11 shlokas
- 1
व्याप्तचराचरभावविशेषं चिन्मयम् एकम् अनन्तम् अनादिम्
भैरवनाथम् अनाथशरण्यं त्वन्मयचित्ततया हृदि वन्दे
vyāptacarācarabhāvaviśeṣaṃ cinmayam ekam anantam anādim
bhairavanātham anāthaśaraṇyaṃ tvanmayacittatayā hṛdi vande
- 2
त्वन्मयम् एतद् अशेषम् इदानीं भाति मम त्वदनुग्रहशक्त्या
त्वं च महेश सदैव ममात्मा स्वात्ममयं मम तेन समस्तम्
tvanmayam etad aśeṣam idānīṃ bhāti mama tvadanugrahaśaktyā
tvaṃ ca maheśa sadaiva mamātmā svātmamayaṃ mama tena samastam
- 3
स्वात्मनि विश्वगये त्वयि नाथे तेन न संसृष्टिभीतिकथास्ति
सत्स्व् अपि दुर्धरदुःखविमोहत्रासविधायिषु कर्मगणेषु
svātmani viśvagaye tvayi nāthe tena na saṃsṛṣṭibhītikathāsti
satsv api durdharaduḥkhavimohatrāsavidhāyiṣu karmagaṇeṣu
- 4
अन्तक मां प्रति मा दृशम् एनं क्रोधकरालतमां विनिधेहि
शङ्करसेवनचिन्तनधीरो भीषणभैरवशक्तिमयो ऽस्मि
antaka māṃ prati mā dṛśam enaṃ krodhakarālatamāṃ vinidhehi
śaṅkarasevanacintanadhīro bhīṣaṇabhairavaśaktimayo 'smi
- 5
इत्थम् उपोढभवन्मयसंविद्दीधितिदारितभूरितमिस्रः
मृत्युयमान्तककर्मपिशाचैर्नाथ नमो ऽस्तु न जातु बिभेमि
ittham upoḍhabhavanmayasaṃviddīdhitidāritabhūritamisraḥ
mṛtyuyamāntakakarmapiśācairnātha namo 'stu na jātu bibhemi
- 6
प्रोदितसत्यविबोधमरीचिप्रेक्षितविश्वपदार्थसतत्त्वः
भावपरामृतनिर्भरपूर्णे त्वय्य् अहम् आत्मनि निर्वृतिम् एमि
proditasatyavibodhamarīciprekṣitaviśvapadārthasatattvaḥ
bhāvaparāmṛtanirbharapūrṇe tvayy aham ātmani nirvṛtim emi
- 7
मानसगोचरम् एति यदैव क्लेशदशा तनुतापविधात्री
नाथ तदैव मम त्वदभेदस्तोत्रपरामृतवृष्टिर् उदेति
mānasagocaram eti yadaiva kleśadaśā tanutāpavidhātrī
nātha tadaiva mama tvadabhedastotraparāmṛtavṛṣṭir udeti
- 8
शङ्कर सत्यम् इदं व्रतदानस्नानतपो भवतापविदारि
तावकशास्त्रपरामृतचिन्ता स्यन्दति चेतसि निर्वृतिधाराम्
śaṅkara satyam idaṃ vratadānasnānatapo bhavatāpavidāri
tāvakaśāstraparāmṛtacintā syandati cetasi nirvṛtidhārām
- 9
नृत्यति गायति हृष्यति गाढं संविद् इयं मम भैरवनाथ
त्वां प्रियम् आप्य सुदर्शनम् एकम्दुर्लभम् अन्यजनैः समयज्ञम्
nṛtyati gāyati hṛṣyati gāḍhaṃ saṃvid iyaṃ mama bhairavanātha
tvāṃ priyam āpya sudarśanam ekamdurlabham anyajanaiḥ samayajñam
- 10
वसुरसपौषे कृष्णदशम्याम् अभिनवगुप्तः स्तवम् इमम् अकरोत्
येन विभुर्भवमरुसन्तापं शमयति जनस्य झटिति दयालुः
vasurasapauṣe kṛṣṇadaśamyām abhinavaguptaḥ stavam imam akarot
yena vibhurbhavamarusantāpaṃ śamayati janasya jhaṭiti dayāluḥ
- 11
समाप्तं स्तवम् इदम् अभिनवाख्यं पद्यनवकम्
samāptaṃ stavam idam abhinavākhyaṃ padyanavakam

