142 shlokas
- 1
दुकूलं बिभ्राणो दलितहरितालद्युतिहरं जवापुष्पश्रेणीरुचिरुचिरपादाम्बुजतलः
तमालश्यामाङ्गो दरहसितलीलाञ्चितमुखः परानन्दाभोगः स्फुरतु हृदि मे कोऽपि पुरुषः
dukūlaṃ bibhrāṇo dalitaharitāladyutiharaṃ javāpuṣpaśreṇīrucirucirapādāmbujatalaḥ
tamālaśyāmāṅgo darahasitalīlāñcitamukhaḥ parānandābhogaḥ sphuratu hṛdi me ko'pi puruṣaḥ
- 2
यदा यातो गोपीहृदयमदनो नन्दसदनान्मुकुन्दो गान्धिन्यास्तनयम् अनुविन्दन्मधुपुरीम्
तदामाङ्क्षीच्चिन्तासरिति घनघूर्णापरिचयैर् अगाधायां वाधामयपयसि राधा विरहिणी
yadā yāto gopīhṛdayamadano nandasadanānmukundo gāndhinyāstanayam anuvindanmadhupurīm
tadāmāṅkṣīccintāsariti ghanaghūrṇāparicayair agādhāyāṃ vādhāmayapayasi rādhā virahiṇī
- 3
कदाचित्खेदाग्निं विघटयितुम् अन्तर्गतम् असौ सहालीभिर्लेभे तरलितमना यामुनतटीम्
चिराद् अस्याश्चित्तं परिचितकुटीरावकलनाद् अवस्थां तस्तार स्फुटम् अथ सुषुप्तेः प्रियसखी
kadācitkhedāgniṃ vighaṭayitum antargatam asau sahālībhirlebhe taralitamanā yāmunataṭīm
cirād asyāścittaṃ paricitakuṭīrāvakalanād avasthāṃ tastāra sphuṭam atha suṣupteḥ priyasakhī
- 4
तदा निष्पन्दाङ्गी कलितनलिनीपल्लवकुलैः परीणाहात्प्रेम्नाम् अकुशलशताशङ्किहृदयैः
दृगम्भोगम्भीरीकृतमिहिरपुत्रीलहरिभिर्विलीना धूलीनाम् उपरि परिवव्रे परिजनैः
tadā niṣpandāṅgī kalitanalinīpallavakulaiḥ parīṇāhātpremnām akuśalaśatāśaṅkihṛdayaiḥ
dṛgambhogambhīrīkṛtamihiraputrīlaharibhirvilīnā dhūlīnām upari parivavre parijanaiḥ
- 5
ततस्तां न्यस्ताङ्गीमुरसि ललितायाः कमलिनीपलाशैः कालिन्दीसलिलशिशिरैर्वीजिततनुम्
परावृत्तश्वासाङ्कुरचलितकण्ठीं कलयतां सखीसंदोहानां प्रमदभरशाली ध्वनिरभूत्
tatastāṃ nyastāṅgīmurasi lalitāyāḥ kamalinīpalāśaiḥ kālindīsalilaśiśirairvījitatanum
parāvṛttaśvāsāṅkuracalitakaṇṭhīṃ kalayatāṃ sakhīsaṃdohānāṃ pramadabharaśālī dhvanirabhūt
- 6
निधायाङ्के पङ्केरुहदलविटङ्कस्य ललिता ततो राधां नीराहरणसरणीन्यस्तचरणा
मिलन्तं कालिन्दीपुलिनभुवि खेलाञ्चितगतिं ददर्शाग्रे कंचिन्मधुरविरुतं श्वेतगरुतम्
nidhāyāṅke paṅkeruhadalaviṭaṅkasya lalitā tato rādhāṃ nīrāharaṇasaraṇīnyastacaraṇā
milantaṃ kālindīpulinabhuvi khelāñcitagatiṃ dadarśāgre kaṃcinmadhuravirutaṃ śvetagarutam
- 7
तदालोकस्तोकोच्छ्वसितहृदया सादरमसौ प्रणामं शंसन्ती लघु लघु समासाद्य सविधम्
धृतोत्कण्ठा सद्यो हरिसदसि संदेशहरणे वरं दूतं मेने तम् अतिललितं हन्त ललिता
tadālokastokocchvasitahṛdayā sādaramasau praṇāmaṃ śaṃsantī laghu laghu samāsādya savidham
dhṛtotkaṇṭhā sadyo harisadasi saṃdeśaharaṇe varaṃ dūtaṃ mene tam atilalitaṃ hanta lalitā
- 8
अमर्षात्प्रेमेर्ष्यां सपदि दधती कंसमथने प्रवृत्ता हंसाय खमभिलषितं शंसितुमसौ
न तस्या दोषोऽयं यदिह विहगं प्रार्थितवती न कस्मिन्विस्रम्भं दिशति हरिभक्तिप्रणयिता
amarṣātpremerṣyāṃ sapadi dadhatī kaṃsamathane pravṛttā haṃsāya khamabhilaṣitaṃ śaṃsitumasau
na tasyā doṣo'yaṃ yadiha vihagaṃ prārthitavatī na kasminvisrambhaṃ diśati haribhaktipraṇayitā
- 9
पवित्रेषु प्रायो विरचयसि तोयेषु वसतिं प्रमोदं नालीके वहसि विशदात्मा स्वयमपि
अतोऽहं दुःखार्ता शरणम् अबला त्वां गतवती न भिक्षा सत्पक्षे व्रजति हि कदाचिद्विफलताम्
pavitreṣu prāyo viracayasi toyeṣu vasatiṃ pramodaṃ nālīke vahasi viśadātmā svayamapi
ato'haṃ duḥkhārtā śaraṇam abalā tvāṃ gatavatī na bhikṣā satpakṣe vrajati hi kadācidviphalatām
- 10
चिरं विस्मृत्यास्मान्विरहदहनज्वालविकलाः कलावान्सानन्दं वसति मथुरायां मधुरिपुः
तदेतं संदेशं स्वमनसि समाधाय निखिलं भवान्क्षिप्रं तस्य श्रवणपदवीं संगमयतु
ciraṃ vismṛtyāsmānvirahadahanajvālavikalāḥ kalāvānsānandaṃ vasati mathurāyāṃ madhuripuḥ
tadetaṃ saṃdeśaṃ svamanasi samādhāya nikhilaṃ bhavānkṣipraṃ tasya śravaṇapadavīṃ saṃgamayatu
- 11
निरस्तप्रत्यूहं भवतु भवतो वर्त्मनि शिवं समुत्तिष्ठ क्षिप्रं मनसि मुदमाधाय सदयम्
अधस्ताद्धावन्तो लघु लघु समुत्ताननयनैर्भवन्तं वीक्षन्तां कुतुकतरला गोपशिशवः
nirastapratyūhaṃ bhavatu bhavato vartmani śivaṃ samuttiṣṭha kṣipraṃ manasi mudamādhāya sadayam
adhastāddhāvanto laghu laghu samuttānanayanairbhavantaṃ vīkṣantāṃ kutukataralā gopaśiśavaḥ
- 12
किशोरोत्तंसो ऽसौ कठिनमतिना दानपतिना यया निन्ये तूर्णं पशुपयुवतीजीवितपतिः
तया गन्तव्या ते निखिलजगदेकप्रथितया पदव्या भव्यानां तिलक किल दाशार्हनगरी
kiśorottaṃso 'sau kaṭhinamatinā dānapatinā yayā ninye tūrṇaṃ paśupayuvatījīvitapatiḥ
tayā gantavyā te nikhilajagadekaprathitayā padavyā bhavyānāṃ tilaka kila dāśārhanagarī
- 13
गलद्बाष्पासारप्लुतधवलगण्डा मृगदृशो विदूयन्ते यत्र प्रबलमदनावेशविवशाः
त्वया विज्ञातव्या हरिचरणसङ्गप्रणयिनो ध्रुवं सा चक्राङ्गी रतिसख शताङ्गस्य पदवी
galadbāṣpāsāraplutadhavalagaṇḍā mṛgadṛśo vidūyante yatra prabalamadanāveśavivaśāḥ
tvayā vijñātavyā haricaraṇasaṅgapraṇayino dhruvaṃ sā cakrāṅgī ratisakha śatāṅgasya padavī
- 14
पिबन्जम्बुश्यामं मिहिरदुहितुर्वारि मधुरं मृणालीर्भुञ्जानो हिमकरकलाकोमलरुचः
क्षणं हृष्टस्तिष्ठन्निबिडविटपे शाखिनि सखे सुखेन प्रस्थानं रचयतु भवान्वृष्णिनगरे
pibanjambuśyāmaṃ mihiraduhiturvāri madhuraṃ mṛṇālīrbhuñjāno himakarakalākomalarucaḥ
kṣaṇaṃ hṛṣṭastiṣṭhannibiḍaviṭape śākhini sakhe sukhena prasthānaṃ racayatu bhavānvṛṣṇinagare
- 15
बलाद् आक्रन्दन्तीर्थपथिकम् अक्रूरमिलितं विदूराद् आभीरीततिर् अनुययौ येन रमणम्
तमादौ पन्थानं रचय चरितार्था भवतु ते विराजन्ती सर्वोपरि परमहंसस्थितिरियम्
balād ākrandantīrthapathikam akrūramilitaṃ vidūrād ābhīrītatir anuyayau yena ramaṇam
tamādau panthānaṃ racaya caritārthā bhavatu te virājantī sarvopari paramahaṃsasthitiriyam
- 16
अकस्मादस्माकं हरिरपहरन्नंशुकचयं यमारूढो गूढप्रणयलहरीः कन्दलयितुम्
तव श्रान्तस्यान्तःस्थगितरविबिम्बः किसलयैः कदम्बः कादम्ब त्वरितम् अवलम्बः स भविता
akasmādasmākaṃ harirapaharannaṃśukacayaṃ yamārūḍho gūḍhapraṇayalaharīḥ kandalayitum
tava śrāntasyāntaḥsthagitaravibimbaḥ kisalayaiḥ kadambaḥ kādamba tvaritam avalambaḥ sa bhavitā
- 17
किरन्ती लावण्यं दिशि दिशि शिखण्डस्तवकिनी दधाना साधीयः कनकविमलद्योतिवसनम्
तमालश्यामाङ्गी सरलमुरलीचुम्बितमुखी जगौ चित्रं यत्र प्रकटपरमानन्दलहरी
kirantī lāvaṇyaṃ diśi diśi śikhaṇḍastavakinī dadhānā sādhīyaḥ kanakavimaladyotivasanam
tamālaśyāmāṅgī saralamuralīcumbitamukhī jagau citraṃ yatra prakaṭaparamānandalaharī
- 18
तया भूयःक्रीडारभसविकसद्बल्लववधूवपुर्वल्लीभ्रश्यन्मृगमदकणश्यामलिकया
विधातव्यो हल्लीसकदलितमल्लीलतिकया समन्तादुल्लासस्तव मनसि रासस्थलिकया
tayā bhūyaḥkrīḍārabhasavikasadballavavadhūvapurvallībhraśyanmṛgamadakaṇaśyāmalikayā
vidhātavyo hallīsakadalitamallīlatikayā samantādullāsastava manasi rāsasthalikayā
- 19
तदन्ते वासन्तीविरचितम् अनङ्गोत्सवकलाचतुःशालं शौरेः स्फुरति न दृशौ तत्र विकिरेः
तदालोकोद्भेदप्रमदभरविस्मारितगतिक्रिये जाने तावत्त्वयि बत हता गोपवनिता
tadante vāsantīviracitam anaṅgotsavakalācatuḥśālaṃ śaureḥ sphurati na dṛśau tatra vikireḥ
tadālokodbhedapramadabharavismāritagatikriye jāne tāvattvayi bata hatā gopavanitā
- 20
मम स्यादर्थानां क्षतिरिह विलम्बाद्यद् अपि ते विलोकेथाः सर्वं तदपि हरिकेलिस्थलमिदम्
तवेयं न व्यर्था भवतु शुचिता कः स हि सखे गुणो यश्चाणूरद्विषि मतिनिवेशाय न भवेत्
mama syādarthānāṃ kṣatiriha vilambādyad api te vilokethāḥ sarvaṃ tadapi harikelisthalamidam
taveyaṃ na vyarthā bhavatu śucitā kaḥ sa hi sakhe guṇo yaścāṇūradviṣi matiniveśāya na bhavet
- 21
सकृद्वंशीनादश्रवणमिलिताभीरवनितारहःक्रीडासाक्षी प्रतिपदलतासद्मसुभगः
स धेनूनां बन्धुर्मधुमथनखट्टायितशिलः करिष्यत्यानन्दं सपदि तव गोवर्धनगिरिः
sakṛdvaṃśīnādaśravaṇamilitābhīravanitārahaḥkrīḍāsākṣī pratipadalatāsadmasubhagaḥ
sa dhenūnāṃ bandhurmadhumathanakhaṭṭāyitaśilaḥ kariṣyatyānandaṃ sapadi tava govardhanagiriḥ
- 22
तमेवाद्रिं चक्राङ्कितकरपरिष्वङ्गरसिकं महीचक्रे शङ्केमहि शिखरिणां शेखरतया
अरातिं ज्ञातीनां ननु हरिहयं यः परिभवन्यथार्थं स्वं नाम व्यधित भुवि गोवर्धन इति
tamevādriṃ cakrāṅkitakarapariṣvaṅgarasikaṃ mahīcakre śaṅkemahi śikhariṇāṃ śekharatayā
arātiṃ jñātīnāṃ nanu harihayaṃ yaḥ paribhavanyathārthaṃ svaṃ nāma vyadhita bhuvi govardhana iti
- 23
तमालस्यालोकाद्गिरिपरिसरे सन्ति चपलाः पुलिन्द्यो गोविन्दस्मरणरभसोत्तप्तवपुषः
शनैस्तापं तासां क्षणमपनयन्यास्यति भवान् अवश्यं कालिन्दीसलिलशिशिरैः पक्षपवनैः
tamālasyālokādgiriparisare santi capalāḥ pulindyo govindasmaraṇarabhasottaptavapuṣaḥ
śanaistāpaṃ tāsāṃ kṣaṇamapanayanyāsyati bhavān avaśyaṃ kālindīsalilaśiśiraiḥ pakṣapavanaiḥ
- 24
तदन्ते श्रीकान्तस्मरसमरघाटीपुलकिता कदम्बानां वाटी रसिकपरिपाटीं स्फुटयति
त्वमासीनस्तस्यां न यदि परितो नन्दसि ततो बभूव व्यर्था ते घनरसनिवेशव्यसनिता
tadante śrīkāntasmarasamaraghāṭīpulakitā kadambānāṃ vāṭī rasikaparipāṭīṃ sphuṭayati
tvamāsīnastasyāṃ na yadi parito nandasi tato babhūva vyarthā te ghanarasaniveśavyasanitā
- 25
शरन्मेघश्रेणीप्रतिभटम् अरिष्टासुरशिरश्चिरं शुष्कं वृन्दावनपरिसरे द्रक्ष्यति भवान्
यदारोढुं दूरान्मिलति किल कैलासशिखरिभ्रमाक्रान्तस्वान्तो गिरिशसुहृदः किंकरगणः
śaranmeghaśreṇīpratibhaṭam ariṣṭāsuraśiraściraṃ śuṣkaṃ vṛndāvanaparisare drakṣyati bhavān
yadāroḍhuṃ dūrānmilati kila kailāsaśikharibhramākrāntasvānto giriśasuhṛdaḥ kiṃkaragaṇaḥ
- 26
रुवन्याहि स्वैरं चरमदशया चुम्बितरुचो नितम्बिन्यो वृन्दावनभुवि सखे सन्ति बहवः
परावर्तिष्यन्ते तुलितमुरजिन्नूपुररवात्तव ध्वानात्तासां बहिरपि गताः क्षिप्रमसवः
ruvanyāhi svairaṃ caramadaśayā cumbitaruco nitambinyo vṛndāvanabhuvi sakhe santi bahavaḥ
parāvartiṣyante tulitamurajinnūpuraravāttava dhvānāttāsāṃ bahirapi gatāḥ kṣipramasavaḥ
- 27
त्वमासीनः शाखान्तरमिलितचण्डत्विषि सुखं दधीथा भाण्डीरे क्षणमपि घनश्यामलरुचौ
ततो हंसं बिभ्रन्निखिलनभसश्चिक्रमिषया स वर्धिष्णुं विष्णुं कलितदरचक्रं तुलयिता
tvamāsīnaḥ śākhāntaramilitacaṇḍatviṣi sukhaṃ dadhīthā bhāṇḍīre kṣaṇamapi ghanaśyāmalarucau
tato haṃsaṃ bibhrannikhilanabhasaścikramiṣayā sa vardhiṣṇuṃ viṣṇuṃ kalitadaracakraṃ tulayitā
- 28
त्वम् अष्टाभिर्नेत्रैर्विगलदमलप्रेमसलिलैर्मुहुः सिक्तस्तम्भां चतुर चतुरास्यस्तुतिभुवम्
जिहीथा विख्यातां स्फुटमिह भवद्बान्धवरथं प्रविष्टं मंस्यन्ते विधिम् अटविदेव्यस्त्वयि गते
tvam aṣṭābhirnetrairvigaladamalapremasalilairmuhuḥ siktastambhāṃ catura caturāsyastutibhuvam
jihīthā vikhyātāṃ sphuṭamiha bhavadbāndhavarathaṃ praviṣṭaṃ maṃsyante vidhim aṭavidevyastvayi gate
- 29
उदञ्चन्नेत्राम्भः प्रसरलहरीपिच्छिलपथस्खलत्पादन्यासप्रणिहितविलम्बाकुलधियः
हरौ यस्मिन्मग्ने त्वरितयमुनाकूलगमनस्पृहाक्षिप्ता गोप्यो ययुरनुपदं कामपि दशाम्
udañcannetrāmbhaḥ prasaralaharīpicchilapathaskhalatpādanyāsapraṇihitavilambākuladhiyaḥ
harau yasminmagne tvaritayamunākūlagamanaspṛhākṣiptā gopyo yayuranupadaṃ kāmapi daśām
- 30
मुहुर्लास्यक्रीडाप्रमदमिलदाहोपुरुषिकाविकाशेन भ्रष्टैः फणिमणिकुलैर्धूमलरुचौ
पुरस्तस्मिन्नीपद्रुमकुसुमकिञ्जल्कसुरभौ त्वया पुण्ये पेयं मधुरमुदकं कालियह्रदे
muhurlāsyakrīḍāpramadamiladāhopuruṣikāvikāśena bhraṣṭaiḥ phaṇimaṇikulairdhūmalarucau
purastasminnīpadrumakusumakiñjalkasurabhau tvayā puṇye peyaṃ madhuramudakaṃ kāliyahrade

