4 shlokas
- 1
तद् आहुर्यस्याग्निहोत्र्य् उपावसृष्टा दुह्यमानोपविशेत्का तत्र प्रायश्चित्तिर् इति ताम् अभिमन्त्रयेत
tad āhuryasyāgnihotry upāvasṛṣṭā duhyamānopaviśetkā tatra prāyaścittir iti tām abhimantrayeta
- 2
यस्माद्भीषा निषीदसि ततो नो अभयं कृधि पशून्नः सर्वान्गोपाय नमो रुद्राय मीᄆहुष इति ताम् उत्थापयेद् उदस्थाद्देव्य् अदितिर् आयुर्यज्ञपताव् अधात् इन्द्राय कृण्वती भागम्मित्राय वरुणाय चेत्य् अथास्या उदपात्रम् ऊधसि च मुखे चोपगृह्णीयाद् अथैनाम्ब्राह्मणाय दद्यात्सा तत्र प्रायश्चित्तिः
yasmādbhīṣā niṣīdasi tato no abhayaṃ kṛdhi paśūnnaḥ sarvāngopāya namo rudrāya mīᄆhuṣa iti tām utthāpayed udasthāddevy aditir āyuryajñapatāv adhāt indrāya kṛṇvatī bhāgammitrāya varuṇāya cety athāsyā udapātram ūdhasi ca mukhe copagṛhṇīyād athaināmbrāhmaṇāya dadyātsā tatra prāyaścittiḥ
- 3
तद् आहुर्यस्याग्निहोत्र्य् उपावसृष्टा दुह्यमाना वाश्येत का तत्र प्रायश्चित्तिर् इत्य् अशनायां ह वा एषा यजमानस्य प्रतिख्याय वाश्यते ताम् अन्नम् अप्य् आदयेच्छान्त्यै शान्तिर्वा अन्नं सूयवसाद्भगवती हि भूया इति सा तत्र प्रायश्चित्तिः
tad āhuryasyāgnihotry upāvasṛṣṭā duhyamānā vāśyeta kā tatra prāyaścittir ity aśanāyāṃ ha vā eṣā yajamānasya pratikhyāya vāśyate tām annam apy ādayecchāntyai śāntirvā annaṃ sūyavasādbhagavatī hi bhūyā iti sā tatra prāyaścittiḥ
- 4
तद् आहुर्यस्याग्निहोत्र्य् उपावसृष्टा दुह्यमाना स्यन्देत का तत्र प्रायश्चित्तिर् इति सा यत्तत्र स्कन्दयेत्तद् अभिमृश्य जपेद्यद् अद्य दुग्धम्पृथिवीम् असृप्त यद् ओषधीर् अत्यसृपद्यद् आपः पयो गृहेषु पयो अघ्न्यायाम्पयो वत्सेषु पयो अस्तु तन्मयीति तत्र यत्परिशिष्टं स्यात्तेन जुहुयाद्यद्य् अलं होमाय स्याद्यद्य् उ वै सर्वं सिक्तं स्याद् अथान्याम् आहूय तां दुग्ध्वा तेन जुहुयाद् आ त्व् एव श्रद्धायै होतव्यं सा तत्र प्रायश्चित्तिः
tad āhuryasyāgnihotry upāvasṛṣṭā duhyamānā syandeta kā tatra prāyaścittir iti sā yattatra skandayettad abhimṛśya japedyad adya dugdhampṛthivīm asṛpta yad oṣadhīr atyasṛpadyad āpaḥ payo gṛheṣu payo aghnyāyāmpayo vatseṣu payo astu tanmayīti tatra yatpariśiṣṭaṃ syāttena juhuyādyady alaṃ homāya syādyady u vai sarvaṃ siktaṃ syād athānyām āhūya tāṃ dugdhvā tena juhuyād ā tv eva śraddhāyai hotavyaṃ sā tatra prāyaścittiḥ

