58 shlokas
- 1
कैलासशिखरासीनं देवदेवं जगत्पतिम्
पप्रच्छ पार्वती देवी तत्त्वं परमदुर्लभम्
kailāsaśikharāsīnaṃ devadevaṃ jagatpatim
papraccha pārvatī devī tattvaṃ paramadurlabham
- 2
पार्वत्य् उवाच
मणीनां लक्षणं देव कथयस्व प्रसादतः
येन सिद्धिं लभन्ते ऽत्र साधका गतकल्मषाः
pārvaty uvāca
maṇīnāṃ lakṣaṇaṃ deva kathayasva prasādataḥ
yena siddhiṃ labhante 'tra sādhakā gatakalmaṣāḥ
- 3
महादेव महाघोर कुर्वन्ति रिपुमर्दनम्
कवित्वं दीर्घजीवित्वं कुरुते ऽत्र यथा प्रभो
mahādeva mahāghora kurvanti ripumardanam
kavitvaṃ dīrghajīvitvaṃ kurute 'tra yathā prabho
- 4
अष्टौ गुणाः फलं यत्र त्वत्प्रसादान्महेश्वर
ज्ञानमार्गं च मोक्षम्च शूलरोगं च दारुणम्
aṣṭau guṇāḥ phalaṃ yatra tvatprasādānmaheśvara
jñānamārgaṃ ca mokṣamca śūlarogaṃ ca dāruṇam
- 5
चक्षूरोगं शिरोरोगं विषोपद्रवम् एव च
स्फुटं वद यथा प्रभो प्रसादान्मे महेश्वर
cakṣūrogaṃ śirorogaṃ viṣopadravam eva ca
sphuṭaṃ vada yathā prabho prasādānme maheśvara
- 6
उवाच शंकरो देवि यत्त्वया परिपृच्छ्यते
यन्न कस्यचिद् आख्यातं तद्वदामि वरानने
uvāca śaṃkaro devi yattvayā paripṛcchyate
yanna kasyacid ākhyātaṃ tadvadāmi varānane
- 7
पुराहं विष्णुना युक्तो ब्रह्मणा सह सुन्दरि
शुक्लतीर्थे गतो देवि रेवातीरे सुशोभने
purāhaṃ viṣṇunā yukto brahmaṇā saha sundari
śuklatīrthe gato devi revātīre suśobhane
- 8
रत्नपर्वतनामा च तत्र तिष्ठति भूधरः
इन्द्रेण स्थापितो देवि सर्वदेवसुखंकरः
ratnaparvatanāmā ca tatra tiṣṭhati bhūdharaḥ
indreṇa sthāpito devi sarvadevasukhaṃkaraḥ
- 9
तस्य दर्शनमात्रेण सर्वपापैः प्रमुच्यते
रोगी रोगविनिर्मुक्तो जायते नात्र संशयः
tasya darśanamātreṇa sarvapāpaiḥ pramucyate
rogī rogavinirmukto jāyate nātra saṃśayaḥ
- 10
देव्या आयतने ये तु चितां दहन्ति मानवाः
ते यान्ति परमं स्थानं शिवदर्शनसंयुतम्
devyā āyatane ye tu citāṃ dahanti mānavāḥ
te yānti paramaṃ sthānaṃ śivadarśanasaṃyutam
- 11
अष्टम्यां स्नाति यः कुण्डे पूजयित्वा ततः शिवम्
सर्वपापविनिर्मुक्तो मम लोकं समेति सः
aṣṭamyāṃ snāti yaḥ kuṇḍe pūjayitvā tataḥ śivam
sarvapāpavinirmukto mama lokaṃ sameti saḥ
- 12
इत्थं देवगणाः सर्वे कुण्डे स्नात्वा क्षणं स्थिताः
पवित्रदेहाः श्रीमन्तः पुनः केदारम् आगताः
itthaṃ devagaṇāḥ sarve kuṇḍe snātvā kṣaṇaṃ sthitāḥ
pavitradehāḥ śrīmantaḥ punaḥ kedāram āgatāḥ
- 13
गरुत्मत्स्थापितं लिङ्गं सर्वपापविमोचकम्
तस्य दर्शनमात्रं हि ब्रह्महत्यां व्यपोहति
garutmatsthāpitaṃ liṅgaṃ sarvapāpavimocakam
tasya darśanamātraṃ hi brahmahatyāṃ vyapohati
- 14
अष्टम्यां च चतुर्दश्यां पूर्णमास्यां विशेषतः
यः पूजयति पुण्यात्मा मम लोकं स गच्छति
aṣṭamyāṃ ca caturdaśyāṃ pūrṇamāsyāṃ viśeṣataḥ
yaḥ pūjayati puṇyātmā mama lokaṃ sa gacchati
- 15
केदारं पूजयेद्यस्तु पुण्यात्मा भाग्यभाजनम्
सर्वार्थसिद्धिसम्पन्नं प्राप्नोति परमं पदम्
kedāraṃ pūjayedyastu puṇyātmā bhāgyabhājanam
sarvārthasiddhisampannaṃ prāpnoti paramaṃ padam
- 16
इन्द्रेण स्थापितं वज्रं कोशश्च धनदेन तु
मयापि स्थापिता मन्त्राः कथितं ते वरानने
indreṇa sthāpitaṃ vajraṃ kośaśca dhanadena tu
mayāpi sthāpitā mantrāḥ kathitaṃ te varānane
- 17
गरुत्मतः समुद्गारान्मणिकला महानदी
विनिःसृता महातेजाः सर्वपापप्रणाशिनी
garutmataḥ samudgārānmaṇikalā mahānadī
viniḥsṛtā mahātejāḥ sarvapāpapraṇāśinī
- 18
तस्याः प्रभावतो देवि मणयः शुभलक्षणाः
भोगदा मोक्षदाश्चैव रोगदोषविघातकाः
tasyāḥ prabhāvato devi maṇayaḥ śubhalakṣaṇāḥ
bhogadā mokṣadāścaiva rogadoṣavighātakāḥ
- 19
श्रीदेव्य् उवाच
मणीनां लक्षणं ब्रूहि यथास्ति वृषभध्वज
केनोपायेन ते ग्राह्या देवपूजा कथं विभो
śrīdevy uvāca
maṇīnāṃ lakṣaṇaṃ brūhi yathāsti vṛṣabhadhvaja
kenopāyena te grāhyā devapūjā kathaṃ vibho
- 20
कीदृशं च व्रतं कार्यं किं दानं कस्य पूजनम्
का च भक्तिक्रिया कार्या देव मे वद भैरव
kīdṛśaṃ ca vrataṃ kāryaṃ kiṃ dānaṃ kasya pūjanam
kā ca bhaktikriyā kāryā deva me vada bhairava
- 21
श्रीभैरव उवाच
केदारभवनं गत्वा कलशानां शताष्टकम्
श्रीमत्केदारनाथाय मनसा कृतभावनः
śrībhairava uvāca
kedārabhavanaṃ gatvā kalaśānāṃ śatāṣṭakam
śrīmatkedāranāthāya manasā kṛtabhāvanaḥ
- 22
क्षेत्रपालं यथाशक्त्या उपहारैर् अनुत्तमैः
पूजयित्वा प्रयत्नेन साधकः फलकाङ्क्षया
kṣetrapālaṃ yathāśaktyā upahārair anuttamaiḥ
pūjayitvā prayatnena sādhakaḥ phalakāṅkṣayā
- 23
एवं पूज्य महाभक्त्या प्रणम्य च पुनः पुनः
बलिं दद्याद्विधानेन दिक्षु सर्वासु यत्नतः
evaṃ pūjya mahābhaktyā praṇamya ca punaḥ punaḥ
baliṃ dadyādvidhānena dikṣu sarvāsu yatnataḥ
- 24
शिवस्थाने तु कर्तव्यो जपः सुरसमर्चिते
ततो गत्वा महानद्यां मणिरत्नानि वीक्षते
śivasthāne tu kartavyo japaḥ surasamarcite
tato gatvā mahānadyāṃ maṇiratnāni vīkṣate
- 25
मन्त्रसंनद्धकायश्च गोजिह्वालेपभूषितः
अथ तेषां मणीनां तु कर्तव्यं सुपरीक्षणम्
mantrasaṃnaddhakāyaśca gojihvālepabhūṣitaḥ
atha teṣāṃ maṇīnāṃ tu kartavyaṃ suparīkṣaṇam
- 26
गोपितं यन्मया पूर्वं तन्मे निगदतः शृणु
सुतप्तहेमवर्णाभो नीलरेखासमन्वितः
gopitaṃ yanmayā pūrvaṃ tanme nigadataḥ śṛṇu
sutaptahemavarṇābho nīlarekhāsamanvitaḥ
- 27
श्वेतरेखाधरो नित्यं पीतरेखासमायुतः
आरक्तरेखासंयुक्तः कृष्णरेखाविभूषितः
śvetarekhādharo nityaṃ pītarekhāsamāyutaḥ
āraktarekhāsaṃyuktaḥ kṛṣṇarekhāvibhūṣitaḥ
- 28
एतैश्चिह्नैः समायुक्तो नीलकण्ठ इति स्मृतः
ददाति विपुलान्भोगान्ज्ञानमार्गं सुदुर्लभम्
etaiścihnaiḥ samāyukto nīlakaṇṭha iti smṛtaḥ
dadāti vipulānbhogānjñānamārgaṃ sudurlabham
- 29
कवित्वं दीर्घजीवित्वं कुरुते नात्र संशयः
ताराभो हेमवर्णाभः चतुर्बिन्दुविभूषितः
kavitvaṃ dīrghajīvitvaṃ kurute nātra saṃśayaḥ
tārābho hemavarṇābhaḥ caturbinduvibhūṣitaḥ
- 30
कृष्णबिन्दुधरो यस्तु बिडालसमरोचनः
स भवेद्धनलाभाय नात्र कार्या विचारणा
kṛṣṇabindudharo yastu biḍālasamarocanaḥ
sa bhaveddhanalābhāya nātra kāryā vicāraṇā

