31 shlokas
- 1
इह यो ऽयं प्रकाशात्मा स्वस्वभावः शांकर उक्तः असौ
व्यवस्थितः करोत्येष विश्वकारणम् ईश्वरः
सृष्टिं स्थितिं च संहारं तिरोधानमनुग्रहम्
iha yo 'yaṃ prakāśātmā svasvabhāvaḥ śāṃkara uktaḥ asau
vyavasthitaḥ karotyeṣa viśvakāraṇam īśvaraḥ
sṛṣṭiṃ sthitiṃ ca saṃhāraṃ tirodhānamanugraham
- 2
इति श्रीस्वच्छन्दशास्त्रदृष्ट्या निजशक्त्याश्लिष्टः सदा पञ्चविधकृत्यकारी स्वतन्त्रः स्पन्दललितेश्वरादिशब्दैर् आगमेषूद्घोष्यते
iti śrīsvacchandaśāstradṛṣṭyā nijaśaktyāśliṣṭaḥ sadā pañcavidhakṛtyakārī svatantraḥ spandalaliteśvarādiśabdair āgameṣūdghoṣyate
- 3
स्वातन्त्र्यशक्तिर् एवास्य सनातनी पूर्णाहंतारूपा परा मत्स्योदरी महासत्ता स्फुरत्तोर्मिः सारं हृदयं भैरवी देवी शिखा इत्यादिभिर् असंख्यैः प्रकारैस्तत्र तत्र निरुच्यते
svātantryaśaktir evāsya sanātanī pūrṇāhaṃtārūpā parā matsyodarī mahāsattā sphurattormiḥ sāraṃ hṛdayaṃ bhairavī devī śikhā ityādibhir asaṃkhyaiḥ prakāraistatra tatra nirucyate
- 4
पूर्णाहंतैव चास्यानुत्तरानाहतशक्तिसंपुटीकारस्वीकृतादिक्षान्तवर्णभट्टारिका तत एव स्वीकृतानन्तवाच्यवाकरूपषडध्वस्फारमयाशेषशक्तिचक्रक्रोडीकारान्तः कृतनिःशेषसर्गप्रलयादिपरम्पराप्यक्रमविमर्शरूपैव नित्योदितानुच्चार्यमहामन्त्रमयी सर्वजीवितभूता परा वाक्
pūrṇāhaṃtaiva cāsyānuttarānāhataśaktisaṃpuṭīkārasvīkṛtādikṣāntavarṇabhaṭṭārikā tata eva svīkṛtānantavācyavākarūpaṣaḍadhvasphāramayāśeṣaśakticakrakroḍīkārāntaḥ kṛtaniḥśeṣasargapralayādiparamparāpyakramavimarśarūpaiva nityoditānuccāryamahāmantramayī sarvajīvitabhūtā parā vāk
- 5
एषैव भगवत इयद्विश्ववैचित्र्यचलत्ताम् इव स्वात्मनि प्रथयन्ती स्पन्दते इत्यर्थानुगमात्स्पन्द इति इहोच्यते
eṣaiva bhagavata iyadviśvavaicitryacalattām iva svātmani prathayantī spandate ityarthānugamātspanda iti ihocyate
- 6
एवं चेयद्विश्वशक्तिखचितपराशक्तिसुन्दरस्य स्वात्मनः स्वरूपगोपनक्रीडया स्वात्मभित्ताव् एवांशांशिकया निर्भासनं भगवान्यावच्चिकीर्षति तावदेकैवाभिन्नाप्यसौ तदीया विमर्शशक्तिरिच्छात्वं प्रतिपद्य ज्ञानक्रियारूपतया स्थित्वा शिवशक्तिपरामर्शात्मकबीजयोनिभेदेन द्विधा भूत्वा वर्गभेदेन तत्कलाभेदेन च नवधा पञ्चाशद्धा च स्फुरन्ती तद्विमर्शसारैर् अघोरघोरघोरतरैः संवित्तिदेवतात्मभिः रूपैः प्रथमाना भगवतः पञ्चविधकृत्यकारितां निर्वहति
evaṃ ceyadviśvaśaktikhacitaparāśaktisundarasya svātmanaḥ svarūpagopanakrīḍayā svātmabhittāv evāṃśāṃśikayā nirbhāsanaṃ bhagavānyāvaccikīrṣati tāvadekaivābhinnāpyasau tadīyā vimarśaśaktiricchātvaṃ pratipadya jñānakriyārūpatayā sthitvā śivaśaktiparāmarśātmakabījayonibhedena dvidhā bhūtvā vargabhedena tatkalābhedena ca navadhā pañcāśaddhā ca sphurantī tadvimarśasārair aghoraghoraghorataraiḥ saṃvittidevatātmabhiḥ rūpaiḥ prathamānā bhagavataḥ pañcavidhakṛtyakāritāṃ nirvahati
- 7
यथोक्तं श्रीमालिनीविजयोत्तरे
या सा शक्तिर्जगद्धातुः कथिता समवायिनी
इच्छात्वं तस्य सा देवी सिसृक्षोः प्रतिपद्यते
yathoktaṃ śrīmālinīvijayottare
yā sā śaktirjagaddhātuḥ kathitā samavāyinī
icchātvaṃ tasya sā devī sisṛkṣoḥ pratipadyate
- 8
सैकापि सत्य् अनेकत्वं यथा गच्छति तच्छृणु
एवमेतदिति ज्ञेयं नान्यथेति सुनिश्चितम्
saikāpi saty anekatvaṃ yathā gacchati tacchṛṇu
evametaditi jñeyaṃ nānyatheti suniścitam
- 9
ज्ञापयन्ती जगत्यत्र ज्ञानशक्तिर्निगद्यते
एवं भवत्विदं सर्वमिति कार्योन्मुखी यदा
jñāpayantī jagatyatra jñānaśaktirnigadyate
evaṃ bhavatvidaṃ sarvamiti kāryonmukhī yadā
- 10
जाता तदैव तद्वस्तु कुर्वत्यत्र क्रियोच्यते
एवमेषा द्विरूपापि पुनर्भेदैर् अनन्तताम्
jātā tadaiva tadvastu kurvatyatra kriyocyate
evameṣā dvirūpāpi punarbhedair anantatām
- 11
अर्थोपाधिवशाद्याति चिन्तामणिरिवेश्वरी
तत्र तावत्समापन्ना मातृभावं विभिद्यते
arthopādhivaśādyāti cintāmaṇiriveśvarī
tatra tāvatsamāpannā mātṛbhāvaṃ vibhidyate
- 12
द्विधा च नवधा चैव पञ्चाशद्धा च मालिनी
बीजयोन्यात्मकाद्भेदाद्द्विधा बीजं स्वरा मताः
dvidhā ca navadhā caiva pañcāśaddhā ca mālinī
bījayonyātmakādbhedāddvidhā bījaṃ svarā matāḥ
- 13
कादयश्च स्मृता योनिर्नवधा वर्गभेदतः
पृथग्वर्णविभेदेन शतार्धकिरणोज्ज्वला
kādayaśca smṛtā yonirnavadhā vargabhedataḥ
pṛthagvarṇavibhedena śatārdhakiraṇojjvalā
- 14
बीजमत्र शिवः शक्तिर्योनिर् इत्यभिधीयते
वर्गाष्टकमिति ज्ञेयमघोराद्यमनुक्रमात्
bījamatra śivaḥ śaktiryonir ityabhidhīyate
vargāṣṭakamiti jñeyamaghorādyamanukramāt
- 15
तदेव शक्तिभेदेन माहेश्वर्यादि चाष्टकम्
शतार्धभेदभिन्ना च तत्संख्यानां वरानने
tadeva śaktibhedena māheśvaryādi cāṣṭakam
śatārdhabhedabhinnā ca tatsaṃkhyānāṃ varānane
- 16
रुद्राणां वाचकत्वेन कल्पिता परमेष्ठिना
तद्वदेव च शक्तीनां तत्संख्यानामनुक्रमात्
rudrāṇāṃ vācakatvena kalpitā parameṣṭhinā
tadvadeva ca śaktīnāṃ tatsaṃkhyānāmanukramāt
- 17
इत्यादि
ityādi
- 18
तथा
विषयेष्वेव संलीनानधोऽधः पातयन्त्यणून्
रुद्राणून्याः समालिङ्ग्य घोरतर्यो ऽपरास्तु ताः
tathā
viṣayeṣveva saṃlīnānadho'dhaḥ pātayantyaṇūn
rudrāṇūnyāḥ samāliṅgya ghorataryo 'parāstu tāḥ
- 19
मिश्रकर्मफलासक्तिं पूर्ववज्जनयन्ति याः
miśrakarmaphalāsaktiṃ pūrvavajjanayanti yāḥ
- 20
मुक्तिमार्गनिरोधिन्यस्ताः स्युर्घोराः परापराः
muktimārganirodhinyastāḥ syurghorāḥ parāparāḥ
- 21
पूर्ववज्जन्तुजातस्य शिवधामफलप्रदाः
पराः प्रकथितास्तज्ज्ञैर् अघोराः शिवशक्तयः
pūrvavajjantujātasya śivadhāmaphalapradāḥ
parāḥ prakathitāstajjñair aghorāḥ śivaśaktayaḥ
- 22
इति
iti
- 23
एवं शब्दराशेः समुत्थितो वर्गनवकरूपो यो ब्राह्म्यादिदेवतावर्गः शिवसहितस्तस्य भोग्यतां पाश्यतां गतः सन्स एव शंकरात्मा स्वभावः पशुः स्मृतः आगमेषु तथोक्तः
evaṃ śabdarāśeḥ samutthito varganavakarūpo yo brāhmyādidevatāvargaḥ śivasahitastasya bhogyatāṃ pāśyatāṃ gataḥ sansa eva śaṃkarātmā svabhāvaḥ paśuḥ smṛtaḥ āgameṣu tathoktaḥ
- 24
ननु कथं भोक्ता महेश्वर इमामवस्थां प्राप्तः इत्याशङ्काशान्त्यै विशेषणद्वारेण हेतुमाह कलाविलुप्तविभव इति
nanu kathaṃ bhoktā maheśvara imāmavasthāṃ prāptaḥ ityāśaṅkāśāntyai viśeṣaṇadvāreṇa hetumāha kalāviluptavibhava iti
- 25
कलयति बहिः क्षिपति पारिमित्येन परिच्छिनत्तीति कला मायाशक्तिः तया विलुप्तविभवः स्वमायया गूहितैश्वर्यः स्थित इत्यर्थः
kalayati bahiḥ kṣipati pārimityena paricchinattīti kalā māyāśaktiḥ tayā viluptavibhavaḥ svamāyayā gūhitaiśvaryaḥ sthita ityarthaḥ
- 26
अथ च कलया किंचित्कर्तृत्वोपोद्बलनात्मना शक्त्या तदुपलक्षितेन कलाविद्याकालनियतिरागात्मना कञ्चुकेन विलुप्तविभवः स्थगितपूर्णत्वकर्तृत्वादिधर्मः
atha ca kalayā kiṃcitkartṛtvopodbalanātmanā śaktyā tadupalakṣitena kalāvidyākālaniyatirāgātmanā kañcukena viluptavibhavaḥ sthagitapūrṇatvakartṛtvādidharmaḥ
- 27
भवत्वेवं भोग्यतां तु कथमसौ शक्तिवर्गस्य गतः इत्यत्रैतद् एवोत्तरम्
bhavatvevaṃ bhogyatāṃ tu kathamasau śaktivargasya gataḥ ityatraitad evottaram
- 28
कलाभिर् अकारादिवर्गाधिष्ठायिकाभिर्ब्राह्म्यादिभिस्तद्वर्णभट्टारकाधिष्ठातृभूताभिश्च श्रीमालिनीविजयोक्तदेवतारूपाभिः कलाभिर् अकारादिवर्णैर्विलुप्तविभवः संकुचितोऽस्मि अपूर्णो ऽस्मि करवाणि किंचिदिदम् उपाददे इदं जहामि इत्यादिविचित्रविकल्पकाविकल्पकप्रतिपत्तिकदम्बकान्तरनुप्रविष्टस्थूलसूक्ष्मशब्दानुवेधकदर्थितो हर्षशोकादिरूपतां नेनीयमान इव क्षणम् अपि स्वरूपस्थितिं न लभते यतः अतोऽसाव् उक्तरूपः शक्तिवर्गेण भुज्यमानः पशुर् उक्तः
kalābhir akārādivargādhiṣṭhāyikābhirbrāhmyādibhistadvarṇabhaṭṭārakādhiṣṭhātṛbhūtābhiśca śrīmālinīvijayoktadevatārūpābhiḥ kalābhir akārādivarṇairviluptavibhavaḥ saṃkucito'smi apūrṇo 'smi karavāṇi kiṃcididam upādade idaṃ jahāmi ityādivicitravikalpakāvikalpakapratipattikadambakāntaranupraviṣṭasthūlasūkṣmaśabdānuvedhakadarthito harṣaśokādirūpatāṃ nenīyamāna iva kṣaṇam api svarūpasthitiṃ na labhate yataḥ ato'sāv uktarūpaḥ śaktivargeṇa bhujyamānaḥ paśur uktaḥ
- 29
कलया अख्यात्यात्मनांशेन विलुप्तविभवः संकुचित इव न तु तत्त्वतः शिवात्मा स्वभावो ऽस्य क्वापि गतः तदभावे हि स एव न स्फुरेत्
kalayā akhyātyātmanāṃśena viluptavibhavaḥ saṃkucita iva na tu tattvataḥ śivātmā svabhāvo 'sya kvāpi gataḥ tadabhāve hi sa eva na sphuret
- 30
तथावभासमानैरेव कलाभिः संकुचितैः शब्दैर्ज्ञानैश्च विलुप्तविभवस्तथारूपम् आत्मानं न विम्रष्टुं क्षम इत्यर्थः
tathāvabhāsamānaireva kalābhiḥ saṃkucitaiḥ śabdairjñānaiśca viluptavibhavastathārūpam ātmānaṃ na vimraṣṭuṃ kṣama ityarthaḥ

