Sanskrit

Ashvalayana Shrauta Sutra · Khanda 7 4.7.4

4.7.4

उपहूय सुदुघां धेनुम् एताम् इति द्वे अभि त्वा देव सवितः सम् ई वत्सं न मातृभिः सं वत्स इव मातृभिर्यस्ते स्तनः शशयो यो मयोभूर्गौर् अमीमेद् अनु वत्सं मिषन्तं नमसेद् उपसीदत संजानाना उपसीदन्न् अभिज्ञ्व् आ दशभिर्विवस्वतो दुहन्ति सप्तैकां समिद्धो अग्निर् अश्विना तप्तो वां घर्म आगतम्

दुह्यन्ते गावो वृषणेह धेनवो दस्रा मदन्ति कारवः

समिद्धो अग्निर्वृषणा रतिर्दिवस्तप्तो घर्मो दुह्यते वाम् इषे मधु

वयं हि वां पुरुतमासो अश्विना हवामहे सधमादेषु कारवः

तद् उ प्रत्यक्षतमम् अस्य कर्मात्मन्वन्नभो दुह्यते घृतं पय उत्तिष्ठ ब्रह्मणस्पत इत्य् एताम् उक्त्वावतिष्ठते दुग्धायाम् अधुक्षत्पिप्युषीम् इषम् इत्य् आह्रियमाण उपद्रव पयसा गोधुग् ओषम् आ घर्मे सिञ्च पय उस्रियायाः

वि नाकम् अख्यत्सविता वरेण्यो नु द्यावा पृथिवी सुप्रणीतिर् इत्य् आसिच्यमान आ नूनम् अश्विनोर् ऋषिर् इति गव्य आ सुते सिञ्चत श्रियम् इत्य् आज आसिक्तयोः सम् उ त्ये महतीर् अप इति

महावीरम् आदायोत्तिष्ठत्सूद् उ ष्य देवः सविता हिरण्ययेत्य् अनूत्तिष्ठेत्प्रैतु ब्रह्मणस्पतिर् इत्य् अनुव्रजेद्गन्धर्व इत्था पदम् अस्य रक्षतीति खरम् अवेक्ष्य तम् अतिक्रम्य नाके सुपर्णम् उप यत्पतन्तम् इति समाप्य प्रणवेनोपविशेद् अनिरस्य तृणं प्रेषितो यजति

तप्तो वां घर्मो नक्षति स्वहोता प्र वाम् अध्वर्युश्चरति प्रयस्वान्

मधोर्दुग्धस्याश्विना तनाया वीतं पातं पयस उस्रियायाः

उभा पिबतम् अश्विनेति च उभाभ्याम् अनवानम् अग्ने वीहीत्य् अनुवषट्कारो घर्मस्य अग्ने वीहीति वा

ब्रह्मा वषट्कृते जपत्य् अनुवषट्कृते च विश्वा आशा दक्षिणसाद्विश्वान्देवान्देवान् अयाड् इह

स्वाहाकृतस्य घर्मस्य मध्वः पिबतम् अश्विनेत्य् एवम् एवापराह्णिके

यद् उस्रियास्व् आहुतं घृतं पयो ऽयं स वाम् अश्विना भाग आगतम्

माध्वी धर्तारा विदथस्य सत्पती तप्तं घर्मं पिबतं सोम्यं मधु

अस्य पिबतम् अश्विनेति चाप्रेषितो होता अनुवषट्कृते स्वाहाकृतः शुचिर्देवेषु घर्मो यो अश्विनोश्चमसो देवपानः

तम् ईं विश्वे अमृतासो जुषाणा गन्धर्वस्य प्रत्य् आस्ना रिहन्ति

समुद्राद् ऊर्मिम् उदियर्ति वेनो द्रप्सः समुद्रम् अभि यज्जिगाति सखे सखायम् अभ्याववृत्स्वोर्ध्व ऊ षु ण ऊतय इति द्वे

तं घेम् इत्था नमस्विन इति प्रागाथीं पूर्वाह्णे काण्वीम् अपराह्णे ऽन्यतरां वात्यन्तं काण्वीं त्व् एव उत्तमे पावक शोचे तव हि क्षयं परीत्य् उक्त्वा भक्षम् आकाङ्क्षेद्वाजिनेन भक्षोपायो हुतं हविर्मधुहविर् इन्द्रतमे अग्नाव् अश्याम ते देव घर्म

मधुमतः पितुमतो वाजवतो ऽङ्गिरस्वतो नमस्ते अस्तु मा मा हिंसीर् इति भक्षजपः कर्मिणो घर्मं भक्षयेयुः सर्वे तु दीक्षिताः सर्वेषु दीक्षितेषु गृहपतेस्तृतीयोत्तमौ भक्षौ संप्रेषितः श्येनो न योनिं सदनं धिया कृतम् आ यस्मिन्सप्त वासवा रोहन्तु पूर्व्या रुहः

ऋषिर्ह दीर्घश्रुत्तम इन्द्रस्य घर्मो अतिथिः

सूयवसाद्भगवती हि भूया इति परिदध्यात्

Transliteration

upahūya sudughāṃ dhenum etām iti dve abhi tvā deva savitaḥ sam ī vatsaṃ na mātṛbhiḥ saṃ vatsa iva mātṛbhiryaste stanaḥ śaśayo yo mayobhūrgaur amīmed anu vatsaṃ miṣantaṃ namased upasīdata saṃjānānā upasīdann abhijñv ā daśabhirvivasvato duhanti saptaikāṃ samiddho agnir aśvinā tapto vāṃ gharma āgatam

duhyante gāvo vṛṣaṇeha dhenavo dasrā madanti kāravaḥ

samiddho agnirvṛṣaṇā ratirdivastapto gharmo duhyate vām iṣe madhu

vayaṃ hi vāṃ purutamāso aśvinā havāmahe sadhamādeṣu kāravaḥ

tad u pratyakṣatamam asya karmātmanvannabho duhyate ghṛtaṃ paya uttiṣṭha brahmaṇaspata ity etām uktvāvatiṣṭhate dugdhāyām adhukṣatpipyuṣīm iṣam ity āhriyamāṇa upadrava payasā godhug oṣam ā gharme siñca paya usriyāyāḥ

vi nākam akhyatsavitā vareṇyo nu dyāvā pṛthivī supraṇītir ity āsicyamāna ā nūnam aśvinor ṛṣir iti gavya ā sute siñcata śriyam ity āja āsiktayoḥ sam u tye mahatīr apa iti

mahāvīram ādāyottiṣṭhatsūd u ṣya devaḥ savitā hiraṇyayety anūttiṣṭhetpraitu brahmaṇaspatir ity anuvrajedgandharva itthā padam asya rakṣatīti kharam avekṣya tam atikramya nāke suparṇam upa yatpatantam iti samāpya praṇavenopaviśed anirasya tṛṇaṃ preṣito yajati

tapto vāṃ gharmo nakṣati svahotā pra vām adhvaryuścarati prayasvān

madhordugdhasyāśvinā tanāyā vītaṃ pātaṃ payasa usriyāyāḥ

ubhā pibatam aśvineti ca ubhābhyām anavānam agne vīhīty anuvaṣaṭkāro gharmasya agne vīhīti vā

brahmā vaṣaṭkṛte japaty anuvaṣaṭkṛte ca viśvā āśā dakṣiṇasādviśvāndevāndevān ayāḍ iha

svāhākṛtasya gharmasya madhvaḥ pibatam aśvinety evam evāparāhṇike

yad usriyāsv āhutaṃ ghṛtaṃ payo 'yaṃ sa vām aśvinā bhāga āgatam

mādhvī dhartārā vidathasya satpatī taptaṃ gharmaṃ pibataṃ somyaṃ madhu

asya pibatam aśvineti cāpreṣito hotā anuvaṣaṭkṛte svāhākṛtaḥ śucirdeveṣu gharmo yo aśvinoścamaso devapānaḥ

tam īṃ viśve amṛtāso juṣāṇā gandharvasya praty āsnā rihanti

samudrād ūrmim udiyarti veno drapsaḥ samudram abhi yajjigāti sakhe sakhāyam abhyāvavṛtsvordhva ū ṣu ṇa ūtaya iti dve

taṃ ghem itthā namasvina iti prāgāthīṃ pūrvāhṇe kāṇvīm aparāhṇe 'nyatarāṃ vātyantaṃ kāṇvīṃ tv eva uttame pāvaka śoce tava hi kṣayaṃ parīty uktvā bhakṣam ākāṅkṣedvājinena bhakṣopāyo hutaṃ havirmadhuhavir indratame agnāv aśyāma te deva gharma

madhumataḥ pitumato vājavato 'ṅgirasvato namaste astu mā mā hiṃsīr iti bhakṣajapaḥ karmiṇo gharmaṃ bhakṣayeyuḥ sarve tu dīkṣitāḥ sarveṣu dīkṣiteṣu gṛhapatestṛtīyottamau bhakṣau saṃpreṣitaḥ śyeno na yoniṃ sadanaṃ dhiyā kṛtam ā yasminsapta vāsavā rohantu pūrvyā ruhaḥ

ṛṣirha dīrghaśruttama indrasya gharmo atithiḥ

sūyavasādbhagavatī hi bhūyā iti paridadhyāt

By System Admin

Translation

Draft in progress