15 shlokas
- 1
तद् इद् आस भुवनेषु ज्येष्ठं तां सु ते कीर्तिं मघवन्महित्वा भूय इद्वावृधे वीर्याय
tad id āsa bhuvaneṣu jyeṣṭhaṃ tāṃ su te kīrtiṃ maghavanmahitvā bhūya idvāvṛdhe vīryāya
- 2
नृणाम् उ त्वा नृतमं गीर्भिर् उक्थैर् इति तिस्रः
nṛṇām u tvā nṛtamaṃ gīrbhir ukthair iti tisraḥ
- 3
अत्र हैके स्वादोः स्वादीयः स्वादुना सृजा सम् अदः सु मधु मधुनाभि योधीर् इत्य् आत्मन एते पदे उद्धृत्य पक्षपदे प्रत्यवदधात्य् अश्वायन्तो मघवन्न् इन्द्र वाजिनो गाम् अश्वं रथ्यम् इन्द्र सं किरेत्य् एतयोश्च स्थान इतरे
atra haike svādoḥ svādīyaḥ svādunā sṛjā sam adaḥ su madhu madhunābhi yodhīr ity ātmana ete pade uddhṛtya pakṣapade pratyavadadhāty aśvāyanto maghavann indra vājino gām aśvaṃ rathyam indra saṃ kirety etayośca sthāna itare
- 4
श्रियम् अह गोर् अश्वम् आत्मन्धत्ते सं पक्षयोः पतनाय
śriyam aha gor aśvam ātmandhatte saṃ pakṣayoḥ patanāya
- 5
नदं व ओदतीनाम् इत्य् एतयैतानि व्यतिषजति पादैः पादान्बृहतीकारं नदवन्त्य् उत्तराणि प्रथमायां च पुरुषाक्षराण्य् उपदधाति पादेष्व् एकैकम् अवसाने तृतीयवर्जं स खलु विहरति
nadaṃ va odatīnām ity etayaitāni vyatiṣajati pādaiḥ pādānbṛhatīkāraṃ nadavanty uttarāṇi prathamāyāṃ ca puruṣākṣarāṇy upadadhāti pādeṣv ekaikam avasāne tṛtīyavarjaṃ sa khalu viharati
- 6
अपि निदर्शनायोदाहरिष्यामः
api nidarśanāyodāhariṣyāmaḥ
- 7
तद् इद् आस भुवनेषु ज्येष्ठम्पु
नदं व ओदतीनाम्
यतो जज्ञ उग्रस्त्वेषनृम्णो रु
नदं योयुवतीनो३म्
tad id āsa bhuvaneṣu jyeṣṭhampu
nadaṃ va odatīnām
yato jajña ugrastveṣanṛmṇo ru
nadaṃ yoyuvatīno3m
- 8
सद्यो जज्ञानो नि रिणाति शत्रून्
पतिं वो अघ्न्यानाम्
अनु यं विश्वे मदन्त्य् ऊमाः षो
धेनूनाम् इषुध्यसो३म् इति
sadyo jajñāno ni riṇāti śatrūn
patiṃ vo aghnyānām
anu yaṃ viśve madanty ūmāḥ ṣo
dhenūnām iṣudhyaso3m iti
- 9
एवम् एतां त्रिः
evam etāṃ triḥ
- 10
अन्यासु चेत्समाम्नातासु राजनेन साम्ना स्तुवीरन्यथास्थानं ता इहैवेमाः
anyāsu cetsamāmnātāsu rājanena sāmnā stuvīranyathāsthānaṃ tā ihaivemāḥ
- 11
असमाम्नातासु चेत्स्तुवीरन्समाम्नातस्य तावतीर् उद्धृत्य तत्र ताः शंसेद् इहो एवेमाः
asamāmnātāsu cetstuvīransamāmnātasya tāvatīr uddhṛtya tatra tāḥ śaṃsed iho evemāḥ
- 12
अन्यासु चेत्प्राक्सूददोहसस्ताः
anyāsu cetprāksūdadohasastāḥ
- 13
तद् इद् आसेत्य् एतदादि शस्त्रम्
tad id āsety etadādi śastram
- 14
अविहृतश्चात्र प्रतिगरः
avihṛtaścātra pratigaraḥ
- 15
ता अस्य सूददोहस इत्य् एतदादिः सूददोहाः सूददोहाः
tā asya sūdadohasa ity etadādiḥ sūdadohāḥ sūdadohāḥ

