Sanskrit

ॐ अथ हैनां ब्रह्मरन्ध्रे सुभगां ब्रह्मास्त्रस्वरूपिणीमाप्नोति । ब्रह्मास्त्रां महाविद्यां शाम्भवीं सर्वस्तम्भकरीं सिद्धां चतुर्भुजां दक्षाभ्यां कराभ्यां मुद्गरपाशौ वामाभ्यां शत्रुजिह्वावज्रे दधानां पीतवाससं पीतालङ्कारसंपन्नां हढीभूतपीनोन्नतपयोधरयुग्माढ्यां तप्तकार्तस्वरकुण्डलद्वयविराजितमुखाम्भोजां ललाटपट्टोल्लसत्पीतचन्द्रार्धमनुबिभ्रतीमुद्यद्दिवाकरोद्योतां स्वर्णसिंहासनमध्यकमलसंस्थां धिया संचिन्त्य तदुपरि त्रिकोणषट्कोणवसुपत्रवृत्तान्तः षोडशदलकमलोपरि भूबिम्बत्रयमनुसंधाय तत्राद्ययोन्यन्तरे देवीमाहूय ध्यायेत् । योनिं जगद्योनिं समायमुच्चार्य शिवान्ते भूमाग्रबिन्दुमिन्दुखण्डमग्निबीजं ततो वरुणाङ्कगुणार्णमत्रियुतं स्थिरामुखि इति सम्बोध्य सर्वदुष्टानामिदंचाभाष्य वाचमिति मुखमिति पदमिति स्तम्भयेति वोच्चार्य जिह्वां वैशारदीं कीलयेति बुद्धिं विनाशयेति प्रोच्चार्य भूमायां वेदाद्यं ततो यज्ञभूगुहायां योजयेत् । स महास्तम्भेश्वर: सर्वेश्वरः । स सेनास्तम्भं करोति । किं बहुना विवस्वद्धतिस्तम्भकर्ता सर्ववातस्तम्भकर्तेति । किं दिवाकर्षयति । स सर्वविद्येश्वरः सर्वमन्त्रेश्वरो भृत्वा प्रजाया आवर्तनं त्रैलोक्यस्तम्भिन्याः कुर्यात् । अङ्गमाद्यं द्वारतो गणेशं वटुकं योगिनीं क्षेत्राधीशं च पूर्वादिकमभ्यर्च्य गुरुपङ्क्तिमीशासुरान्तमन्तः प्राच्यादौ क्रमानुगता बगला स्तम्भिनी जृम्भिणी मोहिनी वश्या अचला चला दुर्धरा अकल्मषा आधारा कल्पना कालकर्षिणी भ्रमरिका मदगमना भोगा योगिका पता ह्यष्टदलानुगताः पूज्याः । ब्राह्मी माहेश्वरी कौमारी वैष्णवी वाराही नारसिंही चामुण्डा महालक्ष्मीश्च । षड्योनिगर्भांता डाकिनी राकिनी लाकिनी काकिनी शाकिनी हाकिनी वेद्याद्यस्थिरमायाद्याः समभ्यर्च्य शक्रानियमनिर्ऋतिवरुणवायव्यधनदेशानप्रजापतिनागेशाः परिवाराभिमताः स्थिरादिवेदाद्याः सवाहनाः सदस्त्रका बाह्यतोऽभ्यर्च्य तां योनिं रतिप्रीतिमनोभवा एताः सर्वाः समाः पीतांशुका ध्येयाः । तदन्तमूलायां बलादिषोडशानुगताः पूज्याः नीराजनैः । स हैश्वर्ययुक्तो भवति । य एनां ध्यायति स वाग्मी भवति । सोऽमृतमश्नुते । सर्वसिद्धिकर्ता भवति । सृष्टिस्थितिसंहारकर्ता भवति । स सर्वेश्वरो भवति । स तु ऋद्धीश्वरो भवति । स शाक्तः स वैष्णवः स गणपः स शैवः । स जीवन्मुक्तो भवति । स संन्यासी भवति । न्यसनं न्यासः । सम्यङ्न्यासः संन्यासः । न तु मुण्डितमुण्ड: । षट्त्रिंशदस्त्रेश्वरो भवेत् सौभाग्यार्चनेनेति प्रोतं वेद । ॐ शिवम् ॥

Transliteration

oṃ atha haināṃ brahmarandhre subhagāṃ brahmāstrasvarūpiṇīmāpnoti | brahmāstrāṃ mahāvidyāṃ śāmbhavīṃ sarvastambhakarīṃ siddhāṃ caturbhujāṃ dakṣābhyāṃ karābhyāṃ mudgarapāśau vāmābhyāṃ śatrujihvāvajre dadhānāṃ pītavāsasaṃ pītālaṅkārasaṃpannāṃ haḍhībhūtapīnonnatapayodharayugmāḍhyāṃ taptakārtasvarakuṇḍaladvayavirājitamukhāmbhojāṃ lalāṭapaṭṭollasatpītacandrārdhamanubibhratīmudyaddivākarodyotāṃ svarṇasiṃhāsanamadhyakamalasaṃsthāṃ dhiyā saṃcintya tadupari trikoṇaṣaṭkoṇavasupatravṛttāntaḥ ṣoḍaśadalakamalopari bhūbimbatrayamanusaṃdhāya tatrādyayonyantare devīmāhūya dhyāyet | yoniṃ jagadyoniṃ samāyamuccārya śivānte bhūmāgrabindumindukhaṇḍamagnibījaṃ tato varuṇāṅkaguṇārṇamatriyutaṃ sthirāmukhi iti sambodhya sarvaduṣṭānāmidaṃcābhāṣya vācamiti mukhamiti padamiti stambhayeti voccārya jihvāṃ vaiśāradīṃ kīlayeti buddhiṃ vināśayeti proccārya bhūmāyāṃ vedādyaṃ tato yajñabhūguhāyāṃ yojayet | sa mahāstambheśvara: sarveśvaraḥ | sa senāstambhaṃ karoti | kiṃ bahunā vivasvaddhatistambhakartā sarvavātastambhakarteti | kiṃ divākarṣayati | sa sarvavidyeśvaraḥ sarvamantreśvaro bhṛtvā prajāyā āvartanaṃ trailokyastambhinyāḥ kuryāt | aṅgamādyaṃ dvārato gaṇeśaṃ vaṭukaṃ yoginīṃ kṣetrādhīśaṃ ca pūrvādikamabhyarcya gurupaṅktimīśāsurāntamantaḥ prācyādau kramānugatā bagalā stambhinī jṛmbhiṇī mohinī vaśyā acalā calā durdharā akalmaṣā ādhārā kalpanā kālakarṣiṇī bhramarikā madagamanā bhogā yogikā patā hyaṣṭadalānugatāḥ pūjyāḥ | brāhmī māheśvarī kaumārī vaiṣṇavī vārāhī nārasiṃhī cāmuṇḍā mahālakṣmīśca | ṣaḍyonigarbhāṃtā ḍākinī rākinī lākinī kākinī śākinī hākinī vedyādyasthiramāyādyāḥ samabhyarcya śakrāniyamanirṛtivaruṇavāyavyadhanadeśānaprajāpatināgeśāḥ parivārābhimatāḥ sthirādivedādyāḥ savāhanāḥ sadastrakā bāhyato'bhyarcya tāṃ yoniṃ ratiprītimanobhavā etāḥ sarvāḥ samāḥ pītāṃśukā dhyeyāḥ | tadantamūlāyāṃ balādiṣoḍaśānugatāḥ pūjyāḥ nīrājanaiḥ | sa haiśvaryayukto bhavati | ya enāṃ dhyāyati sa vāgmī bhavati | so'mṛtamaśnute | sarvasiddhikartā bhavati | sṛṣṭisthitisaṃhārakartā bhavati | sa sarveśvaro bhavati | sa tu ṛddhīśvaro bhavati | sa śāktaḥ sa vaiṣṇavaḥ sa gaṇapaḥ sa śaivaḥ | sa jīvanmukto bhavati | sa saṃnyāsī bhavati | nyasanaṃ nyāsaḥ | samyaṅnyāsaḥ saṃnyāsaḥ | na tu muṇḍitamuṇḍa: | ṣaṭtriṃśadastreśvaro bhavet saubhāgyārcaneneti protaṃ veda | oṃ śivam ||

By System Admin

Translation

Draft in progress