10 shlokas
- 1
चर्यापञ्चकं त्व् अनाश्रितावधूतोन्मत्तसर्वभक्ष्यमहाव्यापकस्वरूपम्
caryāpañcakaṃ tv anāśritāvadhūtonmattasarvabhakṣyamahāvyāpakasvarūpam
- 2
तस्य उदयो नियतानियतशक्तिसमूहान्तरोदितो विकासस्वभाव उल्लासः
tasya udayo niyatāniyataśaktisamūhāntarodito vikāsasvabhāva ullāsaḥ
- 3
तस्मिन्सति निस्तरङ्गसमावेशः आणवशाक्तशाम्भवोदयरूपसमस्ततरंगपरिवर्जितसमावेशलक्षणनिरुत्तरसमावेशधर्मैव प्रथत इत्य् अर्थः
tasminsati nistaraṅgasamāveśaḥ āṇavaśāktaśāmbhavodayarūpasamastataraṃgaparivarjitasamāveśalakṣaṇaniruttarasamāveśadharmaiva prathata ity arthaḥ
- 4
चर्यापञ्चकक्रमं च वितत्य निरूपयामि
caryāpañcakakramaṃ ca vitatya nirūpayāmi
- 5
तत्र अनाश्रिता निराधारत्वात्परमाकाशरूपा श्रोत्रसुषिरप्रदेशगमनेन स्वग्राह्यवस्तूपसंहरणाय उद्गता
tatra anāśritā nirādhāratvātparamākāśarūpā śrotrasuṣirapradeśagamanena svagrāhyavastūpasaṃharaṇāya udgatā
- 6
अवधूता च अनियततया सर्वत्रविहरणदृक्शक्तिमार्गेण स्वसंहार्यस्वीकरणाय उन्मिषिता
avadhūtā ca aniyatatayā sarvatraviharaṇadṛkśaktimārgeṇa svasaṃhāryasvīkaraṇāya unmiṣitā
- 7
उन्मत्ता च विचित्तवत्स्वतन्त्रतया ग्राह्याग्राह्यसम्बन्धाविवक्षया स्वविषयग्रहणाय प्रथिता
unmattā ca vicittavatsvatantratayā grāhyāgrāhyasambandhāvivakṣayā svaviṣayagrahaṇāya prathitā
- 8
सर्वभक्ष्या भक्ष्यसंस्कारनिखिलकवलनशीला स्वसंहार्यपदार्थग्रसनाय उदिता
sarvabhakṣyā bhakṣyasaṃskāranikhilakavalanaśīlā svasaṃhāryapadārthagrasanāya uditā
- 9
सर्वव्यापिका च त्वग्वृत्तिगमनिकया निखिलव्यापकत्वात् अशेषस्पर्शस्वीकरणाय उन्मिषिता इति चर्यापञ्चकोदयः
sarvavyāpikā ca tvagvṛttigamanikayā nikhilavyāpakatvāt aśeṣasparśasvīkaraṇāya unmiṣitā iti caryāpañcakodayaḥ
- 10
सततसिद्धचर्याक्रमं निरूप्य इदानीं निर्निकेतपरज्ञानप्रकाशावलम्बनेन पुण्यपापनिवृत्तिकथां निरूपयन्ति
satatasiddhacaryākramaṃ nirūpya idānīṃ nirniketaparajñānaprakāśāvalambanena puṇyapāpanivṛttikathāṃ nirūpayanti

