121 shlokas
- 1
ग्रहणधारणोहापोहविज्ञानवचनक्रियायथान्यायाभिनिवेशानां वास इति संज्ञा तान्त्रिकी शिष्टैः कृता
grahaṇadhāraṇohāpohavijñānavacanakriyāyathānyāyābhiniveśānāṃ vāsa iti saṃjñā tāntrikī śiṣṭaiḥ kṛtā
- 2
तत्र सकृदुच्चारितवाक्यस्य सम्यगर्थप्रतिपत्तिसामर्थ्यं ग्रहणम्
tatra sakṛduccāritavākyasya samyagarthapratipattisāmarthyaṃ grahaṇam
- 3
गृहीतस्य चिरकालव्यवधानेऽपि स्मरणसामर्थ्यं धारणम्
gṛhītasya cirakālavyavadhāne'pi smaraṇasāmarthyaṃ dhāraṇam
- 4
एकदेशश्रवणात्तन्न्यायेनापूर्वार्थप्रतिपत्तिसामर्थ्यमूहः
ekadeśaśravaṇāttannyāyenāpūrvārthapratipattisāmarthyamūhaḥ
- 5
आचार्यदेशीयैरुक्तार्थानां युक्तायुक्तप्रविभागेन प्रतिपत्तित्यागसामर्थ्यम् अपोहः
ācāryadeśīyairuktārthānāṃ yuktāyuktapravibhāgena pratipattityāgasāmarthyam apohaḥ
- 6
श्रुतस्यार्थस्यानेकधाविचारणे परप्रतिपादने च सामर्थ्यं विज्ञानम्
śrutasyārthasyānekadhāvicāraṇe parapratipādane ca sāmarthyaṃ vijñānam
- 7
व्याहतपुनरुक्तादिदोषरहितं वाक्यं वचनम्
vyāhatapunaruktādidoṣarahitaṃ vākyaṃ vacanam
- 8
निर्दुष्टशब्दोच्चारणेनाचार्यं परितोषयतो मिथ्याज्ञानमलनिवृत्तौ विद्याभिव्यक्तिर्भवति
nirduṣṭaśabdoccāraṇenācāryaṃ paritoṣayato mithyājñānamalanivṛttau vidyābhivyaktirbhavati
- 9
तथोत्थानप्रत्युत्थानादिका गुरौ परिचर्या क्रियेत्युक्ता
tathotthānapratyutthānādikā gurau paricaryā kriyetyuktā
- 10
युक्त्यापि पूर्वोत्तराविरुद्धशास्त्रार्थपर्यालोचने तदर्थानुष्ठानार्थमतियत्नो यथा न्यायाभिनिवेशः
yuktyāpi pūrvottarāviruddhaśāstrārthaparyālocane tadarthānuṣṭhānārthamatiyatno yathā nyāyābhiniveśaḥ
- 11
तथा चोक्तम्
पूर्वोत्तराविरोधेन वाक्यार्थं ह्य् अविचालितम्
यस्तर्केणानुसंधत्ते स धर्मं वेद नेतरः
tathā coktam
pūrvottarāvirodhena vākyārthaṃ hy avicālitam
yastarkeṇānusaṃdhatte sa dharmaṃ veda netaraḥ
- 12
धर्मस्योपायः चर्या
dharmasyopāyaḥ caryā
- 13
भस्मस्नानादिर्मूढान्तः क्रियासमूहश्चर्येत्युच्यते
bhasmasnānādirmūḍhāntaḥ kriyāsamūhaścaryetyucyate
- 14
सा च त्र्यङ्गा दानयागतापाङ्गेति
sā ca tryaṅgā dānayāgatāpāṅgeti
- 15
पञ्चसु पवित्रेष्वावर्त्यमानेषु दशभिर्नमस्कारैः परमेश्वरायात्मसमर्पणं दानम्
pañcasu pavitreṣvāvartyamāneṣu daśabhirnamaskāraiḥ parameśvarāyātmasamarpaṇaṃ dānam
- 16
तदेवातिदानम् अनावृत्तिफलत्वात्
tadevātidānam anāvṛttiphalatvāt
- 17
अन्यत्तु कुदानम् आवृत्तिफलत्वाद् इति
anyattu kudānam āvṛttiphalatvād iti
- 18
परमेश्वरनियोगाभिसंधिना भस्मस्नानादिक्रियाणां यथाविहितकरणं यागः
parameśvaraniyogābhisaṃdhinā bhasmasnānādikriyāṇāṃ yathāvihitakaraṇaṃ yāgaḥ
- 19
स एवातियागो ऽन्यस्तु कुयागः पूर्वोक्तहेतुद्वयात्
sa evātiyāgo 'nyastu kuyāgaḥ pūrvoktahetudvayāt
- 20
स्वविध्यभिनिविष्टस्यैव त्रिविधदुःखोपनिपाते सति अनुपायतः प्रतीकारम् अकुर्वतः सहिष्णुत्वं तापः
svavidhyabhiniviṣṭasyaiva trividhaduḥkhopanipāte sati anupāyataḥ pratīkāram akurvataḥ sahiṣṇutvaṃ tāpaḥ
- 21
स एवातितापोऽन्यत्तु कुताप इति
sa evātitāpo'nyattu kutāpa iti
- 22
सा त्र्यङ्गापि चर्या द्विविधा व्रतं द्वाराणि चेति
sā tryaṅgāpi caryā dvividhā vrataṃ dvārāṇi ceti
- 23
तत्र स्नानशयनोपहारजपप्रदक्षिणानि व्रतम्धर्मनिष्पत्त्यधर्मोच्छेदार्थं प्राधान्येन क्रियमाणत्वात्
tatra snānaśayanopahārajapapradakṣiṇāni vratamdharmaniṣpattyadharmocchedārthaṃ prādhānyena kriyamāṇatvāt
- 24
द्वाराणि तु क्राथनस्पन्दनमन्दनशृङ्गारणापितत्करणापि तद्भाषणानि
dvārāṇi tu krāthanaspandanamandanaśṛṅgāraṇāpitatkaraṇāpi tadbhāṣaṇāni
- 25
अपमानपरिभवपरिवादनिष्पादनद्वारेण पूर्वोत्पन्नयोर्धर्माधर्मयोर् आयव्ययनिमित्तत्वादिति क्रमः स्वरूपं चैषां भाष्य एव प्रपञ्चितम्
apamānaparibhavaparivādaniṣpādanadvāreṇa pūrvotpannayordharmādharmayor āyavyayanimittatvāditi kramaḥ svarūpaṃ caiṣāṃ bhāṣya eva prapañcitam
- 26
तदनुसारेण शिष्यहितार्थं मयापि लेशतः प्रदर्श्यते
tadanusāreṇa śiṣyahitārthaṃ mayāpi leśataḥ pradarśyate
- 27
प्रागादित्योदयात्घटिकाद्वयं पूर्वाह्णसंध्या
prāgādityodayātghaṭikādvayaṃ pūrvāhṇasaṃdhyā
- 28
सा त्रिदेवता
sā tridevatā
- 29
प्रथमा ब्राह्मी मध्यमा वैष्णवी अन्त्या रौद्री
prathamā brāhmī madhyamā vaiṣṇavī antyā raudrī
- 30
तत्र पूर्वसंध्ययोः शौचं कृत्वा भस्म संस्कर्तव्यम्
tatra pūrvasaṃdhyayoḥ śaucaṃ kṛtvā bhasma saṃskartavyam

