāddhamśrāvaṇyāgrahāyaṇīcaitryāśvayujīti sapta pākayajñasaṃsthāḥ
- 20
अग्न्याधेयम् अग्निहोत्रं दर्शपूर्णमासावाग्रयणं चातुर्मास्यानि निरूढपशुबन्धः सौत्रामणीति सप्तहविर्यज्ञसंस्थाः
agnyādheyam agnihotraṃ darśapūrṇamāsāvāgrayaṇaṃ cāturmāsyāni nirūḍhapaśubandhaḥ sautrāmaṇīti saptahaviryajñasaṃsthāḥ
- 21
अग्निष्टोमो ऽत्यग्निष्टोम उक्थ्यः षोडशी वाजपेयो ऽतिरात्रो ऽप्तोर्याम इति सप्त सोमसंस्थाः
agniṣṭomo 'tyagniṣṭoma ukthyaḥ ṣoḍaśī vājapeyo 'tirātro 'ptoryāma iti sapta somasaṃsthāḥ
- 22
इत्य् एते चत्वारिंशत्संस्काराः
ity ete catvāriṃśatsaṃskārāḥ
- 23
अथाष्टाव् आत्मगुणाः
athāṣṭāv ātmaguṇāḥ
- 24
दया सर्वभूतेषु क्षान्तिर् अनसूया शौचम् अनायासो मङ्गलम् अकार्पण्यम् अस्पृहेति
dayā sarvabhūteṣu kṣāntir anasūyā śaucam anāyāso maṅgalam akārpaṇyam aspṛheti
- 25
यस्यैते चत्वारिंशत्संस्कारा न चाष्टाव् आत्मगुणा न स ब्रह्मणः सायुज्यं सालोक्यं गच्छति
yasyaite catvāriṃśatsaṃskārā na cāṣṭāv ātmaguṇā na sa brahmaṇaḥ sāyujyaṃ sālokyaṃ gacchati
- 26
यस्य तु खलु संस्काराणामेकदेशो ऽप्य् अष्टाव् आत्मगुणा अथ स ब्रह्मणः सायुज्यं सालोक्यं च गच्छति
yasya tu khalu saṃskārāṇāmekadeśo 'py aṣṭāv ātmaguṇā atha sa brahmaṇaḥ sāyujyaṃ sālokyaṃ ca gacchati

