Sanskrit

अपराह्णे ऽधिवृक्षसूर्ये गृहान् उपयायोर्जं बिभ्रतीति गृहान्प्रतिदृश्य जपति

ऊर्जं बिभ्रती वसुवनिः सुमेधा गृहान् आगां मोदमाना सुवर्चाः

अघोरेण चक्षुषाहं मैत्रेण गृहाणां पश्यन्ती वय उत्तिरामि

गृहाणाम् आयुः प्र वयं तिराम गृहा अस्माकं प्रतिरन्त्व् आयुः

गृहान् अहं सुमनसः प्रपद्ये वीरघ्नी वीरपतिः सुशेवा

इरां वहतो घृतम् उक्षमाणांस्तेष्व् अहं सुमनाः संविशामि

येषां मध्ये ऽधिप्रवसन्न् एति सौमनसं बहु

गृहान् उपह्वयामहे ते नो जानन्तु जानतः

सूनृतावन्तः स्वधावन्त इरावन्तो ह सामदाः

अक्षुध्या अतृष्या गृहा मास्मद्बिभेतन

उपहूता इह गाव उपहूता अजावयः

अथो अन्नस्य कीलाल उपहूतो गृहेषु मे

उपहूता भूरिधनाः सखायः साधुसंमदाः

अरिष्टाः सर्वपुरुषा गृहा नः सन्तु सर्वदेति

Transliteration

aparāhṇe 'dhivṛkṣasūrye gṛhān upayāyorjaṃ bibhratīti gṛhānpratidṛśya japati

ūrjaṃ bibhratī vasuvaniḥ sumedhā gṛhān āgāṃ modamānā suvarcāḥ

aghoreṇa cakṣuṣāhaṃ maitreṇa gṛhāṇāṃ paśyantī vaya uttirāmi

gṛhāṇām āyuḥ pra vayaṃ tirāma gṛhā asmākaṃ pratirantv āyuḥ

gṛhān ahaṃ sumanasaḥ prapadye vīraghnī vīrapatiḥ suśevā

irāṃ vahato ghṛtam ukṣamāṇāṃsteṣv ahaṃ sumanāḥ saṃviśāmi

yeṣāṃ madhye 'dhipravasann eti saumanasaṃ bahu

gṛhān upahvayāmahe te no jānantu jānataḥ

sūnṛtāvantaḥ svadhāvanta irāvanto ha sāmadāḥ

akṣudhyā atṛṣyā gṛhā māsmadbibhetana

upahūtā iha gāva upahūtā ajāvayaḥ

atho annasya kīlāla upahūto gṛheṣu me

upahūtā bhūridhanāḥ sakhāyaḥ sādhusaṃmadāḥ

ariṣṭāḥ sarvapuruṣā gṛhā naḥ santu sarvadeti

By System Admin

Translation

Draft in progress