Shatapatha Brahmana (Madhyandina) · Kandika 4 10.6.4.1
10.6.4.1उषा वा अश्वस्य मेध्यस्य शिरः सूर्यश्चक्षुर्वातः प्राणो व्यात्तम् अग्निर्वैश्वानरः
संवत्सर आत्माश्वस्य मेध्यस्य द्यौष्पृष्ठम् अन्तरिक्षम् उदरम्पृथिवी पाजस्यं दिशः पार्श्वे अवान्तरदिशः पर्शव ऋतवो ऽङ्गानि मासाश्चार्धमासाश्च पर्वाण्य् अहोरात्राणि प्रतिष्ठा नक्षत्राण्य् अस्थीनि नभो मांसान्य् ऊवध्यं सिकताः सिन्धवो गुदा यकृच्च क्लोमानश्च पर्वता ओषधयश्च वनस्पतयश्च लोमान्य् उद्यन्पूर्वार्धो निम्लोचन्जघनार्धः
यद्विजृम्भते तद्विद्योतते
यद्विधूनुते तत्स्तनयति
यन्मेहति तद्वर्षति
वाग् एवास्य वाक्
अहर्वा अश्वं पुरस्तान्महिमान्वजायत
तस्य पूर्वे समुद्रे योनिः
रात्रिर् एनं पश्चान्महिमान्वजायत
तस्यापरे समुद्रे योनिः
एतौ वा अश्वम्महिमानाव् अभितः संबभूवतुः
हयो भूत्वा देवान् अवहद्वाजी गन्धर्वान् अर्वासुरान् अश्वो मनुष्यान्
समुद्र एवास्य बन्धुः समुद्रो योनिः
Transliteration
uṣā vā aśvasya medhyasya śiraḥ sūryaścakṣurvātaḥ prāṇo vyāttam agnirvaiśvānaraḥ
saṃvatsara ātmāśvasya medhyasya dyauṣpṛṣṭham antarikṣam udarampṛthivī pājasyaṃ diśaḥ pārśve avāntaradiśaḥ parśava ṛtavo 'ṅgāni māsāścārdhamāsāśca parvāṇy ahorātrāṇi pratiṣṭhā nakṣatrāṇy asthīni nabho māṃsāny ūvadhyaṃ sikatāḥ sindhavo gudā yakṛcca klomānaśca parvatā oṣadhayaśca vanaspatayaśca lomāny udyanpūrvārdho nimlocanjaghanārdhaḥ
yadvijṛmbhate tadvidyotate
yadvidhūnute tatstanayati
yanmehati tadvarṣati
vāg evāsya vāk
aharvā aśvaṃ purastānmahimānvajāyata
tasya pūrve samudre yoniḥ
rātrir enaṃ paścānmahimānvajāyata
tasyāpare samudre yoniḥ
etau vā aśvammahimānāv abhitaḥ saṃbabhūvatuḥ
hayo bhūtvā devān avahadvājī gandharvān arvāsurān aśvo manuṣyān
samudra evāsya bandhuḥ samudro yoniḥ
By System Admin
Translation
Draft in progress