88 shlokas
- 1
मार्जारोष्ट्रवृकवराहश्वाविद्वागुलीनप्तृकाकोलूकानाम् अन्येषां वा निशाचराणां सत्त्वानाम् एकस्य द्वयोर्बहूनां वा दक्षिणानि वामानि चाक्षीणि गृहीत्वा द्विधा चूर्णं कारयेत्
mārjāroṣṭravṛkavarāhaśvāvidvāgulīnaptṛkākolūkānām anyeṣāṃ vā niśācarāṇāṃ sattvānām ekasya dvayorbahūnāṃ vā dakṣiṇāni vāmāni cākṣīṇi gṛhītvā dvidhā cūrṇaṃ kārayet
- 2
ततो दक्षिणं वामेन वामं दक्षिणेन समभ्यज्य रात्रौ तमसि च पश्यति
tato dakṣiṇaṃ vāmena vāmaṃ dakṣiṇena samabhyajya rātrau tamasi ca paśyati
- 3
एकाम्लकं वराहाक्षि खद्योतः कालशारिवा
एतेनाभ्यक्तनयनो रात्रौ रूपाणि पश्यति
ekāmlakaṃ varāhākṣi khadyotaḥ kālaśārivā
etenābhyaktanayano rātrau rūpāṇi paśyati
- 4
त्रिरात्रोपोषितः पुष्येण शस्त्रहतस्य शूलप्रोतस्य वा पुंसः शिरःकपाले मृत्तिकायां यवान् आवास्याविक्षीरेण सेचयेत्
trirātropoṣitaḥ puṣyeṇa śastrahatasya śūlaprotasya vā puṃsaḥ śiraḥkapāle mṛttikāyāṃ yavān āvāsyāvikṣīreṇa secayet
- 5
ततो यवविरूढमालाम् आबध्य नष्टच्छायारूपश्चरति
tato yavavirūḍhamālām ābadhya naṣṭacchāyārūpaścarati
- 6
त्रिरात्रोपोषितः पुष्येण श्वमार्जारोलूकवागुलीनां दक्षिणानि वामानि चाक्षीणि द्विधा चूर्णं कारयेत्
trirātropoṣitaḥ puṣyeṇa śvamārjārolūkavāgulīnāṃ dakṣiṇāni vāmāni cākṣīṇi dvidhā cūrṇaṃ kārayet
- 7
ततो यथास्वम् अभ्यक्ताक्षो नष्टच्छायारूपश्चरति
tato yathāsvam abhyaktākṣo naṣṭacchāyārūpaścarati
- 8
त्रिरात्रोपोषितः पुष्येण पुरुषघातिनः काण्डकस्य शलाकाम् अञ्जनीं च कारयेत्
trirātropoṣitaḥ puṣyeṇa puruṣaghātinaḥ kāṇḍakasya śalākām añjanīṃ ca kārayet
- 9
ततो ऽन्यतमेनाक्षिचूर्णेनाभ्यक्ताक्षो नष्टच्छायारूपश्चरति
tato 'nyatamenākṣicūrṇenābhyaktākṣo naṣṭacchāyārūpaścarati
- 10
त्रिरात्रोपोषितः पुष्येण कालायसीम् अञ्जनीं शलाकां च कारयेत्
trirātropoṣitaḥ puṣyeṇa kālāyasīm añjanīṃ śalākāṃ ca kārayet
- 11
ततो निशाचराणां सत्त्वानाम् अन्यतमस्य शिरःकपालम् अञ्जनेन पूरयित्वा मृतायाः स्त्रिया योनौ प्रवेश्य दाहयेत्
tato niśācarāṇāṃ sattvānām anyatamasya śiraḥkapālam añjanena pūrayitvā mṛtāyāḥ striyā yonau praveśya dāhayet
- 12
तद् अञ्जनं पुष्येणोद्धृत्य तस्याम् अञ्जन्यां निदध्यात्
tad añjanaṃ puṣyeṇoddhṛtya tasyām añjanyāṃ nidadhyāt
- 13
तेनाभ्यक्ताक्षो नष्टछायारूपश्चरति
tenābhyaktākṣo naṣṭachāyārūpaścarati
- 14
यत्र ब्राह्मणम् आहिताग्निं दग्धं दह्यमानं वा पश्येत्तत्र त्रिरात्रोपोषितः पुष्येण स्वयंमृतस्य वाससा प्रसेवं कृत्वा चिताभस्मना पूरयित्वा तम् आबध्य नष्टच्छायारूपश्चरति
yatra brāhmaṇam āhitāgniṃ dagdhaṃ dahyamānaṃ vā paśyettatra trirātropoṣitaḥ puṣyeṇa svayaṃmṛtasya vāsasā prasevaṃ kṛtvā citābhasmanā pūrayitvā tam ābadhya naṣṭacchāyārūpaścarati
- 15
ब्राह्मणस्य प्रेतकार्ये यो गौर्मार्यते तस्यास्थिमज्जचूर्णपूर्णाहिभस्त्रा पशूनाम् अन्तर्धानम्
brāhmaṇasya pretakārye yo gaurmāryate tasyāsthimajjacūrṇapūrṇāhibhastrā paśūnām antardhānam
- 16
सर्पदष्टस्य भस्मना पूर्णा प्रचलाकभस्त्रा मृगाणाम् अन्तर्धानम्
sarpadaṣṭasya bhasmanā pūrṇā pracalākabhastrā mṛgāṇām antardhānam
- 17
उलूकवागुलीपुच्छपुरीषजान्वस्थिचूर्णपूर्णाहिभस्त्रा पक्षिणाम् अन्तर्धानम्
ulūkavāgulīpucchapurīṣajānvasthicūrṇapūrṇāhibhastrā pakṣiṇām antardhānam
- 18
इत्यष्टावन्तर्धानयोगः
ityaṣṭāvantardhānayogaḥ
- 19
बलिं वैरोचनं वन्दे शतमायं च शम्बरम्
भण्डीरपाकं नरकं निकुम्भं कुम्भम् एव च
baliṃ vairocanaṃ vande śatamāyaṃ ca śambaram
bhaṇḍīrapākaṃ narakaṃ nikumbhaṃ kumbham eva ca
- 20
देवलं नारदं वन्दे वन्दे सावर्णिगालवम्
एतेषाम् अनुयोगेन कृतं ते स्वापनं महत्
devalaṃ nāradaṃ vande vande sāvarṇigālavam
eteṣām anuyogena kṛtaṃ te svāpanaṃ mahat
- 21
यथा स्वपन्त्यजगराः स्वपन्त्यपि चमूखलाः
तथा स्वपन्तु पुरुषा ये च ग्रामे कुतूहलाः
yathā svapantyajagarāḥ svapantyapi camūkhalāḥ
tathā svapantu puruṣā ye ca grāme kutūhalāḥ
- 22
भण्डकानां सहस्रेण रथनेमिशतेन च
इमं गृहं प्रवेक्ष्यामि तूष्णीम् आसन्तु भाण्डकाः
bhaṇḍakānāṃ sahasreṇa rathanemiśatena ca
imaṃ gṛhaṃ pravekṣyāmi tūṣṇīm āsantu bhāṇḍakāḥ
- 23
नमस्कृत्वा च मनवे बद्ध्वा शुनकफेलकाः
ये देवा देवलोकेषु मानुषेषु च ब्राह्मणाः
namaskṛtvā ca manave baddhvā śunakaphelakāḥ
ye devā devalokeṣu mānuṣeṣu ca brāhmaṇāḥ
- 24
अध्ययनपारगाः सिद्धा ये च कैलासतापसाः
एतेभ्यः सर्वसिद्धेभ्यः कृतं ते स्वापनं महत्
adhyayanapāragāḥ siddhā ye ca kailāsatāpasāḥ
etebhyaḥ sarvasiddhebhyaḥ kṛtaṃ te svāpanaṃ mahat
- 25
अतिगच्छन्ति च मय्यपगच्छन्तु संहताः
atigacchanti ca mayyapagacchantu saṃhatāḥ
- 26
अलिते वलिते मनवे स्वाहा
alite valite manave svāhā
- 27
एतस्य प्रयोगः
etasya prayogaḥ
- 28
त्रिरात्रोपोषितः कृष्णचतुर्दश्यां पुष्ययोगिन्यां श्वपाकीहस्ताद्विलेखावलेखनं क्रीणीयात्
trirātropoṣitaḥ kṛṣṇacaturdaśyāṃ puṣyayoginyāṃ śvapākīhastādvilekhāvalekhanaṃ krīṇīyāt
- 29
तन्माषैः सह कण्डोलिकायां कृत्वासंकीर्ण आदहने निखानयेत्
tanmāṣaiḥ saha kaṇḍolikāyāṃ kṛtvāsaṃkīrṇa ādahane nikhānayet
- 30
द्वितीयस्यां चतुर्दश्याम् उद्धृत्य कुमार्या पेषयित्वा गुलिकाः कारयेत्
dvitīyasyāṃ caturdaśyām uddhṛtya kumāryā peṣayitvā gulikāḥ kārayet

