8 shlokas
- 1
गन्धाढ्यासौ भुवनविदिता केतकी स्वर्णवर्णा पद्मभ्रान्त्या क्षुधितमधुपः पुष्पमध्ये पपात
अन्धीभूतः कुसुमरजसा कण्टकैश्छिन्नपक्षः स्थातुं गन्तुं द्वयमपि सखे नैव शक्तो द्विरेफः
gandhāḍhyāsau bhuvanaviditā ketakī svarṇavarṇā padmabhrāntyā kṣudhitamadhupaḥ puṣpamadhye papāta
andhībhūtaḥ kusumarajasā kaṇṭakaiśchinnapakṣaḥ sthātuṃ gantuṃ dvayamapi sakhe naiva śakto dvirephaḥ
- 2
गन्धाढ्यां नवमल्लिकां मधुकरस्त्यक्त्वा गतो यूथिकां दैवात्तां च विहाय चम्पकवनं पश्चात्सरोजं गतः
बद्धस्तत्र निशाकरेण विधिना क्रन्दत्यसौ मूढधीः संतोषेण विना पराभवपदं प्राप्नोति मूढो जनः
gandhāḍhyāṃ navamallikāṃ madhukarastyaktvā gato yūthikāṃ daivāttāṃ ca vihāya campakavanaṃ paścātsarojaṃ gataḥ
baddhastatra niśākareṇa vidhinā krandatyasau mūḍhadhīḥ saṃtoṣeṇa vinā parābhavapadaṃ prāpnoti mūḍho janaḥ
- 3
येऽमी ते मुकुलोद्गमादनुदिनं त्वामाश्रिताः षट्पदास्ते भ्राम्यन्ति फलाद्ववहिर्बहिरतो दृष्ट्वा न सम्भाषसे
ये कीटास्तव दृक्पथं च न गतास्ते त्वत्फलाभ्यन्तरे धिक्त्वां चूत यतः परापरपरिज्ञानानभिज्ञो भवान्
ye'mī te mukulodgamādanudinaṃ tvāmāśritāḥ ṣaṭpadāste bhrāmyanti phalādvavahirbahirato dṛṣṭvā na sambhāṣase
ye kīṭāstava dṛkpathaṃ ca na gatāste tvatphalābhyantare dhiktvāṃ cūta yataḥ parāparaparijñānānabhijño bhavān
- 4
नीतं जन्म नवीननीरजवने पीतं मधु स्वेच्छया मालत्याः कुसुमेषु येन सततं केली कृता हेलया
तेनेयं मधुगन्धलुब्धमनसा गुञ्जालतां सेव्यते हा धिग्दैवकृतं स एव मधुपः कां कां दशां नागतः
nītaṃ janma navīnanīrajavane pītaṃ madhu svecchayā mālatyāḥ kusumeṣu yena satataṃ kelī kṛtā helayā
teneyaṃ madhugandhalubdhamanasā guñjālatāṃ sevyate hā dhigdaivakṛtaṃ sa eva madhupaḥ kāṃ kāṃ daśāṃ nāgataḥ
- 5
पलाशकुसुमभ्रान्त्या शुकतुण्डे मधुव्रतः
पतत्येष शुको ऽप्येनं जम्बुभ्रान्त्या जिघांसति
palāśakusumabhrāntyā śukatuṇḍe madhuvrataḥ
patatyeṣa śuko 'pyenaṃ jambubhrāntyā jighāṃsati
- 6
दृष्ट्वा स्फीतो भवदलिरसौ लेख्यपद्मं विशालं चित्रं चित्रं किमिति किमिति व्याहरन्निष्पपात
नास्मिन्गन्धो न च मधुकणा नास्ति तत्सौकुमार्यं घूर्णन्मूर्ध्ना बत नतशिरा व्रीडया निर्जगाम
dṛṣṭvā sphīto bhavadalirasau lekhyapadmaṃ viśālaṃ citraṃ citraṃ kimiti kimiti vyāharanniṣpapāta
nāsmingandho na ca madhukaṇā nāsti tatsaukumāryaṃ ghūrṇanmūrdhnā bata nataśirā vrīḍayā nirjagāma
- 7
अलिरसौ नलिनीवनवल्लभः कुमुदिनीकुलकेलिकलारसः
विधिवशेन विदेशमुपागतः कुटजपुष्परसं बहु मन्यते
alirasau nalinīvanavallabhaḥ kumudinīkulakelikalārasaḥ
vidhivaśena videśamupāgataḥ kuṭajapuṣparasaṃ bahu manyate
- 8
रात्रिर्गमिष्यति भविष्यति सुप्रभातं भास्वानुदेष्यति हसिष्यति पद्मजालम्
इत्थं विचिन्तयति कोशगते द्विरेफे हा हन्त हन्त नलिनीं गज उज्जहार
rātrirgamiṣyati bhaviṣyati suprabhātaṃ bhāsvānudeṣyati hasiṣyati padmajālam
itthaṃ vicintayati kośagate dvirephe hā hanta hanta nalinīṃ gaja ujjahāra

