17 shlokas
- 1
प्र वो महे मन्दमानायान्धस इत्य् ऐन्द्रे निष्केवल्ये निविदं दधाति प्रत्यक्षाद्ध्येव तद् आत्मन्वीर्यं धत्ते
pra vo mahe mandamānāyāndhasa ity aindre niṣkevalye nividaṃ dadhāti pratyakṣāddhyeva tad ātmanvīryaṃ dhatte
- 2
तास्त्रिष्टुब्जगत्यो भवन्ति
tāstriṣṭubjagatyo bhavanti
- 3
तद् आहुर् अथ कस्मात्त्रिष्टुब्जगतीषु निविदं दधातीति
tad āhur atha kasmāttriṣṭubjagatīṣu nividaṃ dadhātīti
- 4
न ह वा एतस्याह्न एकं छन्दो निविदं दाधार न विव्याचेति तस्मात्त्रिष्टुब्जगतीषु निविदं दधाति
na ha vā etasyāhna ekaṃ chando nividaṃ dādhāra na vivyāceti tasmāttriṣṭubjagatīṣu nividaṃ dadhāti
- 5
तद् एतद् अहस्त्रिनिवित्कं विद्याद्वशो निविद्वालखिल्या निविन्निविद् एव निविद् एवम् एनत्त्रिनिवित्कं विद्यात्
tad etad ahastrinivitkaṃ vidyādvaśo nividvālakhilyā nivinnivid eva nivid evam enattrinivitkaṃ vidyāt
- 6
अथ सूक्ते वने न वा यो न्य् अधायि चाकन्यो जात एव प्रथमो मनस्वान् इति तयोर् अस्त्य् अन्ने समस्य यद् असन्मनीषा इत्य् अन्नाद्यस्यावरुद्ध्यै
atha sūkte vane na vā yo ny adhāyi cākanyo jāta eva prathamo manasvān iti tayor asty anne samasya yad asanmanīṣā ity annādyasyāvaruddhyai
- 7
अथावपनम् एते अन्तरेणैन्द्रीणां दशतीनां त्रिष्टुब्जगतीनां बृहतीसम्पन्नानां यावतीर् आवपन्ते तावन्त्य् ऊर्ध्वम् आयुषो वर्षाणि जीवन्त्य् एतेन हैवावपनेनायुर् आप्यते
athāvapanam ete antareṇaindrīṇāṃ daśatīnāṃ triṣṭubjagatīnāṃ bṛhatīsampannānāṃ yāvatīr āvapante tāvanty ūrdhvam āyuṣo varṣāṇi jīvanty etena haivāvapanenāyur āpyate
- 8
प्रजां मे पशवो ऽर्जयन्न् इति त्व् एव सजनीयम् अनुशंसति
prajāṃ me paśavo 'rjayann iti tv eva sajanīyam anuśaṃsati
- 9
तार्क्ष्यं शंसति स्वस्त्ययनं वै तार्क्ष्यः स्वस्तितायै स्वस्त्ययनम् एव तत्कुरुते
tārkṣyaṃ śaṃsati svastyayanaṃ vai tārkṣyaḥ svastitāyai svastyayanam eva tatkurute
- 10
एकपदां शंसत्य् एकधेदं सर्वम् असानीत्य् अथो सर्वां छन्दस्कृतिम् आप्नवानीति
ekapadāṃ śaṃsaty ekadhedaṃ sarvam asānīty atho sarvāṃ chandaskṛtim āpnavānīti
- 11
इन्द्रं विश्वा अवीवृधन्न् इति पदानुषङ्गास्ताः सप्तानुषजति सप्त वै शीर्षन्प्राणाः शीर्षन्न् एव तत्प्राणान्दधात्य् अष्टमीं नानुषजति वाग् अष्टमी नेन्मे वाक्प्राणैर् अनुषक्तासद् इति तस्माद् उ सा वाक्समानायतना प्राणैः सत्य् अननुषक्ता
indraṃ viśvā avīvṛdhann iti padānuṣaṅgāstāḥ saptānuṣajati sapta vai śīrṣanprāṇāḥ śīrṣann eva tatprāṇāndadhāty aṣṭamīṃ nānuṣajati vāg aṣṭamī nenme vākprāṇair anuṣaktāsad iti tasmād u sā vāksamānāyatanā prāṇaiḥ saty ananuṣaktā
- 12
विराजः शंसत्य् अन्नं वै विराजो ऽन्नाद्यस्यावरुद्ध्यै
virājaḥ śaṃsaty annaṃ vai virājo 'nnādyasyāvaruddhyai
- 13
वासिष्ठेन परिदधाति वसिष्ठो ऽसानीति
vāsiṣṭhena paridadhāti vasiṣṭho 'sānīti
- 14
एष स्तोमो मह उग्राय वाह इति महद्वत्या रूपसमृद्धया
eṣa stomo maha ugrāya vāha iti mahadvatyā rūpasamṛddhayā
- 15
धुरीवात्यो न वाजयन्न् अधायीत्य् अन्तो वै धुर् अन्त एतद् अहर् एतस्याह्नो रूपम्
dhurīvātyo na vājayann adhāyīty anto vai dhur anta etad ahar etasyāhno rūpam
- 16
इन्द्र त्वायम् अर्क ईट्टे वसूनाम् इत्य् अर्कवत्या रूपसमृद्धया
indra tvāyam arka īṭṭe vasūnām ity arkavatyā rūpasamṛddhayā
- 17
दिवीव द्याम् अधि नः श्रोमतं धा इति यत्र ह क्व च ब्रह्मण्या वाग् उद्यते तद्धास्य कीर्तिर्भवति यत्रैवं विद्वान् एतया परिदधाति तस्माद् एवं विद्वान् एतयैव परिदध्यात्
divīva dyām adhi naḥ śromataṃ dhā iti yatra ha kva ca brahmaṇyā vāg udyate taddhāsya kīrtirbhavati yatraivaṃ vidvān etayā paridadhāti tasmād evaṃ vidvān etayaiva paridadhyāt

