29 shlokas
- 1
अथ प्रायणीयेन चरति
atha prāyaṇīyena carati
- 2
प्रायणीयेन चरित्वा पदेन चरति
prāyaṇīyena caritvā padena carati
- 3
पदेन चरित्वा राजानं क्रीत्वोह्यातिथ्यं निर्वपति
padena caritvā rājānaṃ krītvohyātithyaṃ nirvapati
- 4
आतिथ्येन प्रचर्य प्रथमाभ्यां प्रवर्ग्योपसद्भ्यां प्रचरति
ātithyena pracarya prathamābhyāṃ pravargyopasadbhyāṃ pracarati
- 5
अथोपनिष्क्रम्य संप्रैषम् आह सुब्रह्मण्य सुब्रह्मण्याम् आह्वय त्रिस्तनव्रतं प्रयच्छतेति
athopaniṣkramya saṃpraiṣam āha subrahmaṇya subrahmaṇyām āhvaya tristanavrataṃ prayacchateti
- 6
आह्वयति सुब्रह्मण्यः सुब्रह्मण्याम्
āhvayati subrahmaṇyaḥ subrahmaṇyām
- 7
त्रिस्तनव्रतं प्रयच्छति
tristanavrataṃ prayacchati
- 8
स पुच्छाद् एवाग्रे चतुरः प्रतीचः प्रक्रमान्प्रक्रामति दक्षिणा पञ्चमम्
sa pucchād evāgre caturaḥ pratīcaḥ prakramānprakrāmati dakṣiṇā pañcamam
- 9
तत्स्फ्यं निदधाति
tatsphyaṃ nidadhāti
- 10
स उपरवाणां कालः
sa uparavāṇāṃ kālaḥ
- 11
अथ महावेद्या उत्तराद् अंसीयाच्छङ्कोर्वेद्यन्तेन द्वादश प्रतीचः प्रक्रमान्प्रक्रामत्य् उदञ्चं त्रयोदशम्
atha mahāvedyā uttarād aṃsīyācchaṅkorvedyantena dvādaśa pratīcaḥ prakramānprakrāmaty udañcaṃ trayodaśam
- 12
तद् आग्नीध्र उपसीदति
tad āgnīdhra upasīdati
- 13
स उत्करस्य कालः
sa utkarasya kālaḥ
- 14
अथोपरवाणां कालात्स्तम्बयजुर्हरति
athoparavāṇāṃ kālātstambayajurharati
- 15
इदम् एव प्रसिद्धम्
idam eva prasiddham
- 16
पौरोडाशिकं त्रिर्यजुषा तूष्णीं चतुर्थम्
pauroḍāśikaṃ triryajuṣā tūṣṇīṃ caturtham
- 17
पूर्वं परिग्राहं परिगृह्णाति
pūrvaṃ parigrāhaṃ parigṛhṇāti
- 18
करणं जपति
karaṇaṃ japati
- 19
उद्धताद् आग्नीध्रस्त्रिर्हरति
uddhatād āgnīdhrastrirharati
- 20
यद् आग्नीध्रस्त्रिर्हरत्य् अथाग्रेण शालां तिष्ठन्संप्रैषम् आह वेदिकारा वेदिं कल्पयतेति
yad āgnīdhrastrirharaty athāgreṇa śālāṃ tiṣṭhansaṃpraiṣam āha vedikārā vediṃ kalpayateti
- 21
यथासंप्रैषं ते कुर्वन्ति
yathāsaṃpraiṣaṃ te kurvanti
- 22
अथ कार्ष्णाजिनीर् उपानह उपमुञ्चन्ते चिते त्वेत्य् अध्वर्युर् आचिते त्वेति प्रतिप्रस्थाता मनश्चिते त्वेति ब्रह्मा तपश्चिते त्वेति यजमानश्चिते त्वा चिते त्वेत्य् एव वा सर्वे
atha kārṣṇājinīr upānaha upamuñcante cite tvety adhvaryur ācite tveti pratiprasthātā manaścite tveti brahmā tapaścite tveti yajamānaścite tvā cite tvety eva vā sarve
- 23
अपि वा तूष्णीम् एवाथ याचति धनुर्बाणवच्चतुरो ऽश्मन ऐन्द्रीम् इष्टकां विभक्तिम् उदपात्रं दर्भस्तम्बं दूर्वाम् आज्यस्थालीं सस्रुवाम् इति
api vā tūṣṇīm evātha yācati dhanurbāṇavaccaturo 'śmana aindrīm iṣṭakāṃ vibhaktim udapātraṃ darbhastambaṃ dūrvām ājyasthālīṃ sasruvām iti
- 24
एतत्समादायोत्तरे श्रोण्यन्ते संसादयन्ति
etatsamādāyottare śroṇyante saṃsādayanti
- 25
अथ द्वाभ्याम् आत्मन्य् अग्निं गृह्णीते मयि गृह्णाम्य् अग्रे अग्निम्यो नो अग्निर् इति
atha dvābhyām ātmany agniṃ gṛhṇīte mayi gṛhṇāmy agre agnimyo no agnir iti
- 26
स्वयंचितिं जपति यास्ते अग्ने समिधो यानि धामेति
svayaṃcitiṃ japati yāste agne samidho yāni dhāmeti
- 27
श्वेतम् अश्वम् अभिमृश्यान्तःशर्करम् इमाम् उपदधाति प्रजापतिस्त्वा सादयतु तया देवतयाङ्गिरस्वद्ध्रुवा सीदेति
śvetam aśvam abhimṛśyāntaḥśarkaram imām upadadhāti prajāpatistvā sādayatu tayā devatayāṅgirasvaddhruvā sīdeti
- 28
अथादत्ते धनुर्बाणवच्चतुरो ऽश्मन इति
athādatte dhanurbāṇavaccaturo 'śmana iti
- 29
एतत्समादाय जघनेन दक्षिणेनाग्निं परीत्याग्रेण यूपावटीयं शङ्कुं तिष्ठन्धनुर् अधिज्यं कृत्वायत्यान्तःशर्करम् इषुं निहन्ति
etatsamādāya jaghanena dakṣiṇenāgniṃ parītyāgreṇa yūpāvaṭīyaṃ śaṅkuṃ tiṣṭhandhanur adhijyaṃ kṛtvāyatyāntaḥśarkaram iṣuṃ nihanti

